2
ጎዳይ ባረ አሳዉ እሜዳ ምንꬁዋነ አንጁዋ ህዶታ
(2:1-19)
1 ሄ ላይꬃን ላፑንꬃ አግናን ላታማነ እተንꬃ ጋላሳን መꬍና ጎዳ ቃላይ ትምቢትያ ኦድያ ሃገ ባጋና ሀዋዳን ያጊድ ዬዳ፤ 2 “ሳላትያላ ናኣ፥ ይሁዳ ሞድያ ዛሩባቤላዉ፥ እዮጸዴቃ ናኣ፥ ቄስያ ኡባቱ ካፑዋ ኢያሱዉነ ሀራ አሳዉ ሀዋዳን ያጋደ ኦዳ፤ 3 ‘ሀ ጌሻ ጎልያ ቦንቹ ካሰ አያ ማለንቶ በኤዳ አሳፐ አቴዳዌ ህንተ ግዶን ደኢ? ሀቼ ህንተ አ ጼልያ ዎደ፥ ዋን ኡቴዴ? ህንተ አይፍያን እ ባይናዋ ማላቴ ግደኔ?እዝራ 3:12
4 “ ‘ዛሩባቤላ፥ ሀእ ምና! ታን መꬍና ጎዳይ ሀዋ ኦዳይ። እዮጸዴቃ ናአዉ፥ ቄስያ ኡባቱ ካፖ ኢያሱ፥ ኔንካ ምና! ቢታን ደእያ አሳ ኡባዉ፥ ህንተካ ምንተ! ምኒደ ኦꬅተ፤ አያዉ ጎፐ፥ ታን ህንተናና ደአይ። ታን ኡባፐ ዎልቃማ መꬍና ጎዳይ ሀዋ ኦዳይ። 5 ህንተ ግብጼፐ ከስያ ዎደ፥ ታን ህንተናና ጫቀቴዳ ጫቁዋዳን፥ ታ አያናይ ህንተናና ደእያ ድራዉ ያዮፕተ!ከሳ 29:45-46
6 “ ‘ቃይካ ታን ኡባፐ ዎልቃማ መꬍና ጎዳይ ሀዋ ኦዳይ። ታን ማታ ዎድያን እት ገደ ጉጃደ፥ ሳሎቱዋነ ሳኣ፥ አባነ መላ ቢታካ ቃꬃና።እብራ. 12:26 7 ካዉተꬃቱዋ ኡባካ ቃꬃና፤ ካዉተꬃቱዋ ኡባን ደእያ ዱረታይ ሃ ያናዳን ኦꬃና። ታን ኡባፐ ዎልቃማ መꬍና ጎዳይ ሀ ጌሻ ጎልያ ቦንቹዋን ኩንꬃና። 8 ብራይ ታዋ፤ ዎርቃይካ ታዋ። 9 ኮይሮዋ ቦንቹዋፐ ሀ ላኤንꬆ ጌሻ ጎልያ ቦንቹ ዳራና፤ ታን ኡባፐ ዎልቃማ መꬍና ጎዳይ ሀ ሳኣን ሳሮተꬃካ እማና’ ያጋደ ኦዳ” ያጌዳ መꬍና ጎዳይ።
10 ዳርዮሰ ካተቴዳ ላኤንꬆ ላይꬃን፥ ኡዱፑንꬃ አግናን ላታማነ ኦይደንꬆ ጋላሳን መꬍና ጎዳ ቃላይ ትምቢትያ ኦድያ ሃገ ባጋና ሀዋዳን ያጊድ ዬዳ፤ 11 “ኡባፐ ዎልቃማ መꬍና ጎዳይ ሀዋዳን ያጌ፤ ‘ህጊ ዋግንቶ ኤራናዉ አነ ቄሳቱ ዋ ሀዋ ኦቻ: 12 እት ኡራይ ያርሾ ጌሽ ዎꬄዳ አሹዋ ባረ አፍላ ጼራን ጻጽ አኪደ አፍሽን፥ ሄ አፍላ ጼራይ ኡክꬃ፥ ዎይ ዎጽያ፥ ዎይ ዎይንያ ኤሳነ ዛይትያ፥ ዎይ ሀራ አያ ቆሞ ቁማነ ቦቾፐ፥ ሄ ቦሸቴዳ ቁማይ ቱሙ ጌሻ ግዳናዉ ዳንዳዪ?’ ያጋ” ያጌዳ።
ቄሳቱ፥ “ግዳናዉ ዳንዳየና” ያጊደ ዛሬድኖ።
