1 ኮይሮ ጫቆ ጾሳዉ ጎይንያ ዎጋይነ አሳይ ኦꬄዳ ጌሻ ጎሊ ደኤ። 2 አያዉ ጎፐ፥ ኮይሮ ዱንካኒ ኤቄዳ፤ አ ግዱዋን ሙቃዳ ዎꬅያዌ፥ ጻራጴዛይነ ጎዳ ስንꬃን ዎꬅያ ኡክꬃይ ደኤ፤ ሄ ሳአይ ጌሻ ሳ ጊደ ጼሴቴ። ከሳ 26:1-30፤ 25:31-40፤ 25:23-30 3 ላኤንꬆ ጋርዱዋ ጉየ ባጋና ኡባፐ አꬍያ ጌሻ ሳኣ ጌተትያ ዱንካኒ ደኤ። ከሳ 26:31-33 4 አ ግዱዋን እጻና ጩዋያናዉ ዎርቃፐ ኦꬄዳ ሳጽኒነ ኡባ ሳና ዎርቃን ሼሼዳ ቃላ ጫቁዋ ታቦታይ ደኤ። ሄ ቃላ ጫቁዋ ታቦታን ማናይ ደእያ ዎርቃ ጻሩ፥ አሮና ጻምአይ አጬዳዌነ ቃይ ሙሴ ህጊ ጻፈቴዳ ላኡ ማሰቴዳ ሹቻቱ ደኢኖ። ከሳ 30:1-6፤ 25:10-16፤ 16:33፤ ፓይ. 17:8-10፤ ዛረ. 10:3-5 5 ሄ ቃላ ጫቁዋ ታቦታፐ ቦላ ባጋና አቶ ግያ ሳኣ ቁምእያ ባረንቱ ቀፍያን ገንꬅያ ቦንቾ ክሩበቱ ደኢኖ፤ ሽን ሀ ኡባባ ሀእ ዉርስ ኦዳናዉ ዳንዳዮኮ። ከሳ 25:18-22

6 ሄዌ ሄዋዳን ጊግ ደእሽን፥ ቄሳቱ ኡባ ዎደ፥ ባረንቱ ኦሱዋ ኦꬃናዉ ኮይሮ ዱንካንያ ገሊኖ። ፓይ. 18:2-6 7 ሽን ቄሳቱዋ ኡባቱዋ ካፑዋ ጻላላይ ላኤንꬆ ዱንካንያ ላይꬃፐ እት ገደ ገሊደ ባረ ድራዉነ ኤረናን አሳይ ኦꬄዳ ናጋራ ድራዉ፥ ጾሳዉ ያርሽያ ሱꬃ አኪደ ገሌ። ዎጋ 16:2-34 8 ኮይሮ ዱንካኒ ኤቂደእሽን፥ ኡባፐ አꬍያ ጌሻ ሳኣ አፍያ ኦጊ ብሮ ዶየትቤናዋ ጌሻ አያናይ ሄዋን ኤርሴ።

9 ሄ ዱንካኒ ሀ ዎደዉ ሌምሱዋ፤ ሄዋ ግያዌ ጾሳዉ እምያ እሙነ ያርሹ ጎይንያዋ ሱረ ዎዛና ባላይ ባይናዋ ኦꬃናዉ ዳንዳይክኖ። 10 ሄዋንቱ ሙሳባ፥ ኡሻባነ ዱማ ዱማ ሜቻባ ኦድያ ካረ ባጋ ዎጋቱዋ፤ ኡንቱንቱ ኦራጽያ ዎዲ ጋካናዉ ኦሰትያ ዎጋቱዋ።

11 ሽን ክርስቶስ ሀዋን ደእያ ሎኦባዉ ቄሳቱዋ ኡባቱዋ ካፑዋ ግዲደ ይ ድጌዳ። እ ገሊደ ኦꬅያ ዱንካኒ ኡባፐ አꬍያዋነ ባላይ ባይናዋ፤ ቃይ ሄ ዱንካንያ አሳይ ኦꬅቤና፤ ሀ መቴዳ ሳኣባካ ግደና። 12 ክርስቶስ ኡባፐ አꬍያ ጌሻ ሳኣ ገልያ ዎደ፥ ዴሻ ሱꬃነ ጋሎ ማራ ሱꬃ ኦይቂደ ገልቤና፤ ሽን ባረ ሱꬃ ኦይቂደ፥ ኑዉ መꬍና አቶተꬃ እሚደ፥ ላኤናን እት ገደ ገሌዳ። 13 ቱኔዳ አሳ ቦላ ኮሩማ ሱꬃነ ዴሻ ሱꬃ ጫጫፊደ፥ ጉደቴዳ ኡሳት ብድንꬃ ቆልና፥ ሄ ኡራ ቱናተꬃፐ ጌሻናዉ ዳንዳዮፐ፥ ዎጋ 16:15-16፤ ፓይ. 19:9፣ 17-19 14 መꬍና ጌሻ አያና ባጋና ባላይ ባይና ያርሹዋዳን፥ ጾሳዉ ባረና እሜዳ ክርስቶሳ ሱꬃይ፥ ኑን ደኡዋ ጾሳዉ ኦꬃና ማላ፥ ካሰ ኑ ሀይቄዳ ኦሱዋፐ ኑ ሱረ ዎዛና ዎት ጌሻንዴሻ!

