9
እስራኤልያ አሳይ በስያ ሙሩዋ ደማና
(9:1-16)
1 እስራኤልያ አሳቶ፥ ናሸቶፕተ! ሀራ ካዉተꬃቱዋዳን፥ ፖጩ ጎፕተ! አያዉ ጎፐ፥ ህንተ ህንተ ጾሳፐ ሻከቲደ፥ ሻርሙጼድታ፤ ካꬃ ቡክያ ኡዱማ ኡባን ሻርሙጻታ እምያ ጋትያ ዶሴድታ። 2 ሄዋ ሀዳን ህንተ ኡዱማፐ ካꬃ፥ ዎይንያ ጉምኢያሳፐካ ኤሳ ደምክታ፤ ቃይ ዎይንያ ቱራይካ ኡንቱንቶ አይፈና። 3 ኡንቱንቱ መꬍና ጎዳ ቢታንካ ጋምእክኖ። ሽን ኤፍሬመ ግብጼ ቢታ ስማና፤ ቃይ አሶረ ጋድያን ቱና ቁማ ማና።
4 ኡንቱንቱ መꬍና ጎዳዉ ዎይንያ ኤሳ ያርሹዋ ጉስክኖ፤ ኡንቱንቱ ያርሹካ አ ናሸቼና። ሄ ያርሹ ኡንቱንቶ ሾቻ ማላ ግዳናዋ፤ ሄዋ ምያ ኡባይ ቱናና። ሄ ኡክꬃይ ኡንቱንቱ ማናሳፐ አትና፥ መꬍና ጎዳ ጌሻ ጎልያ ገለና። 5 ኬሬዳ ባላ ጋላስነ መꬍና ጎዳ ቦንችያ ባላ ጋላስ፥ ህንተ አያ ኡዳንቴ? 6 ኡንቱንቱ ባሻፐ ከስ አኮፐካ፥ ግብጼ ኡንቱንታ ሺሻና፤ መምፒሳ ግያ ካታማይ ኡንቱንታ ሞጋና። ኡንቱንቱ ሺሼዳ ብራ ሚሻ ኡባይ ሻራፋ ማይ አታና፤ ኡንቱንቱ ዱንካንያ ግዶንካ ቡሉ ቡዙ ሞካና።
7 ሙሩዋ ጋላሳይ ዬዳ፤ ጾሳይ አሳዉ አ ኦሱዋዳን ኦሱዋዳን ዛርያ ዎዲ ጋኬዳ። እስራኤልያ አሳይ ሄዋ ኤሮ! ህንተ ኢታ ናጋራ ድራዉነ ህንተ ሞርከተꬃ ድራዉ ህንተ፥ “ትምቢትያ ኦድያዋንቱ ኤያ፤ ሳፃ በእያዋንቱካ ጎይያዋንታ” ያጌድታ። ሉቃሳ 21:22 8 ትምቢትያ ኦድያዌ ታ ጾሳና እትፐ ግዲደ፥ ኤፍሬማ ናግያዋ። ሽን ሀመትያ ኦገ ኡባን ኤፍሬማዉ ካፉዋ ኦይቂያዋዳን፥ ጲሪ ዎꬍ ኡቴዳ፤ አ ጾሳ ጎልያንካ ሞርከተꬃይ ደኤ። 9 በን ግብኣ ካታማን ሀኔዳዋዳን፥ ኡንቱንቱ ሎይꬅ ቱኔድኖ። ጾሳይ ኡንቱንቱ ባይዙዋ ሀሳያና፤ ኡንቱንቱ ናጋራ ሙራና። ዳና. 19:1-30
እስራኤልያ አሳ ናጋራነ አ ካልያ ፕርዳ
10 ጾሳይ ሀዋዳን ያጌ፤ “ታን እስራኤልያ አሳ መላ ቢታን ዎይንያ ቴራ ደምያዋዳን ደማድ። ታን ህንተ አዎቱዋ ባላስያ ግያ ምꬃን ደእያ ኮይሮ አይፍያ በእያዋዳን በኣድ። ሽን ኡንቱንቱ ባኣል-ፓኦራ ግያሳ ዪደ፥ ባኣላ ግያ ኤቃዉ ጎይኔድኖ፤ ያቲደ ባረንቱ ዶሴዳ ኤቃዳንካ ቱኔድኖ። ፓይ. 25:1-5 11 ኤፍሬማ ቦንቹ ካፉዋዳን ፓል ꬋያና፤ ሀዋፐ ስንꬃናዉ የልያባይ ባዋ፤ ሻሃራይካ ባዋ፤ ሻሃርያባይ ባዋ። 12 ኡንቱንቱ ናናቱዋ የሊደ ድቾፐካ፥ እቱነ አተናን ዎꬋ ድጋደ፥ ኡንቱንቱ የሉ ባይና አሳ ከሳና። ታን ኡንቱንቱፐ ሃኬዳ ዎደ፥ ኡንቱንቶ አየ አና። 13 ኤፍሬማ አሳይ ሎይꬅ ሎእያ ታየረ ቢታ ማትያዋ በኣድ፤ ኤፍሬማ አሳይ ባረንቱ ናናቱዋ ሹክያዋንቶ ከሲደ እማናዉ ኮሼ” ያጌ።
14 አቤት መꬍና ጎዳዉ፥ ኡንቱንቶ እማ! ኔን ኡንቱንቶ አያ እማኒ? ኔን ኡንቱንቶ ቦሸትያ ቃንꬃነ መሌዳ ꬋንꬃ እማ።
15 ጾሳይ ሀዋዳን ያጌ፤ “ኡንቱንቱ ኢታተꬃ ኡባይ ገልጋላ ግያ ሳና፤ ታን ኡንቱንታ እጽያዋ ያን ዶማድ። ኡንቱንቱ ኦሱዋ ኢታተꬃ ድራዉ፥ ታን ኡንቱንታ ታ ጎልያፐ የደርሳና፤ ሀዋፐ ስንꬃናዉ ታን ኡንቱንታ ሲቅከ፤ ኡንቱንታ ሞድያዋንቱካ ማካላንቻ። 16 ኤፍሬማ አሳይ ደሸትና፥ ኡንቱንቱ ጻጱ መሌዳ፤ አይፍያካ አይፍክኖ። ኡንቱንቱ ናናቱዋ የሎፐካ፥ ታን ኡንቱንቱ ሲቅያ ናናቱዋ ዎꬋና” ያጌ።
እስራኤልያ አሳዉ እመቴዳ ሴራ
(9:17—10:15)
17 ኡንቱንቱ ታን ጾሳይ ግያዋ ስሰና ድራዉ፥ እ ኡንቱንታ ፕጽ ኦላና፤ ኡንቱንቱ ካዉተꬃቱዋ ግዶን ቶይላካትያዋንታ ግዳና።