1 ካቲ ዳርዮሰ ካተቴዳ ላኤንꬆ ላይꬅ፥ ኡሱፑንꬃ አግናን ኮይሮ ጋላስ መꬍና ጎዳ ቃላይ ትምቢትያ ኦድያ ሃገ ባጋና ሳላትያላ ናኣ፥ ይሁዳ ጋድያ ሞድያ ዛሩባቤላኮነ እዮጸዴቃ ናኣ፥ ቄሰ ኡባቱ ካፑዋ ኢያሱኮ ዬዳ፤ እዝራ 4:24—5:2፤ 6:14 2 ኡባፐ ዎልቃማ መꬍና ጎዳይ፥ “ሀዌ አሳይ፥ ‘መꬍና ጎዳ ጌሻ ጎልያ ዛረꬂደ ኬጽያ ዎዲ ብሮ ጋክቤና’ ያጌ።”

3 ያትና፥ መꬍና ጎዳ ቃላይ ትምቢትያ ኦድያ ሃገ ባጋና፥ 4 “ታ አሳዉ፥ ታ ጌሻ ጎሊ ኮለት ደእሽን፥ ህንተ ህንተ አሌቀቴዳ ጎለቱዋን ደአናዉ ሀዌ ህንተንቶ ዎዴየ?” ያጊድ ዬዳ።

5 ሄዋ ድራዉ፥ ኡባፐ ዎልቃማ መꬍና ጎዳይ፥ “አነ ህንተ ህንተና ጋኪደ ደእያዋ ቆፕተ። 6 ህንተ ዳሩዋ ዘሬድታ፤ ሽን ጉꬃ ሺሼድታ። ሚታ፥ ሽን ካልክታ፤ ኡሺታ፥ ሽን አልክታ። ማዪታ፥ ሽን ህንተና ሆኤና፤ ድርጉዋ አክያዌ ዳከቶ ቃርጪትያን የጋናዉ አኬ” ያጌ።

7 ቃይካ ኡባፐ ዎልቃማ መꬍና ጎዳይ፥ “አነ ህንተ ህንተና ጋኪደ ደእያዋ ቆፕተ። 8 ስም ደርያ ፑደ ከሲደ፥ ምꬃ ቃንጺደ አህተ፤ ጌሻ ጎልያ ዛረꬂደ ኬጽተ። ያቶፐ ታን አን ናሸታናነ ቦንቼታና” ያጌ መꬍና ጎዳይ።

9 ቃይካ ኡባፐ ዎልቃማ መꬍና ጎዳይ፥ “ህንተ ዳሮ ካꬃ ሺሻናዉ ሀልቼድታ፤ ሽን ጉꬃ ግዴዳ፤ አካ ህንተ ጎለ ገልሴዳ ዎደ፥ ታን ፑንያዋን ꬋይ አጌዳ። ሀዌ አያዉ ሀኔዴ? ታን ሀዋ ኦꬄዳዌ፥ ህንተ ኡባይካ ህንተ ጎልያ ጎልያ ኦሶ ዎጽሽን፥ ታ ጎሊ ኮለቲደ አቴዳ ግሻሳ። 10 ሄዋ ድራዉ፥ ቦላ ሳሉ እራ እመናን፥ ቢታይካ ካꬃ ሞከናን እጼድኖ። 11 ቃይ ቢታነ ደረቱዋ ቦላ፥ ካꬃ ቦላ፥ ዎይንያ ቱራነ ዛይትያ ዎጋራቱ ቦላ፥ ቢታይ ፑደ ሞክያዋ ቦላ፥ አሳነ መህያ ቦላነ ህንተ ዳቡሪደ ኦꬄዳዋ ኡባ ቦላ ታን እራ ꬋይሳድ” ያጌ።

12 ሄዋፐ ጉይያን፥ ሳላትያላ ናአይ ዛሩባቤል፥ እዮጸዴቃ ናአይ፥ ቄስያ ኡባቱ ካፑ ኢያሱነ ሀራ አሳይ ኡባይ መꬍና ጎዳ ባረንቱ ጾሳ ቃላዉነ መꬍና ጎዳይ ኡንቱንቱ ጾሳይ ትምቢትያ ኦድያ ሃገ ባጋና ኪቴዳ ቃላዉ አዛዘቴድኖ፤ አሳይካ መꬍና ጎዳዉ ያዬድኖ። 13 ያትና፥ መꬍና ጎዳይ ኪቴዳ ሀጊ አሳ፥ “አሳዉ፥ መꬍና ጎዳይ ህንተና፥ ‘ታን ህንተናና ደአይ’ ያጌ” ያግ መꬍና ጎዳ ኪታ አሳዉ ኦዴዳ።

14 ያትና፥ መꬍና ጎዳይ ሳላትያላ ናኣ፥ ይሁዳ ቢታ ሞድያ ዛሩባቤላ፥ እዮጸዴቃ ናኣ፥ ቄስያ ኡባቱ ካፑዋ ኢያሳነ ሀራ አሳ ኡባ ደንꬄዳ፤ ኡንቱንቱ ዪደ፥ ኡባፐ ዎልቃማ መꬍና ጎዳ፥ ባረንቱ ጾሳ ጌሻ ጎልያ ኬጹዋ ዶሜድኖ። 15 ሀዌ ሀኔዳዌ ካቲ ዳርዮሰ ካተቴዳ ላኤንꬆ ላይꬃን፥ ኡሱፑንꬃ አግናን ላታማነ ኦይደንꬆ ጋላሳና።