10
1 አያዉ ጎፐ፥ ህገዉ ያና ሎኦባ ኤሹዋ ጻላላይ ደኤ፤ አዉ ቱሙ ሌምሱ ባዋ። ኡባ ዎደ ላይꬃን ላይꬃን እት ማላ ያርሹ ያርሸቴ፤ ሄዋ ድራዉ፥ ህጊ ጾሳኮ ሺቅያ አሳ ሄ ያርሹዋን ባላይ ባይና አሳ ኦꬃናዉ ኡባካ ዳንዳየና። 2 ጾሳዉ ጎይንያ አሳይ ባረ ናጋራፐ ኡባና ጌዬዳባ ግድንቶ፥ ሱረ ዎዛናን ላኤንꬁዋ ናጋራ ቆፐና፤ ቃይ ያርሽያዋካ አጋና። 3 ሽን አሳይ ላይꬃን ላይꬃን ሄ ያርሹዋን ባረ ናጋራ ሀሳዬ። 4 አያዉ ጎፐ፥ ኮሩማ ሱꬃይነ ዴሻ ሱꬃይ ናጋራ ꬋይሳናዉ ኡባካ ዳንዳየና።
5 ሄዋ ድራዉ፥ ክርስቶስ ሀ አላምያ ያና ሀኒደ፥ ሀዋዳን ያጌዳ፤
“ኔን ያርሹዋነ እሙዋ ኮያበይካ፤
ሽን ታዉ ቦላ ጊግሳዳ። ማዝ. 40:6-8
6 ኔን ጹግያ ያርሹዋንነ፥
ናጋራ ያርሹዋን ኡባካ ናሸታካ።
7 ታን ሄ ዎደ፥ ‘ጻꬃ ማጻፋን ታባይ ጻፈቴዳዋዳንካ፥
ጾሳዉ፥ ታን ኔን ኮይያዋ ኦꬃናዉ ያድ’ ያጋድ”
ያጌዳ። 8 ያርሹ ያርሸታና ማላ፥ ህጊ አዛዝያዋ ግዶፐነ፥ ክርስቶስ ኮይሮ፥ “ኔን ያርሹዋ፥ እሞታ፥ ጹግያ ያርሹዋነ ናጋራ ያርሹዋ ኡባካ ኮያበይካ፤ ሄዋንቱን ናሸታካ” ያጌዳ። 9 ሄዋፐ ጉይያን ክርስቶስ፥ “ጾሳዉ፥ ታን ኔን ኮይያዋ ኦꬃናዉ ያድ” ያጌዳ። ሄዋ ድራዉ፥ ክርስቶስ ላኤንꬁዋ ኤሳናዉ ኮይሮዋ ꬋይሴ። 10 የሱስ ክርስቶስ ጾሳይ ኮዬዳዋ ኦꬄዳ ድራዉ፥ ባረ አሹዋ ላኤንናን እት ገደ ያርሼዳዋን ኑን ኑ ናጋራፐ ጌይ አጌዶ።
11 ቄሳቱዋ ኡባቱ ሀቼ ሀቼ ኤቂደ፥ ባረ ኦሱዋ ኦꬂኖ፤ ቃይ ናጋራ ꬋይሳናዉ ኡባካ ዳንዳየና እት ማላ ያርሹዋ ዛር ዛሪደ ያርሺኖ። ከሳ 29:38 12 ሽን ክርስቶስ ናጋራ ድራዉ፥ ኡባ ዎደዉ ግዴዳ እት ያርሹዋ ያርሺደ፥ ጾሳፐ ኡሸቻ ባጋና ኡት አጌዳ። ማዝ. 110:1 13 ጾሳይ ስንꬃፐ ክርስቶሳ ሞርከቱዋ ክርስቶሳዉ ገድያን የꬍያዋ ኦꬃና ጋካናዉ፥ ያን ናጌ። 14 አያዉ ጎፐ፥ እ እት ገደ ያርሼዳዋን፥ ናጋራፐ ጌዬዳዋንታ መꬍናዉ ባላይ ባይናዋንታ ኦꬄዳ።
15 ቃይ ጌሻ አያናይ ኑዉ ማርካቲደ፥ ሀዋዳን ያጌ፤
16 “ታን ሄ ጋላሳቱዋፐ ጉይያን፥
ኡንቱንቱና ጫቀትያ ጫቁ ሀዋ:
ታን ታ ህግያ ኡንቱንቱ ቆፋን ዎꬃና፤
ቃይ ኡንቱንቱ ዎዛናንካ ጻፋና”
ያጌ።ኤር. 31:33
17 ቃይ ሄዋፐ ጉየና፥
“ታን ኡንቱንቱ ናጋራነ፥
ኡንቱንቱ ማካላ ኦሱዋ ላኤንꬆ ሀሳይከ”
ያጌ።ኤር. 31:34 18 ጾሳይ ሄ ናጋራ አቶ ጌዳ ዎደ፥ ናጋራ ꬋይሳናዉ ሀዋፐ ስንꬃዉ ያርሹዋ ኮሸና።
ጾሳኮ ሺቃናዉ ኮሼ
