1 እስራኤልያ አሳይ ሀዋዳን ያጌ፤ “ሃይተ! አነ መꬍና ጎዳኮ ስሞይተ። እ ኑና መንሬꬄዳ፥ ሽን እ ኑና ፓꬃና፤ እ ኑና ማዱꬄዳ፥ ሽን እ ኑ ማዱꬃ ቃቻናዋ። 2 ላኡ ጋላሳፐ ጉይያን፥ እ ኑና ፓꬃና፤ ሄዘንꬆ ጋላስ ኑን አ ስንꬃን ደአና ማላ፥ እ ኑና ደንꬃና። 3 መꬍና ጎዳ አነ ኤሮይተ፤ አ ኤራና ማላ፥ ምንሲደ አነ አ ካሎይተ። አዋይ ሞክያዌ ቱማ ግድያዋዳን፥ እካ ቱሙ ቤታና። ባꬌሳ እራዳን፥ ቢታ አልያ ባልጉዋ እራዳን፥ እ ኑኮ ያና” ያጌ።

4 ጾሳይ ሀዋዳን ያጌ፤ “ኤፍሬማ አሳዉ፥ ታን ህንተና ዋቶሻ! ይሁዳ አሳዉ፥ ታን ህንተና ዋቶሻ! አያዉ ጎፐ፥ ህንተ ሲቁ ዎንታ ሻርያ ማላ፤ ኤለካ ꬋይያ ጉራ ከተርሳ ማላ። 5 ሄዋ ድራዉ፥ ታን ትምቢትያ ኦድያዋንቱ ባጋና ህንተና ቃንጸሬꬃድ፤ ታ ዶናፐ ከሴዳ ቃላን ታን ህንተና ዎꬋድ። ታ ፕርዳይካ ህንተ ቦላ ዋልቃንꬃዳን ዋልቃማና። 6 አያዉ ጎፐ፥ ታን አገና ሲቁዋ ኮያይፐ አትና፥ ያርሹዋ ኮይከ፤ ጾሳ ኤርያዋ ኮያይፐ አትና፥ ጹግያ ያርሹዋ ኮይከ። ማቶሳ 9:13፤ 12:7

7 “ሽን ኡንቱንቱ አዳመዋዳን፥ ጫቁዋ ኮሌድኖ፤ ያን ታዉ አማነተናን እጼድኖ። 8 ጋላኣደ ካታማይ ኢታ ኦሱዋ ኦꬅያ አሳቱ ደእያ ካታማ፤ ሄ ካታማይ አሳ ሱꬃን ባይ ኡቴዳ። 9 ፓንጋቱ አሳ ዎꬋናዉ ቆሰት ኡቲደ ናግያዋዳን፥ ቄሳቱ ዋ ጭታይካ ሄዋዳን ናጌ፤ ሰኬማ ካታማ አፍያ ኦግያን አሳ ዎꬌ። ኤ፥ ኡንቱንቱ ዬላይያ ኮባባ ኦꬂኖ። 10 ታን እስራኤልያ አሳን ዳጋንꬅያባ በኣድ። ኤፍሬማ ግዶን ሻርሙጻተꬃይ ደኤ፤ እስራኤልካ ቱኔዳ።

11 “ይሁዳ ቢታ አሳቶ፥ ህንተናካ ሙራና ጋላሳ ታን ኬራ ዎꬃድ።