1 አሞና ናአይ እዮስያስ ይሁዳን ካተቴዳ ዎደ ሶፎናሳኮ ዬዳ መꬍና ጎዳ ቃላይ ሀዋ። ሶፎናስ ኩሻ ናኣ፤ ኩሽ ጋዳልያ ናኣ፤ ጋዳሊ አማርያ ናኣ፤ አማር ካትያ ህዝቂያሳ ናኣ። 2 ካታ. 22:1—23:30፤ 2 ኦዱዋ 34:1—35:27

2 መꬍና ጎዳይ ሀዋዳን ያጌ፤ “ታን ጋድያ ቦላን ደእያዋ ኡባ ሙልጹ ኦꬃደ ꬋይሳና። 3 ታን አሳነ መህያ፥ ሳሉዋ ካፎቱዋነ አባ ሞለቱዋካ ꬋይሳና። ቃይ ታን ኢታ አሳቱዋ አꬃ የጋና፤ አሳ ዛርያካ ቢታ ቦላፐ ꬋይሳና” ያጌ መꬍና ጎዳይ።

4 ቃይካ ጾሳይ ሀዋዳን ያጌ፤ “ታን ይሁዳንነ የሩሳላመን ደእያ ኡባ ሙራናዉ ታ ኩሽያ ደንꬃና፤ ባኣላ ግያ ኤቃዉ ጎይንያ አቴዳዋንታነ አዉ ኦꬅያ ቄሳቱ ዋ ሄ ሳኣፐ ሙልጹ ኦꬃደ ꬋይሳና። 5 ጎልያ ሁጲያ ደምባዪደ ኦꬄድኖ፤ ሄዋ ቦላ ከሲደ፥ አዋዉ፥ አግናስነ ጾልንተቶ ጎይንያዋንታ ታን ꬋይሳና። መꬍና ጎዳዉ ጎይኒድነ አ ሱንꬃን ጫቂደ፥ ቃይ ሞሎካ ግያ ኤቃ ሱንꬃን ጫቂያዋንታ ታን ꬋይሳና። 6 መꬍና ጎዳ ካልያዋ አጊደ ጉየ ስሜዳዋንታ፥ መꬍና ጎዳ ኮይቤናዋንታነ ኡንቱንታ ካለꬃናዳን ኦችቤናዋንታካ ታን ꬋይሳና” ያጌ።

7 መꬍና ጎዳ ጋላሳይ ማቴዳ ድራዉ፥ ኡባ ሞድያ መꬍና ጎዳ ስንꬃን ጮኡ ጊተ! መꬍና ጎዳይ ባረ አሳ ያርሾ ጊጌዳ መህያዳን አꬅ እማናዉ ጊግሴዳ፤ ቃይ ይሁዳ ቦንቂያ ሞርከቱዋካ ዱማዪደ ጊግሴዳ።

8 መꬍና ጎዳይ ሀዋዳን ያጌ፤ “ታ አሳ አꬃ እምያ ጋላስ ካፓቱዋ፥ ካትያ ናናቱዋነ አላጋ ቢታ ዎጋ ካልያዋንታ ኡባቱዋ ታን ሙራና። 9 ሄ ጋላስ አላጋ ቢታ አሳቱዋዳን፥ ኤቃዉ ጎይንያዋንታነ ባረንቱ ጎዳ ጎልያ ማካላንነ ጭሙዋን ኩንꬅያዋንታ ታን ሙራና” ያጌ።

10 መꬍና ጎዳይ ሀዋዳን ያጌ፤ “ሄ ጋላስ የሩሳላመ ድርሳን ሞልያ ፐንግያ ማታን ደእያ ኦራꬃ ካታማ ሻኩዋን ዋሱነ ዬኩ ስሰታና፥ ዞዘቱዋ ቦላንካ ꬎቁ ጌዳ ዶምኤꬃ ኮሻይ ጊሩማና። 11 ህንተኖ፥ ካታማዉ ህርክ ባጋና ደእያዋንቶ፥ ዬክተ፤ አያዉ ጎፐ፥ ሄዋን ዛልእያ ኡባቱ ꬋዬድኖ፤ አሌቆ ሀንያ ብራ ዛልእያዋንቱካ ሀይቂ ዉሬድኖ። 12 ሄ ጋላስ ታን የሩሳላመ ግዱዋ ጾምፕያን ኮያና፤ ህርግ ባይናን ዎፑ ግ ኡቲደ፥ ባረንቱ ዎዛናን፥ ‘መꬍና ጎዳይ ሎኦባነ ኦና፤ ኢታባነ ኦና’ ያግያዋንታ ታን ሙራና። 13 ኡንቱንቱ ማጹ ቦንቀታናዋ፤ ኡንቱንቱ ጎሊካ ኮለታና። ኡንቱንቱ ጎልያ ኬጻና፥ ሽን ሄ ጎልያን ደእክኖ፤ ቃይ ዎይንያ ቱራቱዋካ ቶካና፥ ሽን ሄ ዎይንያ ኤሳ ኡሽክኖ” ያጌ።

14 መꬍና ጎዳ ዎልቃማ ጋላሳይ ማቴዳ፤ ቃይ ሎይꬅ ኤሌሊደ ዬ። መꬍና ጎዳ ጋላሳይ ጫሞ ጋላሳ። ሄ ጋላስ ምኖ ኦላንቻቱካ ዋሱዋ ጹልሳና። 15 ሄ ጋላሳይ ሀንቁዋ ጋላሳ፥ መቶነ ኡንኦ ጋላሳ፥ ባሻነ ኮለꬃ ጋላሳ፥ ꬉማነ ሻኖቻ ጋላሳነ ሻርያነ ባራ ꬉማ ጋላሳ ግዳናዋ። 16 ሄ ጋላሳይ ዩሹዋ ድረቴዳ ካታማቱዋ ቦላነ አዱሳ ግምበቱዋ ቦላ ኦላ ማላካታይ ፑነትያ ጋላሳነ ኦላንቻቱ ኦላ ኮሻይ ስሰትያ ጋላሳ ግዳናዋ።

17 መꬍና ጎዳይ ሀዋዳን ያጌ፤ “ኡንቱንቱ ጾሳ ናቄዳ ድራዉ፥ ቆቅያዳን ታታፋና ጋካናዉ፥ አሳቱዋ ቦላን ታን መቱዋ አሀና። ኡንቱንቱ ሱꬃይ ድኡዋዳን ጎጋና፤ ኡንቱንቱ አሃይ ፕቱዋዳን ኦለታና። 18 መꬍና ጎዳ ሀንቁዋ ጋላስ ኡንቱንቱ ብራ ግድና፥ ኡንቱንቱ ዎርቃይካ ኡንቱንታ አሻናዉ ዳንዳየና። እ ሳኣን ደእያ ኡባ አኬከናን ደእሽን፥ ዉርስ ꬋይሳና፤ ቢታ ኡባይካ አ ሀንቁዋ ታማን ሜተታና” ያጌ።