1 “ህንተ እሻቱዋ፥ ጾሳይ ህንተና፥ ‘አም (ታ አሳ ግያዋ) ያጌ’ ያግተ። ቃይ ህንተ ምቼቱዋ፥ ጾሳይ ህንተና፥ ‘ሩሃማታ (ህንተንቶ ቃረታይ ግያዋ) ያጌ’ ያግተ።

2 “ህንተ ዳዮ ሴርተ፤ እዞ ሴርተ። አያዉ ጎፐ፥ አ ታ ማቼ ግዱኩ፤ ታንካ እ አስና ግድከ። እዛ ባረ ሶምኡዋ ሻርሙጻዳን በስያዋ አጉ፤ ባረ ሻርሙጻ ኦሱዋካ ባረ ꬋንꬃቱዋ ግዱዋፐ ድጉ። 3 ሄዌ ꬋዮፐ፥ እዛ የለቴዳ ጋላሳዳን፥ ታን እዞ ጺራ ካሎ አሻና። ቃይ መሌዳ ቢታዳን እዞ ኦꬃና፤ ታን እዞ ሳሙዋን ዎꬋና። 4 ኡንቱንቱ ሻርሙጻትፐ የለቴዳ ናናቱዋ ግዴዳ ድራዉ፥ ታን እ ናናቶ ቃረትከ። 5 ኡንቱንቱ ዳያ ሻርሙጻዱ፤ ኡንቱንታ ባረ ኡሉዋን ቶኬዳና ካዉሻባ ሀናዱ። ዋናደ ጎፐ፥ እዛ፥ ‘ታን ታ ቁማነ ታ ሃꬃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገꬃቱዋ ካላደ ባና’ ያጋዱ።

6 “ሄዋ ድራዉ፥ ታን እ ኦግያ አጉንꬃን ጎርዳና፤ እዛ ባረ ሎሱዋ ደመና ማላ፥ ታን ግምቢያ ግምባና። 7 እዛ ባረ ላገꬃቱዋ ጌዱዋ ዎጻና፥ ሽን ጋኩኩ፤ ኡንቱንታ ኮያና፥ ሽን ደሙኩ። ሄዋፐ ጉይያን እዛ፥ ‘ታዉ ሀእ ደኡሳፐ በንዌ ኬክያ ድራዉ፥ ስማደ ታ ኮይሮ አስናኮ ባና’ ያጋና።

8 “ካꬃ፥ ዎይንያ ኤሳነ ዛይትያ እዝዉ እሜዳዌነ ኡንቱንቱ ባኣላ ግያ ኤቃዉ ሺሽያ ብራነ ዎርቃ እዝዉ ዳርሴዳዌ ታና ግድያዋ እዛ ኤረናን እጻዱ። 9 ሄዋ ድራዉ፥ ካእያ ዎደ ታ ካꬃ፥ ቃይ ቴርያ ዎደ ታ ዎይንያ ታን ኢፐ ዛራደ አካና። ሄዋዳንካ፥ እዝ ካሉዋ ማይዛናዉ፥ ሱፍያፐነ ሊኑዋፐ ዳደቴዳ ማዩዋካ ኢፐ ቃራ አካና። 10 ቃይ እዝ ሲቃቱዋ ስንꬃን ታን እዝ ካሉዋ በሳና፤ ታ ኩሽያፐ ኦንነ እዞ አሸና። 11 ታን እዝ ናሸቻይ ኡባይ፥ እዝ ባላይ፥ እዝ አግናይ ጼርያ ጋላሳቱ፥ እዝ ሳምባታ ጋላሳቱ፥ ላይꬃን ላይꬃን ቦንቼትያ እዝ ባላቱ ኡባይ አታናዳን፥ ኦꬃና። 12 እዛካ፥ ‘ታ ሲቃቱ ታዉ እሜዳ የዉ ሀዋ’ ያጌዳ እዝ ዎይንያ ቱራቱዋነ ባላስያ ጌተትያ ምꬃቱዋ ታን ꬋይሳና፤ ታን ኡንቱንታ ዎራ ኦꬃና፤ ባዙዋ ዶአቱ ኡንቱንታ ማና። 13 እዛ ታና ዶጋደ፥ ባረ ሲቃቱዋ ካላደ፥ ጉቱቻቱዋንነ አሌቆቱዋን ባረዉ አሌቀታደ፥ ባኣላ ግያ ኤቃዉ እጻና ጩዋዬዳ ባላ ጋላሳቱዋ ድራዉ፥ ታን እዞ ሙራና። ታን መꬍና ጎዳይ ሀዋ ኦዳድ።