19 ስም ታናዳን አማንያዋንቶ፥ ኑን የሱሳ ሱꬃ ባጋና ኡባፐ አꬍያ ጌሻ ሳኣ ገላናዉ ኑዉ ጻላተꬃይ ደኤ። 20 ክርስቶስ ኑዉ ኦራꬃ ኦግያነ ደኡዋ ኦግያ ጋርዱዋ ባጋና፥ ሄዋ ጉሳይ ባረ ቦላ ባጋና ዶዬዳ። 21 ኑዉ ጾሳ ጎለን ሱንቴዳ ዎልቃማ ቄሳይ ደእያ ድራዉ፥ 22 ኑን ሱረ ዎዛናና፥ ቱሙ አማኑዋና፥ ኢታ ዎዛናፐ ጌዬዳ ዎዛናናነ ቃይ ጽሎ ሃꬃን ሜጨቴዳ ቦላና ጾሳኮ ሺቆይተ። ዎጋ 8:30፤ ህዝ. 36:25
23 ኑዉ እማና ጌዳ ጾሳይ አማንꬅያ ድራዉ፥ ኑን ደማና ጊደ ናሸቻን ናግ ኡቴዳዋ ሎይꬅ ኦይቆይተ። 24 እቱ እቱዋና ዋን ሲቀታነንቶነ ቃይ ሎኦ ኦሱዋ ዎት ኦꬃነንቶ፥ እቱ እቶ ቆፔቶ። 25 እቱ እቱ ሺቁዋ ዶያ ኦꬂደ ሺቅያዋዳን፥ ኑንካ እትፐ ሺቅያዋ አጎኮ፤ ሽን ጎዳ ጋላሳይ ማታትያዋ ህንተንቱ በእያ ድራዉ፥ እቱ እቱዋ መንꬄቶ።
26 ኑን ቱማተꬃ ኤራ አክ ድጊደ፥ ኤሪደ ናጋራ ኦꬅያዋ ግዶፐ፥ ሀዋፐ ስንꬃዉ ናጋራ ꬋይስያ ያርሹ እትባይነ ባዋ። 27 ሽን ያሽያ ፕርዳ ናግያዌነ ጾሳ እጽያ ኡባ ማናዉ ዎልቃማ ታማይ ደኤ። ኢሳ. 26:11 28 ሙሴ ህገዉ አዛዘተና ኡራይ፥ ላኡ ኡራይ ዎይ ሄዙ ኡራይ አ ቦላ ማርካቶፐ፥ ቃረት ባይናን ሀይቄ። ዛረ. 17:6፤ 19:15 29 ጾሳ ናኣ ካꬌዳ ኡራይ፥ ባረና ናጋራፐ ጌሼዳ ጾሳ ጫቁዋ ሱꬃ ቱናባዳን ቆፔዳ ኡራይ፥ ቃይ አꬎ ኬካተꬃ ጌሻ አያና ቦርያ ኡራይ፥ አይ ኬና ኢታ ፕርዳ አካናዉ በስንቶነ አነ ቆፕተ። ከሳ 24:8
30 አያዉ ጎፐ፥ “ታን ሀሉዋ ከሳናነ ኩሽያ ዛራና” ጌዳዋ ኑን ኤሬቶ፤ ቃይካ፥ “ጎዳይ ባረ አሳ ፕርዳና” ያጌዳ። ዛረ. 32:35፣ 36 31 ደኡዋ ጾሳ ኩሽያን ኩንዳናዌ ዳሮ ያሽያዋ።
32 ህንተንቶ ጾሳ ፖኡ ፖኤዳዋፐ ጉይያን፥ ህንተንቱ ዳሮባን ዋየቲደ፥ ዎልቃማ ዋታን ገንጬዳ በን ዎድያ ሀሳይተ። 33 እት እት ገደ ህንተንታ አሳ ስንꬃን ቦሬድኖነ ፓጻ ካኤድኖ፤ ቃይ ሀራ ዎደ ሄዋዳን ኦꬄዳዋንቱናነ እትፐ ደኤድታ። 34 አያዉ ጎፐ፥ ቃሹዋን ደእያ አሳቶ ህንተንቱ ቃረቴድታ፤ ያቲደ ህንተንቶ መꬍናዉ ዉረና ኡባፐ አꬍያ ሻሉ ሳሉዋን ደእያዋ ህንተንቱ ሁጰዉ ኤሬዳ ድራዉ፥ ህንተባ ኡባ አክ ድጎፐ ህዶታን ገንጬድታ።
35 ሄዋ ድራዉ፥ ዎልቃማ ዎይታና ደእያ ህንተንቱ ጻላተꬃ ኦሎፕተ። 36 ጾሳይ ኮይያዋ ኦꬂደ፥ እ ህንተንቶ እማና ጌዳዋ አካናዉ ገንጫና ኮሼ። 37 አያዉ ጎፐ፥ ጾሳ ማጻፋይ፥
“አማሬዳ ዎዲ አቴዳ።
ይያዌ ያናዋ፤ ጋምኤና። እምባ. 2:3-4
38 ታ ጽሉ አማነቲደ ደአናዋ።
ሽን ኦንነ ጉየ ስሞፐ፥
ታና ናሸቼና”
ያጌ። 39 ኑን አማነቲደ አቴዳዋንቱ ባጋ ግድያዋፐ አትን፥ ጉየ ስሚደ ꬋዬዳዋንቱ ባጋ ግዶኮ።