1 ህንተኖ፥ እስራኤልያ አሳቶ፥ መꬍና ጎዳ ቃላ ስስተ! አያዉ ጎፐ፥ ሀ ጋድያን ደእያ አሳ ኡባ መꬍና ጎዳይ ሞትያባይ ደኤ። ሄዌካ፥ ሀ ጋድያን አማኑ፥ ሲቁነ ጾሳ ኤርያዌ ባዋ። 2 ሀ ጋድያን ደእያባይ ሸቃ፥ ዎርዱዋ፥ አሳ ዎꬍያዋ፥ ዉኤꬃነ ሻርሙጻ ጻላላ። ኡንቱንቱ ጫቁዋ ኡባ ኮሌድኖ፤ አሳ ዎꬉ ዎꬉዋ ካሌ። 3 ሄዋ ጋሱዋን ቢታይ መላና፤ ጋድያን ደእያ ኡባይ ዳቡራና። ሳኣ ዶአቱካ፥ ሳሉዋ ካፎቱካ፥ ሀራይ አትና፥ አባ ሞለቱካ ሀይቃና።

4 ጾሳይ ሀዋዳን ያጌ፤ “ህንተኖ፥ ቄሳቶ፥ ታን ህንተና ሞትያባይ ደኤ። ሄዋ ድራዉ፥ ኦንነ ሀራ አሳና ፓሉመቶፖ፤ ቃይ ኦንነ ሀራ አሳ ሞቶፖ። 5 ህንተ ጋላስ ꬉበታና፤ ትምቢትያ ኦድያዋንቱካ ህንተናና ቃማ ꬉበታና። ሄዋ ድራዉ፥ ታን ህንተ ዳዮ ꬋይሳና። 6 ታ አሳይ ኤራተꬃይ ꬋይና ባዬዳ። ህንተ ኤራተꬃ እጼዳ ድራዉ፥ ታንካ ህንተ ታዉ ቄስያ ግዳናዋ እጻይ። ህንተ ጾሳ ህግያ ህንተ ዶጌዳ ድራዉ፥ ታንካ ህንተ ናናቱዋ ዶጋና።

7 “ቄሳቱ ዳር ዳር ቤዳ ኬና፥ ታና ዳርስ ናቄድኖ፤ ታንካ ኡንቱንቱ ቦንቹዋ ዬላዉ ላማና። 8 ታ አሳ ናጋራይ ኡንቱንቶ ቁማ ግዴዳ፤ ሄዋ ድራዉ፥ ኡንቱንቱ ታ አሳ ኢታባ ኦስሳናዉ ጃሚኖ። 9 ቄሳቱ ካ አሳይ ሀንያዋዳን ሀናና። ታን ኡንቱንቱ ሀኖታ ድራዉ፥ ኡንቱንታ ሙራና፤ ቃይ ኡንቱንቱ ኦሱዋዳን፥ ኡንቱንቶ ዛራና። 10 ኡንቱንቱ መꬍና ጎዳ አጌዳ ድራዉ፥ ማና፥ ሽን ካልክኖ፤ ሻርሙጻና፥ ሽን ናናቱዋ ጮርስክኖ።

11 “ሻርሙጻተꬃይ፥ ጋምኤዳ ዎይንያ ኤሳይነ ያላጋ ዎይንያ ኤሳይ ታ አሳ ዎዛና ባይዜ። 12 ታ አሳይ ምꬃፐ ኦሰቴዳ ኤቃ ምስልያ ዞርያ ኦቼ፤ ኡንቱንቱ ጻምአይ ኡንቱንቱ ኦሻ ዛሬ። ሻርሙጻ አያናይ ኡንቱንታ ባለꬄ፤ ኡንቱንቱ ባረንቱ ጾሳፐ ሻከቲደ ሻርሙጼድኖ። 13 ደረቱዋ ሁጲያን ያርሹዋ ያርሺኖ፤ ዞዘቱዋ ቦላንካ ኩዋይ ሎኦ ግድያ አዱሳነ ዳሻ ምꬃቱዋ ጋርሳንካ እጻና ጩዋዪኖ።

“ሄዋ ድራዉ፥ ህንተ ማጫ ናናይ ሻርሙጻ ግዲኖ፤ ህንተ ናናቱዋ ማጫ አሳቱካ ሻርሙጺኖ። 14 ህንተ ማጫ ናናይ ሻርሙጽያ ዎደነ ህንተ ናናቱ ማጫ አሳቱ ሻርሙጽያ ዎደ፥ ታን ቃጻይከ፤ አያዉ ጎፐ፥ አቱማ አሳቱ ባረንቱ ሁጲያን ሻርሙጽያዋንቱና ዙፐቲኖ፤ ሻርሙጽያዋንቱና ያርሹዋ ያርሺኖ። ሄዋ ድራዉ፥ አኬካይ ባይና አሳይ አꬍ ዎꬋና።

15 “እስራኤልያ አሳቶ፥ ህንተ ሻርሙጻ ከሶፐካ፥ ይሁዳ አሳይ ህንተዋዳን፥ ባይዛንቻ ግዶፖ። ገልጋላ ቦፕተ፤ ቤት-አዌነካ ፑደ ከሶፕተ፤ ደኡዋን ደእያ መꬍና ጎዳይ ኤሮ! ያጊደ ጫቆፕተ። 16 እስራኤልያ አሳይ ማካላንቻ ኡሳትዋዳን ማካሌዳ። ያትና፥ መꬍና ጎዳይ ኡንቱንታ አኮ ደምባን ዶርሳ ማራቱዋዳን ዋቲደ ሄማኔ? 17 ኤፍሬማ አሳይ ኤቃቱዋን ጋከቴዳ፤ ኡንቱንታ አግ ባሽተ። 18 ኡንቱንቱ ዳሮ ዎይንያ ኡሽ ስሚደ፥ ሻርሙጽያዋ አግክኖ፤ ኡንቱንታ ሞድያዋንቱካ ዬላይያዋ ሎይꬅ ዶሲኖ። 19 ጫርኩ ኡንቱንታ አፋና፤ ባረንቱ ኤቃዉ ያርሼዳ ያርሾቱ ጋሱዋን ኡንቱንቱ ዬላታና።