1 እስራኤልያ አሳይ ዳሼዳ ዎይንያ ቱራ ማላ፤ ኡንቱንቱ ባረዉ አይፍያ አይፊኖ። ኡንቱንቱ አይፍያ አይፊ ዳሬዳ ኬና ያርሽያ ሳኣ ዳርስ ኬጼድኖ። ኡንቱንቱ ቢታይ ዱረቴዳ ኬና፥ ጎይንያ ኤቃ ቱሳቱዋ አሌቂሲደ መꬌድኖ። 2 ኡንቱንቱ ዎዛናን ገኒ ኩሜዳ፤ ሀእ ኡንቱንቱ ባረንቱ ባይዙዋ ሙሩዋ አካናዉ ኮሼ። መꬍና ጎዳይ ኡንቱንቱ ያርሽያ ሳኣ ላላና፤ ኡንቱንቱ ኤቃ ቱሳቱዋ ꬋይሳና።

3 ሄ ዎደ ኡንቱንቱ፥ “ኑን መꬍና ጎዳዉ ያይቤና ድራዉ፥ ኑዉ ካቲ ባዋ፤ ሽን ኑዉ ዎን ካቲ ደእንቶነ አያ ኦꬃኔ?” ያጋና። 4 ኡንቱንቱ ሀዳባ ሃሳዪኖ፤ ጫቁዋ ጫቀቲደካ ዎርዱዋን ጫቂኖ። ሄዋ ድራዉ፥ ዎꬍያ ሻራፋይ ሾይቃን ዶልያዋዳን፥ ኡንቱንቱ ቦላን ፕርዳይ ዶላና። 5 ሳማርያ ካታማን ደእያ አሳይ ቤት-አዌናን ደእያ ማራ ምስልያዉ ያዪኖ። አ ቦንቹ አፐ ሻከት ክቼዳ ድራዉ፥ አሳይ አዉ ዬካና፤ ሄ ኤቃ ምስልያዉ ኦꬅያ ቄሳቱ ካ ዋሳና። 6 ሄ ኤቃ ምስሊ አሶረ ቢታ ቶከት ቢደ፥ ዎልቃማ ካትያዉ ጊራዳን እመታና። ኤፍሬማ አሳይ ዬላታና፤ እስራኤልያ አሳይካ ባረ ኤቃ ምስለቱዋ ሀዳን ካዉሻና።

7 ሳማርያ ካቲ ሃꬃ ቦላን ቃይጼሪ ቶከትያዋዳን፥ ቶከት ꬋያና። 8 ቃይ እስራኤልያ አሳይ አዌና ግያ ካታማን ኤቃዉ ጎይኒደ፥ ናጋራ ኦꬅያ ꬎቃ ሳአቱካ ኮለታና፤ ኡንቱንቱ ያርሽያሳን አጉንꬃይነ ጎምኦሪ ሞካና። ያትና፥ ኡንቱንቱ ደረቱዋ፥ “ኑና ገንꬅተ!” ያጋና። ከራቱዋካ፥ “ኑ ቦላ ኩንድተ!” ያጋና። ሉቃሳ 23:30፤ ሳፃ 6:16

9 ጾሳይ ሀዋዳን ያጌ፤ “እስራኤላቶ፥ ህንተ ግብአን ናጋራ ኦꬄዳ ጋላሳፐ ዶሚደ፥ ናጋራ ኦꬅያዋ አግበይክታ። ሄዋ ድራዉ፥ ግብኣ ካታማን ህንተ ቦላ ኦላይ ደንዳና። ዳና. 19:1-30 10 ታን ኮይያ ዎደ፥ ሄ ማካላንቻቱዋ ሙራና። ኡንቱንቱ ኦꬄዳ ላኡ ናጋራ ጋሱዋን ታን ኡንቱንታ ሙሪያ ዎደ፥ ካዉተꬃቱ ኡንቱንቱ ቦላን ሺቃና።

11 “ኤፍሬመ ካꬃ የꬃ ዶስያ፥ ዋꬊደ ከሴዳ ኮሩማ ማላ፤ ሽን ታን አ ፑላ ሞርግያን ሞርገ ምꬃ ዎꬃደ ዋጻና። ይሁዳ አሳይ ጎሻናዉ ኮሼ፤ ያቆባ አሳይካ ጋድያ ጳልቃናዉ ኮሼ። 12 መꬍና ጎዳይ ዪደ፥ ጽሎተꬃ ህንተ ቦላ እራዳን ቡክሳና ጋካናዉ፥ ህንተ አ ኮይያ ዎደ ግድያ ድራዉ፥ ህንተዉ ጽሎተꬃ ዘርተ፤ አገና ሲቁዋ ጫክተ፤ ኦꬃ ቢታካ ጳልቂተ። ኤር. 4:3

13 “ህንተ ኢታተꬃ ዘሪደ፥ ናጋራ ጫኬድታ፤ ህንተ ዎርዱዋ አይፍያካ ሜድታ።

“ህንተ ህንተ ዎልቃንነ ህንተ ዳሮ ኦላንቻቱዋን አማነቴዳ ድራዉ፥ 14 ህንተ አሳ ቦላ ኦላ ድርባይ ደንዳና፤ በን ኦላ ዎደ ካቲ ሻልማን ቤት-አርቤላ ካታማ ኦሊደ ባይዜዳዋዳንነ አየቱዋናነ ናናቱዋና ጋꬆ መንሬꬄዳዋዳን፥ ህንተ ጌሶቱ ሄዋዳን ኦልና ባያና። 15 ህንተኖ፥ ቤቴለ ካታማ አሳቶ፥ ህንተ ዎልቃማ ኢታተꬃ ሀዳን ህንተ ቦላካ ሀዋ ማላባይ ጋካና። ሄ ጋላስ ሳአይ ዎንትያ ዎደ፥ እስራኤልያ ካቲ ኡባና ꬋያና።