ጌሻ ማጻፋ እብራዌ 11

አማኑዋ

1 አማኑዋ ግያዌ፥ ደማና ጊደ ናሸቻን ናግ ኡቴዳባይ አማንꬅያዋነ በአናዉ ዳንዳየናባ ኤርስያዋ። 2 ጾሳይ በን ጭማ አሳዉ ማርካታዌ፥ ኡንቱንቱ አማኔዳዋና።

3 ሳሉነ ሳአይነ ጾሳ ቃላን መቴዳዋ አማኑዋን ኑን ኤሬቶ፤ ሄዋ ድራዉ፥ ቤትያባይ ቤተናባፐ መቴዳ።

4 አቤል ቃዬላዋፐ አꬍያ ያርሹዋ ጾሳዉ ያርሼዳዌ አማኑዋና። ጾሳይ አ እሙዋባ ማርካቲደ፥ እ ጽሉዋ ግዴዳዋካ ማርካቴዳ፤ አቤል ሀራይ አቶ ሀይቄዳሽንካ፥ ባረ አማኑዋን ሀእ ጋካናዉ ሃሳዬ።

5 ሄኖክ ሀይቀናን ሳሉዋ ቤዳዌ አማኑዋና፤ ጾሳይ አፌዳ ድራዉ፥ ኦንነ አ በአናዉ ዳንዳይቤና። ጾሳ ማጻፋይ፥ “ሄኖክ ሳሉዋ ባናፐ ካሰ ጾሳ ናሸቼዳ” ያጌ። 6 አማኑ ባይናን ኦንነ ጾሳ ናሸቻናዉ ዳንዳየና፤ አያዉ ጎፐ፥ ጾሳኮ ይያ ኦንነ ጾሳይ ደእያዋነ ባረና ኮይያዋንቶ ዎይታ እምያዋ አማናናዉ ኮሼ።

7 ኖሄ በአናዉ ዳንዳየና ስንꬃፐ ሀናናባዉ ጾሳይ፥ “ኔና ናጋ” ጊና፥ ጾሳዉ ያዪደ፥ ባረናነ ባረ ሶይ አሳ አሻናዉ ማርካብያ መꬌዳዌ አማኑዋና፤ ያቲደ ሄዋን ሀ ሳኣ ቦላ ፕርዲደ፥ አማኑዋን ቤትያ ጽሎተꬃካ ጾሳፐ አኬዳ።

8 አብራሃሞ ላታናዳን፥ ጾሳይ ባረዉ እማና ጌዳ ጋድያ ባና ማላ፥ ጾሳይ ባረና ጼሴዳ ዎደ፥ አዛዘቴዳዌ አማኑዋና፤ እ ባረ ጋድያፐ ከሲደ ብያ ዎደ፥ ሀቃ ብንቶነ ኤረናን ከሴዳ። 9 አብራሃሞ ጾሳይ ባረዉ እማና ጌዳ ጋድያን ሀራ ቢታ አሳዳን ደኤዳዌ አማኑዋና፤ ጾሳይ ሄ እማና ጌዳዋ ባረናና እትፐ ላታና ይሳቃናነ ያቆባና ዱንካንያን ደኤዳ። 10 አያዉ ጎፐ፥ አብራሃሞ ጾሳይ ሎኦ ባሱዋን ቆፒደ ኬጼዳ ካታማ ናጌ።

11 ሳራ ባረ ሁጰዉ ሀራይ አቶ ኤጫደካ፥ እማና ጌዳ ጾሳይ አማነቴዳዋ ግዴዳዋ ኤሬዳ ድራዉ፥ ናኣ ሻሃራናዉ ዎልቃ ደሜዳዌ አማኑዋና። 12 ሄዋ ድራዉ፥ ሀይቄዳ አሳ ማላትያ እት ብታንያፐ ሳሉዋን ደእያ ጾልንትያ ኬና፥ አባ ጋጻን ደእያ ፓይዱ ባይና ሻፍያ ኬና ዛራቱ የለቴድኖ።

