1 “እስራኤሊ ናአተꬃን ደእያ ዎደ፥ ታን አ ሲቃድ፤ ታን ታ ናኣ ግብጼ ጋድያፐ ጼሳድ። 2 ታን ኡንቱንታ ዳርሳደ ጼስና፥ ኡንቱንቱ ታፐ ዳሮ ሃኪደ ቤድኖ። ባኣላ ጌተትያ ኤቃቶ ያርሹዋ ያርሼድኖ፤ ቃይ ኤቃ ምስለቶ እጻና ጩዋዬድኖ። 3 ኤፍሬማ አሳ ሀራቅያ ኦይቃደ ሀመꬃ ታማርሴዳዌ ታና፤ ሽን ኡንቱንቱ ፓꬄዳዌ ታና ግድያዋ ኡንቱንቱ ኤርክኖ። 4 ታን ኡንቱንቱ ቃረታንነ ሲቁዋ ዎዶሩዋን ጎቻድ፤ ኡንቱንቱ ሞርግያፐ ሞርገ ምꬃ ደንꬃድ፤ ሆካደ ኡንቱንታ ሙዛድ።

5 “ኡንቱንቱ ታኮ ስመናን እጼዳ ድራዉ፥ ግብጼ ቢታ ስማና፤ ቃይ አሶረ ቢታ ካቲ ኡንቱንቱ ቦላ ካተታና። 6 ኡንቱንቱ ሞርክያ ማሻይ ኡንቱንቱ ካታማቱዋ ኦላና። ኡንቱንቱ ካታማቱዋ ፐንገቱዋካ መንሬꬃና፤ ኡንቱንቱ ዞረታይካ ላለታና። 7 ታ አሳይ ታፐ ሃኪደ ባናዉ ቆፋ ቃቼዳ። ሁቁና ሞርገ ምꬃ ጋሱዋን ኡንቱንቱ ዋሳና፤ ሽን ኦንነ ሄ ሞርገ ምꬃ ኡንቱንቱ ሞርግያፐ ደንና።

8 “ኤፍሬማ፥ ታን ኔና ዋታደ አጎ? እስራኤልያዉ፥ ታን ኔና ዋታደ አꬃ እሞ?ዛረ. 29:23 ታን ኔና ዋታደ አዳማ ግያ ካታማዳን ኦꬆ? ታን ኔና ዋታደ ጻቦይማ ግያ ካታማዳን ኦꬆ? ታን ኔና ሎይꬅ ሲቅያ ድራዉ፥ ታ ዎዛናይ ሄዋ ኤኖ ጌና። 9 ታን ታ ሱልያ ሀንቁዋን ኡንቱንታ አይነ ኦꬅከ፤ ቃይ ኤፍሬማ ላኤንꬁዋ ꬋይስከ። አያዉ ጎፐ፥ ታን ጾሳፐ አትና፥ አሳ ግድከ። ታን ጌሻ ጾሳይ ህንተ ግዶን ደአይ፤ ህንተኮ ሱሎ ሀንቁዋን ዪከ።

10 “ኡንቱንቱ መꬍና ጎዳ ካላና፤ እካ ጋሙዋዳን ጉዳና። እ ጉድያ ዎደ፥ አ ናናይ አዋይ ዉልያ ባጋፐ ያና፤ 11 ግብጼ ጋድያፐ ካፎቱዋዳን፥ አሶረ ቢታፐካ ሀራጰቱዋዳን፥ ፓሊደ ያና። ታን ኡንቱንታ ኡንቱንቱ ጎልያን ጎልያን ዎꬃና። ታን መꬍና ጎዳይ ሀዋ ኦዳድ” ያጌ።

12 ኤፍሬማ አሳይ ዎርዱዋን፥ እስራኤልያ አሳይካ ጭሙዋን ታና ዶዴድኖ። ይሁዳ አሳይካ አማንꬅያ ጌሻ ጾሳ ቦላ ጻልታሜዳ።