13 ሀጊ ቃይካ፥ “አሃ ቦቺደ ቱኔዳ እት ኡራይ ሀዋንቱፐ እት ቆሞ ቁማነ ቦቾፐ፥ ሄ ቁማይ ቱሙ ቱናኔ?” ያጊደ ኦቼዳ። ፓይ. 19:11-22
ቄሳቱ፥ “ኤ ቱናና” ያጊደ ዛሬድኖ።
14 ያትና፥ ሀጊ ዛረꬂደ፥ “መꬍና ጎዳይ ሀዋዳን ያጌ፤ ‘ሀ አሳይነ ሀ ካዉተꬃይ ታ ስንꬃን ሄዋካ ማላ፤ ኡንቱንቱ ኦꬅያ ኦሱነ ኡንቱንቱ ሺሽያ ያርሹ ኡባይካ ሄዋካ ማላ ቱና’ ያጌ” ያጌዳ።
ጾሳይ ባረ አሳ አንጃና
15 ጾሳይ፥ “ሀቼፐ ዶሚደ፥ ህንተ ቦላን ጋኬዳዋአ አኬክተ! መꬍና ጎዳ ጌሻ ጎልያ ግምበቱዋ ዶማናፐ ካሰ፥ 16 ህንተ ላኡ ኩንታለ ካꬃ አካና ጊደ፥ ካꬃ ዎꬆሳ ቤድታ፤ ሽን እት ኩንታለ ጻላላ ደሜድታ። ቃይ እት ጼቱ ሊትሮ ዎይንያ ኤሳ አካናዉ ዎይንያ ጉምእያ ኦላኮ ቤድታ፤ ሽን ህንተ መጽ ኦይታሙ ሊትሮ ጻላላ ዎይንያ ኤሳ ደሜድታ። 17 ታን ህንተ ኩሺ ኦꬄዳ ኦሱዋ ኡባ ቦላን መልስያ ጫርኩዋ፥ ካꬃ ሀርግያነ ሻቻ የዳደ ꬋይሳድ። ሽን ህንተ ሀ ኡባንካ ታኮ ስምበይክታ” ያጌ መꬍና ጎዳይ።
18 “ሀቼ ጋላሳፐ፥ ሀ ኡዱፑንꬃ አገናን ላታማነ ኦይደንꬃ ጋላሳፐ ዶሚደ፥ አነ አኬክተ፤ ቃይ መꬍና ጎዳ ጌሻ ጎልያ ባሱ ባሰቴዳ ጋላሳፐ ዶሚደ ቆፕተ። 19 ሀእ ዘረꬃዉ ሀንያ ካꬃይ ህንተ ዬስያን ꬋዮፐ፥ ቃይ ዎይንያ ቱራይ፥ ባላስያ ጌተትያ ምꬃ፥ ሮማንያ ጌተትያ ምꬃነ ዎጋራ ዛይትያ ምꬃይካ ሀቼ ጋካናዉ አይፍያ አይፋና ꬋዮፐ፥ ሀቼፐ ዶማደ ታን ህንተና አንጃና” ያጌ።
ጾሳይ ዛሩባቤላዉ እሜዳ ህዶታ
(2:20-23)
20 ሄ አገናን ላታማነ ኦይደንꬆ ጋላሳን መꬍና ጎዳ ቃላይ ላኤንꬁዋ ሃገኮ ሀዋዳን ያጊድ ዬዳ፤ 21 “ይሁዳ ሞድያ ዛሩባቤላዉ ሀዋዳን ያጋደ ኦዳ፤ ‘ታን ሳሎቱዋነ ሳኣ ቃꬃና፤ 22 ካዉተꬃቱዋ አራታቱዋ አꬃ የጋና፤ ኡንቱንቱ ዎልቃ ꬋይሳና። ፓራ ጋረቱዋ ኡንቱንቱ ላግያዋንቱና አꬃ የጋና፤ ፓራቱነ ፓራ አሳቱካ ኡባይ ባረንቱ ግዶን ሀይቀታና። 23 ታ ቆማዉ፥ ሳላትያላ ናአዉ ዘሩባቤላ፥ ታን ኡባፐ ዎልቃማ መꬍና ጎዳይ ኔና ሄ ጋላስ አካደ ታ ማታፋ ምግዱዋ ማላ ኦꬃና። አያዉ ጎፐ፥ ታን ኔና ዶራድ’ ያጋደ ኦዳ” ያጌ ኡባፐ ዎልቃማ መꬍና ጎዳይ።