13 ሄ አሳቱ ኡባቱ አማኑዋን ሀይቄድኖ፤ ባረንቶ ጾሳይ እማና ጌዳዋካ አክበይክኖ፤ ሽን ሃኩዋን ሄዋ በኢደ፥ ሳሮቴድኖ። ቃይ ኡንቱንቱ ሳኣን እማꬃነ የደርሰቲደ ከሴዳ አሳቱዋ ግዴዳዋ ኤሬድኖ። 14 አያዉ ጎፐ፥ ሄዋዳን ግያ አሳቱ ባረንቱ ሁጰ ጋድያ ኮይያዋ ኤርሲኖ። 15 ኡንቱንቱ ሄ የጊደ ከሴዳ ጋድያ ስማናዉ ቆፔዳዋ ግድንቶ፥ ጉየ ስምያ ካጫ ደመናን አግክኖ፤ ሽን 16 ኡንቱንቱ ሄዋ አጊደ፥ ሎእያ ጋድያ ላሞቲኖ፤ ሄዌ ሳሉዋ ጋድያ። ሄዋ ድራዉ፥ ጾሳይ ኡንቱንቱ ጾሳ ጌተታናዉ ዬላተና። አያዉ ጎፐ፥ እ ኡንቱንቶ ካታማ ጊግስ ዎꬄዳ።

17-18 አብራሃሞ ይሳቃ ያርሻነንቶ ዎይ ያርሸነንቶ፥ ጾሳይ ኤራናዉ ጾሞሴዳ ዎደ፥ አብራሃሞ አማኑዋን አ ያርሼዳ። ጾሳይ አብራሃማ፥ “ነ ዛሪ ይሳቃ ባጋና ጼሰታናዋ” ጌዳሽንካ፥ አብራሃሞ ባረ ናኣ ይሳቃ ያርሻናዉ ጊጌዳ። 19 አብራሃሞ ጾሳይ ይሳቃ ሀራይ አቶ፥ ሀይቁዋፐካ ፓꬃናዉ ዳንዳይያዋ ኤሬዳ፤ ሄዋ ድራዉ፥ ሀይቁዋፐ ጉየ አ ዛሪደ አኬዳ።

20 ይሳቅ ስንꬃፐ ሀናናባዉ ያቆባነ ኤሳ አንጄዳዌ አማኑዋና።

21 ያቆብ ሀይቃና ሀኒደ፥ ዮሴፎ ናና ሁጲያን ሁጲያን አንጄዳዌነ ጋትማን ጉፈቲደ፥ ጾሳዉ ጎይኔዳዌ አማኑዋና።

22 ዮሴፎ ሀይቃናዉ ማቲደ፥ እስራኤልያ አሳይ ግብጼፐ ከሳናዋ ሃሳዬዳዌነ ባረ መቀꬃ ኦꬃናባ ኡንቱንታ አዛዜዳዌ አማኑዋና።

23 ሙሴ የለቴዳዋፐ ጉይያን፥ አዉነ አታ ማላ ሎኦ ናኣ ግዴዳዋ በኢደ፥ ሄዙ አገና ቆሴዳዌ አማኑዋና፤ ኡንቱንቱ ካትያ አዋዮካ ያይበይክኖ።

24 ሙሴ ድጬዳዋፐ ጉይያን፥ ግብጼ ካትያ ናት ናኣ ጌተታናዋ እጼዳዌ አማኑዋና። 25 ናጋራን ሙሴ ጉꬃ ዎድያ ናሸታናዋፐ፥ ጾሳ አሳና ዋየታናዋ ዶሬዳ። 26 ዎደፐ ደማና ዎይታ እ ትሽ ኦꬂደ ጼሎ ድራዉ፥ ግብጼ ጋድያ ሻሉዋ ኡባፐ ክርስቶሳ ድራዉ ቦረትያዌ ዳሮ አꬍያ ዱረተꬃ ግዴዳዋ ቆፔዳ።

27 ካትያ ሀንቆ ሙሴ ያየናን፥ ግብጼ ጋድያፐ ከሴዳዌ አማኑዋና፤ አያዉ ጎፐ፥ ቤተና ጾሳ በኤዳዋዳን፥ ገንጪደ ስንꬃዉ ቤዳ። 28 ሀይቁዋ ኪታንቻይ እስራኤልያ አሳዉ ባይራ ናና ቦቼናዳን፥ ሙሴ ፓስጋ ቦንቼዳዌነ ጉባንያን ሱꬃ ጫጫፍሴዳዌ አማኑዋና።

29 እስራኤልያ አሳይ መላ ቢታን ሀመትያዋዳን፥ ዞኦ አባ ፕኔዳዌ አማኑዋና፤ ሽን ግብጼ አሳቱ ፓጨዉ ገልሽን፥ ሃꬃይ ኡንቱንታ ምት አጌዳ።

30 እስራኤልያ አሳይ እያርኮ ግያ ካታማ ሹቻ ድርሳ ላፑ ጋላሳ ዩይ ዩይ አꬎዋፐ ጉይያን፥ ሄ ሹቻ ድርሳይ ኩንዴዳዌ አማኑዋና። 31 ጫራታ ራኣባ የዉዋ ቆርያዋንታ ሎይꬃ ሞኬዳ ድራዉ፥ ጾሳዉ አዛዘተናን እጼዳ አሳና ሀይቀናን አቴዳዌ አማኑዋና።

