1 ማካላንቻትዉ፥ ቱኔዳንዉነ ባረ አሳ ቱጋዬዳ የሩሳላመ ካታማትዉ አየ አና! 2 እዛ ኦናነ ስሱኩ፤ ሴርና ስሙኩ፤ መꬍና ጎዳን አማነቱኩ፤ ባረ ጾሳኮካ ሺቁኩ። 3 እዝ ግዶን ደእያ ካፓቱ ጉድያ ጋሞቱዋ ማላ፤ ዳናቱካ ዎንትዉ አሸናን ደሜዳዋ ኡባ ዉርስ ም ድግያ ኦማርሳ ዋንግሬሎቱዋ ማላ። 4 እዝን ናባቱ ኦቶራንቻነ ገናንቻ። እዝ ቄሳቱ ካ ጌሻባ ቱንስያዋንታ፤ ቃይ ኡንቱንቱ ጾሳ ህግያ ባረንቶ እንጀትያዋዳን፥ ምርቂደ ብሊኖ። 5 ሽን እዝ ግዶን ደእያ መꬍና ጎዳይ ጽሉዋ፤ እ ባላባ ኦና፤ ዎንትና ዎንትናካ እ ባረ ጽሎ ፕርዳ ፕርዴ፤ አይ ዎንታንካ አግ ኤረና። ግዶፐነ፥ እዝን ደእያ ማካላንቻይ አይነ ዬላ ኤረና።

6 ጾሳይ ሀዋዳን ያጌ፤ “ታን ካዉተꬃቱዋ ꬋይሳድ፤ ኡንቱንቱ ግምበቴዳ ሳአቱካ ኮለት ክቼድኖ። ኡንቱንቱ ካታማቱዋ እት አሳይነ ደኤና ኦና ቢታ ኦꬃድ፤ ኦገቱካ ኦንነ ሄዋና አናዋ ግዴድኖ። 7 ታን ሀዋ ኡባ የሩሳላመዉ ኦꬃደ፥ ‘ስም ታ አሳይ ታና ቦንቻና፤ ታን ሴርያ ሴራካ አካና፤ ታን አዛዜዳዋካ ዶገና’ ያጋድ። ሽን ኡንቱንቱ ካሰዋፐካ ያ ያ ባረንቱ ኦሱዋን ቱኒደ ቤድኖ” ያጌ።

8 መꬍና ጎዳይ ሀዋዳን ያጌ፥ “አነ ታን ፕርድያ ጋላሳይ ጋካናዉ፥ ታክ ጊተ። አያዉ ጎፐ፥ ታን አሳቱዋነ ካዉተꬃቱዋ ሺሻናዉ ቃቻድ፤ ሺሻደ ታ ሀንቁዋ ሱሉዋ ኡንቱንቱ ቦላ ጉሳና። ሳአይ ሙለናካ ታ ሀንቁዋ ታማን ጹገታና።

9 “ሄ ዎደ ታን አሳ ኡባይ ጌሻ ሃሳያ ሃሳያና ማላ ኦꬃና፤ ያትና፥ ኡንቱንቱ ኡባይካ መꬍና ጎዳ ሱንꬃ ጼጋናነ እትፐ አዉ ኦꬃና። 10 ላለቴዳ ታ አሳቱ፥ ታዉ ቱሙ ጎይንያዋንቱ ቶጵያ ሻፋቱዋፐ ሄፍንꬃ ባጋፐ ታዉ እሞታ አሀና። 11 ሄ ዎደ ህንተ ታ ቦላ ማካሊደ ኦꬄዳ ኦሶቱዋ ጋሱዋን ዬላትክታ፤ አያዉ ጎፐ፥ ኦቶረትያነ አይያዋንታ ታን ህንተ ግዶፐ ድጋ ድጋና። ቃይ ህንተካ ሀዋፐ ስንꬃን ታ ጌሻ ደርያን ኦቶረትክታ። 12 ታን ህንተ ግዶፐ ባረንቱ ሁጲያ ካዉሽያዋንታነ ዝቂ ኦꬅያ አሳቱዋ አሻና፤ ኡንቱንቱካ መꬍና ጎዳ ሱንꬃን አማነትያዋንታነ ታፐ ማዱዋ ኮይያዋንታ ግዳና። 13 እስራኤልያ አሳፐ አቴዳዋንቱ ኦ ቦላነ ኢታባ ኦꬅክኖ፤ ዎርዱዋ ሃሳይክኖ፤ ኡንቱንቱ እንጻርሳንካ ጭሙ ቤተና። ሄዋ ግሻዉ፥ ኡንቱንቱ ሄመታናነ አላጻና፤ ኡንቱንታ ያሽስያባይካ ደኤና” ያጌ። ሳፃ 14:5

14 ጽዮነ ናቴ፥ ማዛሙርያ የጻ! እስራኤልያ አሳዉ፥ እልልተ! የሩሳላመ ናቴ፥ ነ ፖሎ ዎዛናፐ ናሸታ፤ ሀሹካ ጋ! 15 መꬍና ጎዳይ ህንተ ቦላ ፕርዴዳ ፕርዳ አጌዳ፤ ህንተ ሞርከቱዋካ ድጌዳ። መꬍና ጎዳይ፥ እስራኤልያ ካቲ፥ ህንተ ግዶን ደኤ፤ ሀዋፐ ስንꬃናዉ ህንተና ያሽስያዌ ባዋ። 16 ሄ ጋላስ የሩሳላመባይ ሀዋዳን ያገታና፤ “ጽዮኔ፥ ያዮፓ! ነ ኩሸቱካ አርጋጮፕኖ። 17 መꬍና ጎዳይ ነ ጾሳይ ነ ግዶን ደኤ፤ እ ነዉ ጾኑዋ እምያ ኦላንቻ። እ ኔናን ናሸታና፤ እ ባረ ሲቁዋን ኔና ኦራጽሳና፤ አሳይ ባላ ጋላስ የጽያዋዳን፥ እ ኔናን ናሸቴዳዋ ማዛሙርያ የጺደ በሳና” ያጋና።

18 ጾሳይ ሀዋዳን ያጌ፤ “ሀዋፐ ስንꬃናዉ ነ ቦላ ባሻይ ጋከናዳን ታን ኦꬃና፤ ነ ዬላካ ቁጫና። 19 በአ፥ ሄ ዎደ ታን ኔና ኡቁኔዳዋንታ ኡባ ሙራና። ታን ዎባቱዋ አሻና፤ ላለቴዳዋንታካ ሺሻና። ታን ኡንቱንቱ ካዉሻ ቦንቾ ላማና፤ ያቶፐ ሳኣን ደእያ አሳ ኡባ ማታን ኡንቱንቱ ሱንꬃይ ኤረቴዳዋ ግዳናዋ። 20 ሄ ዎደ ታን ህንተና ሺሻና፤ ታን ህንተና እትፐ ሺሻደ ዛራና፤ ያታደ ታን ህንተ አይፊ በእሽን ህንተና እሻልስያ ዎደ፥ ህንተ ሀ ሳኣን ደእያ አሳ ኡባ ማታን ቦንቼቴዳዋንታነ ኤረቴዳዋንታ ግዳንታ” ያጌ መꬍና ጎዳይ።