1 ኤፍሬማ አሳይ ዎንታፐ ኦማርስ ጋካናዉ ኦꬅያባይ ኡባይ፥ አዋይ ዉልያ ባጋፐ ይያ ጫርኩዋ ኩጭያዋዳን ዎይ የደርስያዋ ማላ ጎኤና። ኡንቱንቱ ዎርዱዋነ ማካላ ኦሱዋ ዳርሲኖ፤ አሶረ ቢታና ጫቁዋ ጫቀቲኖ፤ ዎጋራ ዛይትያ ግብጼ ቢታ የዲኖ።

2 መꬍና ጎዳዉ ይሁዳ አሳና ሞቱ ደኤ፤ እ ያቆባ አሳ ኡንቱንቱ ኦግያዳን ሙራና፤ ኡንቱንቱ ኦሱዋዳንካ አዉ ዛራና። 3 ያቆብ ባረ ዳይ ኡሉዋን ደኢደ፥ ባረ እሻ ግንድያ ኦይቄዳ። ቃይ ጋማ ጋኪደ፥ ጾሳና ባጸቴዳ፤ ዶመꬃ 32:24-26 4 ኪታንቻናካ ባጸቴዳ ጾኔዳ። ባረና ኬካ አይፍያን ጼላናዳን፥ ዬኪደ ዎሴዳ። ያቆብ ጾሳ ቤቴለን ደሜዳ፤ ጾሳይ ያን አናና ሃሳዬዳ። ዶመꬃ 28:10-22 5 ሄዌ መꬍና ጎዳ፥ ኡባፐ ዎልቃማ ጾሳ። እ ኤረቴዳ ሱንꬃይካ መꬍና ጎዳ ጌተቴ። 6 ሄዋ ድራዉ፥ ህንተ ጾሳኮ ስምተ፤ ሲቁዋነ ሱረ ፕርዳ ምንስ ኦይቂተ፤ ህንተ ጾሳይ ኦꬃናዉ ናግተ።

7 ዛልአንቻ ኩሽያን ዎርዶ ሚዛናይ ደኤ፤ አሳ እ ጭምያዋ ዶሴ። 8 ኤፍሬመ፥ “ታን ዳሮ ዱረ፤ ታን ታዉ ዱረታ ደማድ። ታ አቁዋ ኡባ ግዶን ታናን ኡንቱንቱ ባላ ዎይ ናጋራ ግድያባ ደምክኖ” ያጌዳ።

9 መꬍና ጎዳይ ሀዋዳን ያጌ፤ “ታን ህንተና ግብጼ ጋድያፐ ከሳደ አሄዳ መꬍና ጎዳ ህንተ ጾሳ፤ ዳስያ ባላ ጋላሳዳን፥ ታን ህንተና ላኤንꬁዋካ ዱንካንያን ዎꬃና።ዎጋ 23:42-43 10 ታን ትምቢትያ ኦድያዋንቶ ሃሳያድ። ዳሮ ሳጻካ ኡንቱንቶ እማድ፤ ቃይ ኡንቱንቱ ባጋና ዳሮ ሌምሳቱዋ ኦዳድ” ያጌ።

11 ጋላኣደን ናጋራይ ደኤ፤ ጋላኣደ አሳቱ ቱሙዋፐ ፓናዋንታ። ኡንቱንቱ ገልጋላን ኮሩማቱዋ ያርሺኖ። ሄዋ ድራዉ፥ ኡንቱንቱ ያርሽያ ሳአቱ ጎሻ ግዶን ኬሌዳ ሹቻ ማላ ግዳናዋ።

12 ያቆብ ሶርያ ቢታ ባቃቴዳ፤ እስራኤሊ ማጫ አሳ አካናዉ ከራ ኦꬄዳ። ማጫ አሳ አካና ድራዉ፥ እ ያን ዶርሳ ሄሜዳ። ዶመꬃ 29:1-20 13 መꬍና ጎዳይ እስራኤልያ አሳ ትምቢትያ ኦድያዋ ባጋና ግብጼ ጋድያፐ ከሴዳ፤ ሄ ትምቢትያ ኦድያዋ ባጋና ኡንቱንታ ናጌዳ። ከሳ 12:50-51 14 ሽን ኤፍሬመ ጾሳ ሎይꬅ ሀንቀꬅሴዳ፤ ሱꬃ እ ጉሴዳዋ አጩዋ አ ጎዳይ አ አቻና፤ ቃይ አ ጫሻ አዉ ዛራና።