1 “ህንተኖ፥ ቄሳቶ፥ ሀዋ ስስተ! ህንተኖ፥ እስራኤልያ አሳቶ፥ ስስተ! ካትያ ጎልያ አሳቶ፥ አኬክተ! ሀ ፕርዳይ ህንተ ቦላ ፕርደቴዳ። ህንተ ምጽጳን ጲርያዳን ሀኔድታ፤ ታቦራ ደርያ ቦላካ ምጬዳ ግትያዳን ሀኔድታ። 2 ማካላንቻቱ ዎꬍያ ዲዛዳን ሀኔድኖ፤ ሄዋ ድራዉ፥ ታን ኡንቱንታ ኡባ ሙራና። 3 ኤፍሬማዋ ታን ኤራይ፤ እስራኤልካ ታፐ ጌምቤና። ኤፍሬማ፥ ኔን ሀእ ሻርሙጻ ከሳዳ፤ እስራኤልካ ቱኔዳ” ያጌ።

4 እስራኤልያ አሳይ ባረንቱ ጾሳኮ ስመናዳን፥ ኡንቱንቱ ኢታ ኦሱ ኡንቱንታ ተኤዳ፤ ሻርሙጻ አያናይ ኡንቱንቱ ግዶን ደኤ። ሄዋ ድራዉ፥ ኡንቱንቱ መꬍና ጎዳ ኤርክኖ። 5 እስራኤልያ አሳ ኦቶሩ ኡንቱንቱ ቦላን ማርካቴ፤ ሄዋ ድራዉ፥ እስራኤልያ አሳይነ ኤፍሬማ አሳይ ባረንቱ ናጋራን ꬉበቲኖ፤ ይሁዳ አሳይካ ኡንቱንቱና ꬉበቴ። 6 ኡንቱንቱ መꬍና ጎዳዉ ያርሻናዉ ባረንቱ ዶርሳቱዋ ዉድያነ መህያ ዉድያ ላግ አኪደ ባና፤ ሽን ኡንቱንቱ አ ደምክኖ። አያዉ ጎፐ፥ እ ኡንቱንቱፐ ሻከቴዳ። 7 ኡንቱንቱ መꬍና ጎዳዉ አማነትበይክኖ፤ ኡንቱንቱ የሌዳ ናናይካ ሻርሙጻ ናና። ሄዋ ድራዉ፥ ሀ አግናይ ጼራናዉ፥ ኡንቱንቱካ ኡንቱንቱ ቢታይካ ꬋያና።

8 ግብኣ ካታማን ማላካታ፥ ራማ ካታማን ጹሩምባ ፑንተ። “ቢንያማ አሳዉ፥ ህንተ ጉይያን ደእያባ ጼልተ፤ ሄዋ ኤርተ!” ያጊደ፥ ቤት-አዌናን ዋሱዋ ጹልስተ። 9 ቃጻየትያ ጋላስ ኤፍሬመ መላ አታና፤ እስራኤልያ ዛራቱ ግዶን ቱሙ ትምቢትያ ታን ኦዳይ።

10 ጾሳይ ሀዋዳን ያጌ፤ “ይሁዳ ካፓቱ ዛዋ ሹቻ ሱግያዋንቱ ማላ ግዴድኖ፤ ታን ታ ሀንቁዋ ኡንቱንቱ ቦላን ሃꬃዳን ጉሳና። 11 ኤፍሬማ አሳይ ማዳናዉ ዳንዳየና ካዉተꬃቱዋፐ ማዱዋ ኦቻናዉ ቃቼዳ ድራዉ፥ ናቀቴዳነ ፕርዳን ቆሄቴዳ። 12 ሄዋ ድራዉ፥ ታን ኤፍሬማ አሳዉ ብልኣ ማላ፥ ይሁዳ አሳዉካ ቁኑዋ ማላ።

13 “ኤፍሬመ ባረ ሀርግያ፥ ይሁዳይካ ባረ ማዱꬃ በኤዳ ዎደ፥ ኤፍሬመ አሶረ ቢታ ቤዳ፤ ሄ ቢታ ሞድያ ዎልቃማ ካትያ ማዱዋ ኦቼዳ። ሽን እ ኡንቱንቱ ሀርግያ ꬋላናዉ ዎይ ኡንቱንቱ ማዱꬃ ፓꬃናዉ ዳንዳይቤና። 14 ሄዋ ድራዉ፥ ታን ኤፍሬማዉ ጋሙዋዳን ሀናና፤ ይሁዳዉካ ዎዳላ ጋሙዋዳን ሀናና። ታን ኡንቱንታ መንሬꬃደ፥ ቶካ አካደ ባና፤ ኦንነ ኡንቱንታ ታፐ ዎꬅ አከና። 15 ኡንቱንቱ ባረንቱ ባይዙዋ አኬካና ጋካናዉነ ታና ኮያና ጋካናዉ፥ ታን ጉየ ታ ሳኣ ስማሻና። ኡንቱንቱ ባረንቱ ቱጋዉ ታና ምንሲደ ኮያና” ያጌ።