15 ሄዋ ድራዉ፥ ጾሳይ ጼሴዳዋንቱ እ እማና ጌዳ መꬍና አንጁዋ ላታና ማላ፥ ክርስቶስ ኦራꬃ ጫቆ ጋናቴዳ፤ ሄዌ ሀናና ዳንዳይያዌ፥ አሳይ ኮይሮ ጫቁዋፐ ጋርሳን ደኢደ ኦꬄዳ ባላ አይለተꬃፐ ከስያ ሀይቁ ደእያ ድራሳ።

16 አያዉ ጎፐ፥ ሀይቂያ ኡራይ ዎይቴዳዌ ደኦፐ፥ ሄ ኡራይ ሀይቆዌ ኤረታናዉ ኮሼ። 17 አያዉ ጎፐ፥ ዎይቴዳ ኡራይ ሀይቄዳ ዎደ፥ እ ዎይቴዳዌ ፖለቴዳ፤ ሄ ዎይቴዳዌ ፓጻ ደእሽን፥ አይነ ፖለተና።

18 ሀራይ አቶ፥ ኮይሮ ጫቁካ ሱꬃይ ባይናን እንጀትቤናዌ ሀዋሳ። 19-20 አያዉ ጎፐ፥ ህግያን ደእያ አዛዙዋ ኡባ ሙሴ አሳ ኡባዉ ኦዴዳ፤ ሄዋፐ ጉይያን፥ ጋሎ ማራ ሱꬃነ ዴሻ ሱꬃ፥ ሃꬃና፥ ዞኦ ዶርሳ እስክያናነ ህሶጵያ ግያ ምꬃ ቦንጭያና እትፐ አኪደ፥ “ሀዌ ህንተንታ ጾሳይ አዛዜዳ ጫቁዋ ሱꬃ” ያጊደ፥ ህግያ ማጻፋ ቦላነ አሳ ኡባ ቦላ ጫጫፌዳ። ከሳ 24:6-8 21 ሄዋዳንካ፥ ዱንካንያ ቦላነ ኦꬅያ ሚሻ ኡባ ቦላ ሱꬃ ሙሴ ጫጫፌዳ። ዎጋ 8:15 22 ህጊ ግያዋዳን፥ ቱሙካ አማሬዳዋፐ አትን፥ ኡባባይካ ሱꬃን ጌዬ፤ ሱꬃይ ጉካና ꬋዮፐ፥ አቶተꬃይ ባዋ።

23 ሄዋ ድራዉ፥ ሳሉዋን ደእያዋንታ ማላትያዋንቱ ሄ ያርሹዋን ጌያናዉ ኮሼ፤ ሽን ሳሉዋን ደእያዋንቱካ ባረንቱ ሁጰዉ ጌያናዉ አꬍያ ያርሹዋ ኡንቱንታ ኮሼ።

24 አያዉ ጎፐ፥ ክርስቶስ ቱሙ ጌሻ ሳን ሌምሰትያ አሳይ ኦꬄዳ ጌሻ ሳ ገልቤና፤ ሽን እ ሀእ ኑ ግሻታዉ ጾሳ ስንꬃን ቤታናዉ ያ ሳሉዋ ገሌዳ። 25 ቄሳቱዋ ኡባቱዋ ካፑ ላይꬃን ላይꬃን ባረ ሱꬃ ግደናዋ ኦይቂደ፥ ጌሻ ሳኣ ገልያዋዳን፥ ክርስቶስ ባረና ኡባደ ያርሻናዉ ገልቤና። 26 ሄዋ ግድንቶ፥ ክርስቶስ ሳአይ መቶደፐ ዶሚደ ዳሮ ገደ ዋየታናዉ ኮሼ፤ ሽን ሀእ ዎድያ ዉርሰꬃን ናጋራ ꬋይሳናዉ ባረና ያርሺደ፥ ላኤናን እት ገደ ቤቴዳ።

27 አሳይ ኡባይ እት ገደ ሀይቃናዉ በሴ፤ ሄዋፐ ጉይያን ጾሳይ አሳ ፕርዳና። 28 ሄዋዳንካ፥ ቃይ ክርስቶስ ዳሮ አሳ ናጋራ ꬋይሳናዉ እት ገደ ያርሸቴዳ፤ ቃይ እ ባረና ሎይꬅ ናግያዋንታ አሻናዉ ቤታናፐ አትን፥ ላኤንꬆ ናጋራ ቶካናዉ ቤተና። ኢሳ. 53:12