1 ትምቢትያ ኦድያ እምባቆማዉ መꬍና ጎዳይ ሳጻን እሜዳ ኪታይ ሀዋ።

2 እምባቆመ፥ “አቤት መꬍና ጎዳዉ፥ ኔን ማዳናዳን ታን ጼስያ ዎደ፥ አዉደ ጋካናዉ ስሰናን እጻይ? ቃይ ታን ማካላዉ ነዉ ዋስያ ዎደ፥ አዉደ ጋካናዉ አሸናን እጻይ? 3 ሀ ናቁዋነ ባይዙዋ ታና አያዉ በሳይ? ማካላነ ባሻ ጼላደ ኔን አያዉ ጮኡ ጋደ ዳንዳያይ? ዋታይነ ኦሻይ ቢታ ኡባን ዳሬዳ። 4 ሄዋ ድራዉ፥ ህጊ ለፔዳ፤ ቱሙ ከስ ኤረና። ቃይ ናጋራንቻቱ ጽሎ አሳቱዋ ዶድ ኦይቄዳ ድራዉ፥ ፕርዳይ ጌላቴ” ያጌዳ።

5 ጾሳይ ዛሪደ፥ “ህንተ ዩሹዋን ደእያ ካዉተꬃ ጼሊደ ማላለትተ! አያዉ ጎፐ፥ ህንተዉ ኦድንቶካ ህንተ አማነና ኦሱዋ ታን ህንተ ዎድያን ኦꬃና ሀናይ። ኪታ 13:41 6 ታን ባብሎናዌቱዋ፥ ሄ መቀꬅ ባይና ድርቢያ አሳቱዋ ደንꬃይ። ኡንቱንቱ ባረንቱባ ግደና ቢታ ኦሊደ ኦይቃናዉ ቢታ ኡባን ዩዪኖ። 2 ካታ. 24:2 7 ኡንቱንቱ ያሽስያዋንታነ ዳጋንꬅያዋንታ። ኡንቱንቱ ፕርዳይነ ቦንቹ ኡንቱንቱፐ ከሴ። 8 ኡንቱንቱ ፓራቱ ማሄቱዋፐካ አꬌዳ ድርቢያነ ኦማርሳ ኦኮራቱዋፐካ አꬌዳ ኢታ። ኡንቱንቱ ፓራ አሳቱ ፕሪጺደ፥ ሃኮ ሳፐ ዪኖ፤ ኡንቱንቱ አርጋንꬃይ አየንቶ ኦይቃናዉ ፓልያዋዳን ፓሊኖ። 9 ኡንቱንቱ ኦላንቻቱ ኡባይ ማካላባ ኦꬃናዉ ባዞ ጫርኩዋዳን ጫርኪደ ዪኖ። አሳ ኦሞዲደ፥ ሻፍያዳን ሺሺኖ። 10 ኡንቱንቱ ካተቱዋ ቦላ ቅሊጪኖ፤ ሞድያዋንታካ ሚቻ ከሲኖ፤ ቃይ ሹቻን ድረቴዳ ጌሳቱዋ ኡባን ኡንቱንቱ ሚጪኖ። ሄ ጌሶቱዋ ኦሞዳናዉ ኡንቱንቱ ላንቂያን ቢታ ኬሊኖ። 11 ሄዋፐ ጉይያን፥ ኡንቱንቱ ጫርኩዋዳን አꬋና። ሄ ናቂያዋንቶ ኡንቱንቱ ዎልቃይ ኡንቱንቱ ጾሳ” ያጌዳ።

12 አቤት መꬍና ጎዳዉ፥ ታ ጾሳዉ፥ ታ ጌሻዉ፥ ኔን መꬍናፐ ዶማደ ደእያ መꬍና ጎዳ ግድኪ? ኔን ኑ ዛላ ግድያ ድራዉ፥ ኑን ሀይቆኮ። አቤት ጾሳዉ፥ ባብሎናዌቱዋ ኑ ቦላ ፕርዳ ፖላናዳን፥ ኔን ደንꬃደ ዎልቃካ ኡንቱንቶ እማዳ። 13 ነ አይፈቱ ዳሮ ጌሻ ግድያ ድራዉ፥ ኢታባ ጼላናዉ ዶስክኖ፤ ኢታባይ ኦሰትያ ዎደ በኣደ ጮኡ ጋናዉ ዳንዳያካ። ያትና፥ ሀ ጭምያዋንታ አያዉ ጮኡ ጋደ ጼላይ? ናጋራንቻቱ ባረፐ ጽልያ አሳቱዋ ምትያ ዎደ አያዉ ጮኡ ጋይ?

14 ኔን አሳ አባ ሞለቱዋዳን፥ ካለꬅያዌ ኡንቱንቶ ባይና ትራን ጎሸትያ መታቱዋዳን ኦꬃዳ። 15 ባብሎናዌቱ ጋድያ አሳ ኡባ ቃጲያን ቆሪደ ከሳና፤ ኡንቱንቱ ኡንቱንታ ባረንቱ ቀሪ ግትያን ኦይቃና፤ ቃይካ ኡንቱንቱ ኡንቱንታ ባረንቱ ዎጋ ግትያን ቡሪደ ሺሻና፤ ያቲደ ኡንቱንቱ ናሸታናነ ሀሹ ጋና። 16 ሄዋ ድራዉ፥ ኡንቱንቱ ባረንቱ ቄራ ግትያዉ ያርሺኖ፤ ባረንቱ ዎጋ ግትያዉ እጻና ጩዋዪኖ። አያዉ ጎፐ፥ ኡንቱንቱ እሻሉዋን ደእያዌነ ማልኡዋ ምያዌ ሄ ግተቱዋ ዎልቃና። 17 ያትና፥ ኡንቱንቱ ባረንቱ ግትያ ቆቆፊደ ካዉተꬃቱዋ ኡባ ዎደ ቃረት ባይናን ዎꬊደ ደአኔ?