1 ዮሴፎ ገሊደ ግብጼ ካትያዉ ሀዋዳን ያጊደ ኦዴዳ፤ “ታ አዉነ ታ እሻቱ፥ ባረንቱ ዶርሳ ዉድያና፥ ባረንቱ ምያ ዉድያናነ ባረንቶ ደእያዋ ኡባና ካናነ ቢታፐ ዪደ፥ ሀእ ገሴመ ቢታን ደእኖ” ያጌዳ። 2 እ ባረ እሻቱዋፐ እቼሻቱዋ ዶሪደ ካትያ ስንꬃ አꬄዳ።

3 ካቲ ሄ እሻቱዋ፥ “ህንተንቱ ኪታይ አዬ?” ያጊደ ኦቼዳ።

ኡንቱንቱ ካትያዉ፥ “ኑን ነ ቆማቱ ኑ አዎቱዋዳንካ ዶርሳ ዉድያ ሄሜቶ” ያጊደ ዛሬድኖ። 4 ቃይ ኡንቱንቱ አዉ፥ “ካናነ ቢታን ኮሻይ ጺጽ ደእያ ድራዉነ ነ ቆማቱዋ መህያዉ ምያባይ አይነ ባይና ድራዉ፥ ኑን ሀዋን አማሬዳ ዎድያ ደአናዉ ዬዶ፤ ሀያና ኑና ነ ቆማቱዋ ገሴመን ዎꬃርኪ!” ያጌድኖ።

5 ካቲ ዮሴፎ፥ “ነ አዉነ ነ እሻቱ ኔኮ ዬድኖ። 6 ስም ግብጼ ቢታይ ነ ኩሽያን ደኤ፤ ሀ ጋድያን ኡባ ሳፐ አꬊደ ሎኢያሳን ነ አዉዋነ ነ እሻቱዋ ዎꬃ፤ ኡንቱንቱ ገሴመ ቢታን ደኢኖ። ኔን ኤርና፥ ኡንቱንቱ ግዶፐ ዱማ ኤራተꬃይ ደእያዋንቱ ደኦፐ፥ ሄዋንታ ታ መህያ ቦላ ሱንꬃ” ያጌዳ።

7 ሄዋፐ ጉየ፥ ዮሴፎ ባረ አዉዋ ያቆባ ገልሲደ፥ ካትያ ስንꬃ አꬄዳ። ያቆብ ግብጼ ካትያ አንጄዳዋፐ ጉየ፥ 8 ካቲ ያቆባ፥ “ነዉ ዎይሳ ላይꬄ?” ያጊደ ኦቼዳ።

9 ያቆብ ካትያ፥ “ታን ዩያደ ደኤዳ ላይꬃይ ጼታነ ሀታማ፤ ታ ላይꬃይ በን ታ አዎቱ ዩዪደ ደኤዳ ላይꬃቱዋፐ ጉꬃነ መቱ ዳሬዳዋ” ያጌዳ። 10 ሄዋፐ ጉየ፥ ያቆብ ካትያ አንጂደ፥ አ ስንꬃፐ ካረ ከሴዳ።

11 ዮሴፎ ባረ አዉዋነ ባረ እሻቱዋ ግብጼ ቢታን ዎꬄዳ፤ ካቲ አዛዜዳዋዳን ግብጼ ቢታን ራምሳ ግያ ካታማ ማታን ደእያ፥ ኡባ ሳፐ አꬊደ ሎእያ ጋድያ ኡንቱንቶ እሜዳ። 12 ዮሴፎ ቃይ ባረ አዎ፥ ባረ እሻቶነ ባረ አዉዋ ሶ አሳ ኡባዉ ኡንቱንቱ ናና ፓይዱዋዳን ካꬃ እሜዳ።

13 ግዶፐነ ኮሻይ ጺጽ ደእያ ድራዉ፥ ሄ ቢታ ኡባን ካꬅ ባዋ። ሄ ኮሻን ግብጼነ ካናነ ቢታይ ላአቱካ ቆሄቴድኖ። 14 ዮሴፎ ግብጼ ካꬃ ዛልኢደ፥ ግብጼነ ካናነ ቢታቱዋን ደእያ ሚሻ ኡባ ሺሼዳ፤ ግብጼ ካትያ ጎለ ገልሴዳ። 15 ግብጼነ ካናነ ሻሉ ዉሬዳ ዎደ፥ ግብጼ አሳይ ኡባይ ዮሴፎኮ ዪደ አ፥ “ኑዉ ካꬃ እማ፤ ኑ ሻሉ ዉሬዳ ድራዉ፥ ኑን ነ ስንꬃን አያዉ ሀይቄቶ?” ያጌድኖ።

16 ዮሴፎ ኡንቱንታ፥ “ያቶፐ ህንተንቱ መህያ አክ ዪተ፤ ህንተንቱ ሻሉ ዉር ክቼዳዋ ግዶፐ፥ ታን ካꬃ ህንተንቱ መህያና ላማና” ያጌዳ። 17 ሄዋ ድራዉ ኡንቱንቱ ባረንቱ መህያ ዮሴፎዉ አሄድኖ። ዮሴፎ ኡንቱንቱ ፓራ፥ ዶርሳ፥ ዴሻ፥ ምያነ ሀርያ ካꬃና ላሜዳ፤ እ ሄ ላይꬃ ኡንቱንቱ መህያ ኡባና ካꬃ ላሚደ ኡንቱንታ ምዝ ሻቼዳ።