14 “ሄዋ ድራዉ፥ ታን እዞ ላባደ መላ ቢታ አሀና፤ ታን እዝዉ ሲቁዋ ቃላን ኦዳና። 15 ያን ታን እዝ ዎይንያ ቱራ ሳኣ እዝዉ ዛራደ እማና፤ መቱዋ ዛንጋራ እዛ ህዶታን ናግያባይ ገልያ ፐንግያ ኦꬃና። ግብጼ ጋድያፐ ከሴዳ ዎድያዳን፥ የጼዳዋዳ ባረ ዎዶሮተꬃ ላይꬃዳን፥ እዛ ያን የጻና” ያጌ። ኢያሳ 7:24-26

16 ቃይካ መꬍና ጎዳይ ሀዋዳን ያጌ፤ “ሄ ጋላስ እዛ ታና፥ ‘ታ አስና’ ያጋ ጼሳናፐ አትና፥ ሀዋፐ ስንꬃናዉ፥ ‘ታ ባኣላ’ ያጋ ጼሱኩ። 17 አያዉ ጎፐ፥ ታን እዝ ዶናፐ ባኣላ ሱንꬃ ድጋና፤ ሀዋፐ ስንꬃናዉ ታን እዞ ባኣላ ሱንꬃ ጼስስከ። 18 ሄ ጋላስ ታን ታ አሳ ድራዉ ሳኣ ዶአቱዋና፥ ሳሉዋ ካፎቱዋናነ ቢታና ጎሸትያ መታቱዋና ጫቁዋ ጫቀታና። ታን ጋድያፐ ዎንዳፍያ፥ ማሻነ ኦላ ꬋይሳና፤ ያቶፐ ኡንቱንቱ ዎፑ ጊደ፥ ሳሮ ደአና።

19 “ታን ኔና መꬍናዉ ታዉ ጊግሳና፤ ጽሎተꬃንነ ሱረ ፕርዳን፥ አገና ሲቁዋንነ ማሮታን ታዉ ጊግሳና፤ 20 ታን አማነታደ ኔና ታዉ ጊግሳና። ኔንካ መꬍና ጎዳ ኤራና” ያጌ።

21 ቃይካ መꬍና ጎዳይ፥ “ሄ ጋላስ ታን ዛሩዋ እማና፤ ታን ሳሎቶ ዛሩዋ እምና፥ ኡንቱንቱ ሳአዉ ዛሩዋ እማና። 22 ሳአይካ ካꬃዉ፥ ዎይንያ ኤሳዉነ ዛይትያዉ ዛሩዋ እማና፤ ኡንቱንቱ እዝራኤልያዉ ዛሩዋ እማና። 23 ታን እዞ ጋድያን ታዉ ቶካና። ሮመ 9:25፤ 1 ጰጽ. 2:10 ካሰ ታን ‘ሎሩሃማ ጎንዉ’ (ቃረታቤናንዉ) ሀእ ቃረታና። ቃይ ‘ሎኣም’ ጎዋዉ (ታ አሳ ግደናዋንታ)፥ ‘አም’ (ታ አሳ) ጋና፤ ኡንቱንቱካ ታና፥ ‘ኔን ኑ ጾሳ’ ያጋና” ያጌ።