2
1 ዎችያ አዱሳ ግምቢያ ቦላ ከሳ ኤቃደ ታን ናጋና። ሄ ሳኣን ጾሳይ ታና ግያባነ ታ ማጋናዉ እ እምያ ዛሩዋ ስሳናዉ ጼላሻና።
መꬍና ጎዳይ እምባቆማዉ እሜዳ ላኤንꬆ ዛሩዋ
2 መꬍና ጎዳይ ታዉ ዛሪደ፥ “ዎጽያ ኡራይካ ናባባና ማላ፥ ማሰቴዳ ሹቻ ቦላ ታን ነዉ ቆንጭስያ ሳፃ ኦርዱዋን ጻፋ። 3 አያዉ ጎፐ፥ ሳጻን ቤቴዳዌ ባረ ኬረቴዳ ዎድያ ናጌ። ሄ ሳጻይ ፖለትያ ዎዲ ኤለካ ጋካናዋ፤ ዎርዱዋ ግዲደ ደኤና። ታክያባ ማላትንቶካ ናጋ፤ አያዉ ጎፐ፥ እ ቱሙዋፐ ያና፤ ጋምኤና። እብራ. 10:37
4 “በአ፥ እ ኦቶረቴዳ፤ አ ቆፋ ኡባይካ ሱረ ግደና፤ ሽን ጽሉ ባረ አማኑዋን ደአና።”ሮመ 1:17፤ ጋላ. 3:11፤ እብራ. 10:38
ናጋራንቻቱዋ ቦላ አꬌዳ ፕርዳ
(2:5-20)
5 ዱረተꬃይ አሳ ጭሜ፤ ኦቶራንቻ አሳዉ ሸምፖ ባዋ። እ ዱፉዋዳን ዮራ ግድያ ድራዉነ ሀይቁዋዳን ካል ኤረና አሳ ግድያ ድራዉ፥ ካዉተꬃቱዋ ኡባ ባረዉ ሺሼ፤ አሳ ኡባካ ባረዉ ኦሞዴ።
6 “አሳይ ባረንታ ኦሞዴዳዋንታ፥ ‘ባረዋ ግደና ሚሻ ሺሺደ ዳጋይያዎነ አጩዋ አሳፐ ዎልቃን አኬዳ ማጹዋን ዱረትያዎ አየሮ! ሀዌ ሀዋዳን ሀኒደ፥ አዉደ ጋካናዉ ደአኔ?’ ያግ ቅሊጫናነ ቶቻና። 7 ኔን ኡንቱንቶ ታልኤዳ አሳቱ ነ አኬከናን ነ ቦላ ደንዲደ፥ ኔና ኮኮርሳና። ሄዋፐ ጉይያን፥ ኡንቱንቱ ነ ማጹዋ ኡባ ቦንቃናዋንታ። 8 ኔን ጮራ ያራ ማጹዋ ቦንቄዳ ድራዉ፥ ኡንቱንቱፐ አቴዳዋንቱ ነ ማጹዋ ቦንቃናዋንታ። አያዉ ጎፐ፥ ነ ዳሮ አሳ ሱꬃ ጉሳዳ፤ ቃይ ሳኣ ኡባን፥ ካታማቱዋ ቦላነ ኡንቱንቱን አሳ ቦላካ ሱገꬃ ኦሱዋ ኦꬃዳ።
9 “መቱ ኔና ጋከናዳን፥ ነ ጎልያ ꬎቃሳን ኬጻናዉ ናቁዋን ሚሻ ሺሽያዎ፥ ነዉ አየሮ! 10 ዳሮ አሳ ነ ገናደ ꬋይሴዳዋ ጋሱዋን ነ ሶ አሳ ካዉሻዳ፤ ኔን ነ ቦላ ባየꬃ አሃዳ። 11 ሀራይ አቶ ነ ጎልያ ግምቢያ ሹቻይካ ነ ቦላ ዋሳና፤ ቱሳቱካ ዋሱዋ አላናዋንታ።
12 “ካታማ ማካላን ባሲደ፥ አሳ ሱꬃን ኬጽያዋንቶ፥ ህንተዉ አየ አና! 13 ኡባፐ ዎልቃማ መꬍና ጎዳይ አሳይ ኦꬅያዌ ኡባይ ታማ ካተ ግዳናዳን፥ ቃይ ካዉተꬃቱ ኡባይ ዳቡርያዌ ጮ መላ ግዳናዳን፥ ቆፋ ቃች ዎꬄዳ። 14 አያዉ ጎፐ፥ ሃꬃይ አባ ካምያዋዳን፥ መꬍና ጎዳ ቦንቹዋ ኤራተꬃይ ሳኣ ኩማና። ኢሳ. 11:9
15 “ባረ ሾሮ አሳይ ካሎትና በአና ጊደ፥ ኢታባ ጉጃንነ ኡንቱንታ ኡሺደ ማꬆይያ ኡራዉ አየ አና! 16 ኔን ቦንቹዋ ድራዉ ካዉሻ ማያና። ሀእ ስም ላ ኔኖ፥ ኡሻ! ኡሻደ ጋንድጋራ! መꬍና ጎዳዉ ኡሸቻ ኩሽያን ደእያ ጹአይ ኔኮ ያና፤ ነ ቦንቹ ካዉሻዉ ላመታና። 17 ኔን ሊባኖሳ ꬋይሴዳዋዳን፥ ኔንካ ꬋያና። ኔን ዶአቱዋ ዎራ ዉርሳዳ፤ ሀእ ቃይ ኡንቱንቱ ኔና ያሽሳና። አያዉ ጎፐ፥ ነ ዳሮ አሳ ሱꬃ ጉሳዳ፤ ቃይ ሳኣ ኡባን፥ ካታማቱዋ ቦላነ ኡንቱንቱን ደእያ አሳ ቦላካ ሱገꬃ ኦሱዋ ኦꬃዳ።
18 “እ ባረዉ ኤቃይ አያ ማዲ? አ አሳይ ጊግሴዳ ግደኔ? ዎርዱዋፐ አትና፥ አን ሀራባይ አያይነ ቤተና። ያትና፥ አ መꬌዳ ብታኒ ሀ አይነ ሃሳየና ኤቃ አማንያዌ አ አያ ማዳናሴ? 19 ምꬃፐ ማሰቴዳዋ ‘ቤጎታ!’ ግያዎ፥ ቃይ ሹቻፐ ማሰቴዳ ዱድያ፥ ‘ደንዳ ኤቃ!’ ግያዎ፥ ነዉ አየ አና! እ ዎን ነዉ አየንቶ ቆንጭሳናዉ ዳንዳዪ? በአ፥ እ ዎርቃንነ ብራን ሼሼዳዋ፤ አዉ ሸምፑ ባዋ።
20 “ሽን መꬍና ጎዳይ ባረ ጌሻ ጌሻ ጎልያና። ሄዋ ድራዉ፥ ቢታን ሳኣን ደእያ አሳይ ኡባይ አ ስንꬃን ጮኡ ጎ” ያጌዳ።