18 ሄ ላይꬃይ ዉርና፥ ኡንቱንቱ ላኤንꬃ ላይꬃን አኮ ዪደ አ፥ “ኑን ኑ ጎዳፐ ቆስያባይ ባዋ፤ ኑ ሚሻ ኡባይ ዉር ድግና፥ ኑ መህያካ ነዉ ሼꬊደ፥ ኑ ቦላፐነ ኑ ጋድያፐ አትን፥ ኑ ጎዳዉ አቴዳባይ ሀራባይ ባዋ። 19 ኑን ነ ስንꬃን አያዉ ሀይቄቶ? ኑ ጋዲካ አያዉ ꬋዪ? ኑናካ ኑ ጋድያካ ካꬃን ሻማ፤ ኑን ካትያዉ አይለታና፤ ኑ ጋዲካ አዋ ግዶ፤ ኑን ፓጻ አታና ማላ፥ ሀይቀና ማላነ ኑ ጋዲካ ኦጸና ማላ፥ ዘረꬃ ኑዉ እማ” ያጌድኖ።

20 ዮሴፎ ግብጼ ቢታ ኡባ ካትያዉ ሻሜዳ። ግብጼቱ ኡባይ ኮሻይ ጺጽ ደእያ ድራዉ፥ ባረንቱ ጋድያ ዛልኤድኖ፤ ጋዲ ካትያዋ ግዴዳ። 21 ዮሴፎ አሳ ኡባ ግብጼዉ ሀ ጋጻፐ ዶሚደ ህን ጋጻ ጋካናዉ ካትያዉ አይለ ከሴዳ። 22 ግዶፐነ እ ቄሳቱ ዋ ጋድያ ሻምቤና፤ አያዉ ጎፐ፥ ካቲ ቄሳቶ ካꬃ እሜዳ። ሄዋ ድራዉ ባረንቱ ጋድያ ዛልእበይክኖ።

23 ዮሴፎ አሳ፥ “ስም ሀቼ ታን ህንተናነ ህንተንቱ ጋድያ ካትያዉ ሻማድ። ዘረꬃ አፊደ፥ ጋደን ዘርተ። 24 ሽን ካꬃ ጫክ ገልስያ ዎደ፥ አይፌዳዋፐ እቼሹ ኩሽያፐ እት ኩሽያ ካትያዉ እምተ። እቼሹ ኩሽያፐ አቴዳ ኦይዱ ኩሺ ህንተንቱ ጋድያ ዘረꬃነ ህንተንቶ፥ ህንተንቱ ሶ አሳዉነ ህንተንቱ ናናዉ ቁማ ግዶ” ያጌዳ።

25 ኡንቱንቱ፥ “ኔን ኑና አሻዳ! ኑ ጎዳ ስንꬃን ኑን ሳባ ደሜሮኮሻ፤ ኑን ካትያዉ አይለታና” ያጌድኖ። 26 ሄዋ ድራዉ፥ ዮሴፎ ግብጼን ቢታፐ አይፌዳዋፐ እቼሹ ኩሽያፐ እቱዋ ካትያዉ እምያዋ ህግያ ከሴዳ። ሄ ህጊ ሀቼ ጋካናዉ ኤቂደ ደኤ። ካትያዋ ግድቤና ጋዲ ቄሳቱዋ ጋድያ ጻላላ።

27 እስራኤለቱ ግብጼ ቢታን ገሴመ ግያ ሳን ኡቴድኖ፤ ኡንቱንቱ ያን ማጹዋ ደሜድኖ፤ ኡንቱንቱ የለቴድኖነ ዳሮ ጮራቴድኖ።

28 ያቆብ ግብጼ ቢታን ታማነ ላፑን ላይꬃ ደኤዳ። ያቆብ ደኤዳ ላይꬃይ ጼታነ ኦይታማነ ላፑና። 29 እስራኤለ ሀይቂያ ዎዲ ማታትና፥ ባረ ናኣ ዮሴፋ ጼስሲደ ሀዋዳን ያጌዳ፤ “ታን ነ ስንꬃን ሳበቴዳዋ ግዶፐ፥ ነ ኩሽያ ታ ጉልባታን ዎꬃደ፥*ነ ኩሽያ ታ ጉልባታን ዎꬃደ፦ ሀዋ ጉሳይ ታና ግብጼን ሞገናዳን ገፓ ግያዋ። አነ ገፓ። ዶመꬃ 49:29-32፤ 50:6 30 ሽን ታን ታ ማይዛን ጋከትያ ዎደ፥ ታና ግብጼፐ አፋደ፥ ኡንቱንቱ ሞገቴዳ ሳኣን ሞጋ” ያጌዳ።

ዮሴፎ፥ “ታን ኔና ኔን ጌዳዋዳን ኦꬃና” ያጌዳ።

31 ያቆብ አ፥ “አነ ታዉ ጫቃ” ያጌዳ። ዮሴፎ አዉ ጫቄዳ፤ ሄዋፐ ጉየ፥ እስራኤሊ ባረ ሂጻን ጉፋኒደ፥ ጾሳዉ ጎይኔዳ።