32 ስም ሀራባ ጉጃደ አያ ኦዶ? ጌዶናባ፥ ባራቃባ፥ ሳምሶናባ፥ ዮፍታሄባ፥ ዳዊተባነ ሳሜላባ፥ ቃይ ናባቱዋባ ኦዳናዉ ታዉ ዎዲ ግደና። 33 ኡንቱንቱ ካትያ ኡባና ኦለቲደ ጾኔዳዌነ ጽሎባ ኦꬄዳዌ አማኑዋና፤ ያቲደ ጾሳይ እማና ጌዳዋ አኬድኖ፤ ጋሞቱዋ ዶናካ ጎርዴድኖ። 34 ዎልቃማ ታማ ቶይሴድኖ፤ ኩሳ ማሻፐ አቴድኖ፤ ኡንቱንቱ ዳቡራንቻ፤ ሽን ምኔድኖ፤ ቃይ ኦላን ምኒደ፥ ሀራ ጋድያ ኦላ አሳ የደርሴድኖ። 35 ማጫዋንቱ ባረንቱ ሀይቄዳዋንታ ሀይቁዋፐ ደንድና አኬድኖ።

ቃይ ሀራንቱ ቃሹዋፐ ብለታናዋ እጺደ፥ ኬክያ ደኦ ሀይቁዋፐ ደንዳናዉ፥ ኡጋቲደ ሀይቄድኖ። 36 ሀራቱዋ ቦላ አሳይ ቅሊጭ ካኤዳ፤ ልሱዋን ሾጨቴድኖነ ሳንꬃላታን ቃሸቲደ፥ ቃሾ ጎልያ ገሌድኖ። 37 ሹቻን ጫደቴድኖ፤ ማጋዝያን ላኡ ከሲደ ጳልቀቴድኖ፤ ፓጨቴድኖ፤ ማሻን ሀይቄድኖ፤ ኡንቱንቶ ኡባባይካ ꬋይና፥ ዋየቲደ ቱጋቲደ፥ ዶርሳ ጫላነ ዴሻ ጫላ ማዪደ ዩዬድኖ። 38 ኡንቱንቶ ሀ አላሚ ጊገናን እጽና፥ ዎራን፥ ደርያን፥ ጎንጎሉዋ ግዶንነ ኦላ ግዱዋን ዩዬድኖ።

39 ጾሳይ ኡንቱንቱ አማኑዋ ማርካቶፐካ፥ ሄዋንቱ ኡባቱ እ፥ እማና ጌዳዋ አክበይክኖ። 40 ጾሳይ ኑዉ እት ሎኦ ቆፋ ቆፕ ዎꬄዳ ድራዉ፥ ኡንቱንቱ ኑን ባይናን ባላይ ባይናዋንታ ግድክኖ።

11:3 ዶመꬃ 1:1፤ ማዝ. 33:6፣ 9፤ ዮሃ. 1:3

11:4 ዶመꬃ 4:3-10

11:5 ዶመꬃ 5:21-24

11:7 ዶመꬃ 6:13-22

11:8 ዶመꬃ 12:1-5

11:9 ዶመꬃ 35:27

11:11 ዶመꬃ 18:11-14፤ 21:2

11:12 ዶመꬃ 18:11-14፤ 21:2

11:13 ዶመꬃ 23:4፤ 1 ኦዱዋ 29:15፤ ማዝ. 39:12

11:17-18 ዶመꬃ 22:1-14

11:20 ዶመꬃ 27:27-29፣ 39-40

11:21 ዶመꬃ 47:31

11:22 ዶመꬃ 50:24-25፤ ከሳ 13:19

11:23 ከሳ 2:2፤ 1:22

11:24 ከሳ 2:10-12

11:28 ከሳ 12:21-30

11:30 ኢያሳ 2:1-21፤ 6:22-25

11:32 ዳኔላ 6:11—8:27፤ ዳና. 4:6—5:31፤ ዳና. 13:2—16:31፤ ዳና. 11:1—12:7፤ 1 ሳሜላ 16:1—1 ካታ. 2:11፤ 1 ሳሜላ 1:1—25:1

11:33 ዳኔላ 6:1-27

11:34 ዳኔላ 3:1-30

11:35 1 ካታ. 17:17-24፤ 2 ካታ. 4:25-37

11:36 1 ካታ. 22:26-27፤ 2 ኦዱዋ 18:25-26፤ ኤር. 20:2፤ 37:15፤ 38:6

11:37 2 ኦዱዋ 24:21