1 ትምቢትያ ኦድያ እምባቆም ማዝሙርያዳን የጺደ፥ ዎሴዳ ዎሳይ ሀዋ፦

2 አቤት መꬍና ጎዳዉ፥ ኔን ካሰ ኦꬄዳዋ ታን ስሳደ ያያድ። አቤት መꬍና ጎዳዉ፥ ኑ ዎድያንካ ሄ ኦሶቱዋ ዛረꬃደ ኦꬃ፤ ኡንቱንቱ ኑ ዎድያንካ ኤረትኖ። ኔን ሀንቀꬅያ ዎደ ነ ማሮታ ቆፓ።

3 ጾሳይ ተማና ግያ ሳኣፐ ዬ፤ ሄ ጌሻይ ፓራና ደርያፐ ዬ። አ ቦንቹ ሳሉዋ ካሜዳ፤ አ ጋላታይካ ሳኣ ኩሜዳ። 4 አ ጶለꬃይካ አዋ ፖኡዋ ማላ፤ አ ዎልቃይ ቆሰት ኡቴዳ አ ኩሽያፐ ፖዡ ግያ ፖኡ ከሴ። 5 ጾሳይ ኢታ ሀርግያ ባረፐ ስንꬃዉ ኪቴ፤ ሀይቁዋካ ባረ ጌዱዋ ካለꬄ። 6 እ ኤቂደ ቢታ ቃꬄዳ። ቃይ እ ጼሊደ ካዉተꬃቱዋ ኮኮርሴዳ። መꬍናደፐ ደኤዳ ደረቱ መኤረቴድኖ፤ ቃይ እ ኡንቱንቱ ቦላን ሀመትያ በኒደፐ ደኤዳ ደረቱካ ላለቴድኖ። 7 ታን ቶጵያ አሳይ ቱጋትሽን በኣድ፤ ምድያማ ቢታ አሳይካ ኮኮርሺና በኣድ።

8 አቤት መꬍና ጎዳዉ፥ ኔን አያዉ ሀንቀታዲ? ሻፋቱ ኔና ሀንቀꬅሴድኖ? ዎይ አባ ቦላ ሀንቁዋ ኤጻ ከሳዲ? ቱይት፥ ኔን ነ ፓራቱዋነ ነ ፓራ ጋረቱዋ ቶጌዳዌ ነ አሳዉ ጾኑዋ እማናሳ። 9 ኔን ነ ዎንዳፍያ ጊግሳዳ፤ ፖꬃቱዋ ዱካናዉ ዳፋዳ። ቢታ ጳልቃደ ሃꬃ ከሳዳ። 10 ደረቱ ኔና በኢደ፥ ያሻዉ ኮኮሬድኖ፤ ሃꬃ ክጻይካ አꬌዳ። ቃይ ሃꬃ ጪማቱካ ዋሲኖ፤ ዋሲደ ባረንቱ ዳምባላ ሃ ሃ ዳርሴድኖ። 11 እ ጾንጊደ የዴዳ ፖꬃቱ ፖኡዋንነ ነ ቶራቱዋ ጶለꬃን አዋይነ አግናይ ባረንቱ ደእያ ሳን ደእያ ሳን ኤቄድኖ።

12 ኔን ሀንቀታደ ቢታ ኡባን ዩያዳ፤ ካዉተꬃቱዋካ ሀንቁዋን የꬋዳ። 13 ኔን ነ አሳ አሻናዉነ ነ ኦከቴዳዋ አሻናዉ ከሳዳ፤ ኢታቱዋ ካፑዋ ሾጫዳ፤ አ ማዩዋ ቃራደ አ ካሎ ጺራ አሻዳ። 14 አ ኦላንቻቱዋ ጋዳዋ ኔን አ ቶራን አ ጫዳዳ። ኡንቱንቱ ኑና ላላናዉ ጎትያዳን ዪኖ፤ መቶታንቻካ ጌማን ምታናዉ ዶሲኖ። 15 ኔን ነ ፓራቱዋን አባ የꬋደ አꬍያ ዎደ፥ ዳሮ ሃꬃይ ሆሙዋ ጎፑ ጌ።

16 ታን ሀዋ ኡባ ስስና፥ ታ ቦላይ ጋጅ ጋጄዳ፤ ታ መተርሻይ ኮኮሬዳ፤ ታ መቀꬃይካ ዎቄዳ፤ ታ ገደቱካ ቃይ ጉንዴድኖ። ኑና ቱጋይያዋንታ ጾሳይ ሙራና ጋካናዉ፥ መቱዋ ጋላሳ ታን ዳንዳያን ናጋና።

17 ባላስያ ግያ ምꬃይ አይፋና ꬋዮፐካ፥ ዎይንያ ቱራን አይፊ ꬋዮፐካ፥ ዎጋራይ አይፈናን እጾፐካ፥ ጋዲ ካꬃ ሞከናን እጾፐካ፥ ስኩዋን ዶርስ ꬋዮፐካ፥ ቃይ አቁዋን መሂ ꬋዮፐካ፥ 18 ሄዌ ኡባይ ꬋዮፐካ፥ ታን መꬍና ጎዳን ናሸታና፤ ታና አሽያ መꬍና ጎዳን ታን ናሸቻ ፖጩ ጋና። 19 ኡባ ሞድያ መꬍና ጎዳይ ታዉ ዎልቃ፤ 2 ሳሜላ 22:34፤ ማዝ. 18:33 ታ ገድያ ጋራ ገድያዳን ምንሴ፤ ታን ꬎቃ ሳአቱዋን ሄመታናዉ ታና ዳንዳይሴ።

(የጽያዋንታ ካለꬅያዋ ሀሳይስያዋ: ሀ ማዛሙሪ ዲጽያዋ ዲጺደ የጽያ ማዝሙርያ።)