7
1 “ታን እስራኤልያ ፓꬃናዉነ ዛረꬃደ እሻልሳናዉ ኮይያ ዎደ፥ ኤፍሬማ ናጋራይነ ሳማርያ አሳ ኢታ ኦሱ ቆንጭ ቤቴ። አያዉ ጎፐ፥ ኡንቱንቱ ዎርዶቲኖ፤ ካይሳቱ ሶን ጎልያ መንꬅ ገሊደ ዉኢኖ፤ ፓንጋቱካ ካረን ቦንቂኖ። 2 ሽን ታን ኡንቱንቱ ኢታ ኦሱዋ ኡባ ሀሳይያዋ ኡንቱንቱ አኬክክኖ። ኡንቱንቱ ኢታ ኦሶቱ ኡንቱንታ ዶድ ዎꬄድኖ፤ ሄ ኢታ ኦሶቱ ኡባ ዎደካ ታ ስንꬃን ደኢኖ።
ካትያ ጎለን ደንዴዳ ማቁዋ
3 “ኡንቱንቱ ካትያ ባረንቱ ኢታተꬃን፥ ካፓቱዋካ ባረና ዎርዱዋን ናሸቺኖ። 4 ኡንቱንቱ ኡባይካ ሻርሙጻቱዋ፤ ዳቡዋ ኡክያዌ ጮጭያን ኤꬄዳ ታማዳን፥ ኡንቱንቱ ሀንቁዋን ኤጽ ከሲኖ። ሄ ኡክያዌ ሙናቂያዋ ፖሊደ፥ ሙናቃይ ደንዳና ጋካናዉ፥ ታማ ኤና። 5 ኑ ካትያ ባላ ቦንችያ ጋላስ፥ ማካላንቻቱ ካፓቱዋ ዎይንያ ኤሳን ማꬆዪደ ሀርግሴድኖ፤ ኡክያዌ ባረ ኩሽያ ደንꬂደ፥ ቅሊጭያዋንቶ ምጬ። 6 ኡንቱንቱ ዎዛናይ ታማ ጮጨ ማላ፤ ኡንቱንቱ ሺቂደ ማቀቴድኖ። ኡክያዌ ቃማ ኡባ ገምእሺደ አቄ፤ ሳአይ ዎንትያ ዎደ ታማ ላጩዋዳን፥ አ ሀንቁ ኤጽ ከሴ። 7 ኡንቱንቱ ኡባይካ ታማ ጮጭያዳን ምቺኖ፤ ባረና ሞድያዋንታ ሚኖ። ኡንቱንቱ ካተቱ ኡባይካ ኩንዴድኖ፤ ኡንቱንቱፐ ኦንነ ታና ጼስያዌ ባዋ።
እስራኤልያ አሳነ ሀራ ካዉተꬃቱዋ አሳ
8 “ኤፍሬማ አሳይ ሀራ ካዉተꬃቱዋ አሳና ዋላከቴዳ፤ ኤፍሬማ አሳይ አꬅ የግቤና ኡክꬃ ማላ ግዴዳ። 9 አላጋቱ አ ዎልቃ ሜድኖ፥ ሽን እ ሄዋ ኤርቤና፤ አ ሁጲካ ፑሉሜዳ፥ ሽን እ ሄዋ ኤርቤና። 10 እስራኤልያ አሳ ኦቶሩ ኡንቱንቱ ቦላን ማርካቴ። ሄዌ ኡባይ ሀንናካ ኡንቱንቱ መꬍና ጎዳኮ፥ ባረንቱ ጾሳኮ፥ ስምበይክኖ ዎይ አ ኮይበይክኖ።
እስራኤልያ አሳይ ጾሳን አማነትቤና
(7:11—8:14)
11 “ኤፍሬማ አሳይ ቆፋይ ባይና ኤያ ሀራጵያ ማላ። ማዱዋ ደማናዉ እቶደን ግብጼ ጼሴ፤ እቶደን ቃይ አሶረኮ ስሜ። 12 ኡንቱንቱ ብያ ዎደ፥ ታን ኡንቱንቱ ቦላን ግትያ የጋና፤ ታን ኡንቱንቱ ሳሉዋ ካፎቱዋዳን፥ ዱገ ጎቻደ ዎꬃና። ኡንቱንቱ ኢታ ኦሱዋ ድራዉ፥ ታን ኡንቱንታ ሙራና።
13 “ኡንቱንቶ አየ አና! አያዉ ጎፐ፥ ኡንቱንቱ ታፐ ዎራ ስሜድኖ። ኡንቱንታ ባይዝያባይ ዮ! አያዉ ጎፐ፥ ኡንቱንቱ ታ ቦላ ማካሌድኖ። ታን ኡንቱንቱ ዎዛናዉ ኮያድ፤ ሽን ኡንቱንቱ ታ ቦላ ዎርዱዋ ሃሳዪኖ። 14 ባረ ሂጻን ግሲደ ዝላሊኖፐ አትና፥ ባረንቱ ዎዛናፐ ታና ዎስክኖ። ካꬃዉነ ዎይንያ ኤሳዉ ባረንቱ ቦላ ማሻን ቃንጺደ፥ ሀራ ጾሳቱዋ ዎሲኖ፤ ሽን ኡንቱንቱ ታ ቦላ ማካሌድኖ።
15 “ታን ኡንቱንታ ሎህሳድነ ምንሳድ፤ ያትናካ ታዉ ኢታባ ማቀቲኖ። 16 ኡንቱንቱ ስሚኖ፥ ሽን ታኮ ስምክኖ። ኡንቱንቱ ዎራ ጾንግያ ዎንዳፍያ ማላ። ኡንቱንቱ ካፓቱ ኢታባ ሃሳይያዋ ሀዳን፥ ማሻን ዉራና፤ ሄዋን ኡንቱንቱ ግብጼ አሳን ቅሊጨታና።