1 ካቲ ኦዝያነ ሀይቄዳ ላይꬅ ጎዳይ ቦላንነ ꬎቃ አራታን ኡቴዳዋ በኣድ፤ አ ማዩ ጌሻ ጎልያ ኩሜዳ። 2 ካታ. 15:7፤ 2 ኦዱዋ 26:23 2 ሱራፌላ ጌተትያ ኪታንቻቱ አፐ ቦላና ደኢኖ፤ እት እት ሱራፌልያዉ ኡሱፑን ቀፈቱ ደኢኖ፤ ላኡ ቀፈቱዋን ባረ ሶምኡዋ ካሜ፤ ላኡ ቀፈቱዋን ባረ ገድያ ካሜ፤ ላኡ ቀፈቱዋን ፓሌ። 3 እቱ እቱዋና፥ “ጌሻይ፥ ጌሻይ፥ ጌሻይ ኡባፐ ዎልቃማ መꬍና ጎዳ! ሳኣ ኡባይ አ ቦንቹዋን ኩሜዳ” ያጊደ ጼሰቴድኖ። ሳፃ 4:8 4 ኡንቱንቱ ጼሳ ኮሻን ጌሻ ጎልያ ባሱ ቃጼዳ፤ ቃይ ጌሻ ጎሊ ጩዋን ኩሜዳ። ሳፃ 15:8

5 ያትና፥ ታን፥ “ታዉ አየ አና! ታን ባያድ፤ አያዉ ጎፐ፥ ታን ዶናይ ቱኔዳ አሳ፤ ቃይ ዶናይ ቱኔዳ አሳቱዋ ግዶን ደአይ፤ ታን ካትያ፥ ኡባፐ ዎልቃማ መꬍና ጎዳ ታ አይፍያን በኣድ” ያጋድ።

6 ሱራፌላቱዋፐ እቱ ያርሽያ ሳኣፐ ቃጴዳ ታማ ቦንቁዋ አኪደ ፓሊደ፥ ታኮ ዬዳ። 7 ታማ ቦንቁዋን ታ ዶና ቦቺደ፥ “በአ፤ ሀ ታማ ቦንቁ ነ ዶና ቦቼዳ፤ ነ ባይዙ ኔፐ ክቼዳ፤ ነ ናጋራይካ አቶ ጌተቴዳ” ያጌዳ።

8 ሄዋፐ ጉይያን ጎዳይ፥ “ኦና ኪቶ? ኑዉ ኦኔ ባናዌ?” ያግሽን ስሳድ። ሄዌካ፥ “ሄኮ፥ ታና ኪታ” ያጋድ።

9 ጎዳይ ሀዋዳን ያጌዳ፤ “ባ፤ ሀ አሳዉ፥ ‘ህንተ ስሳ ስሲታ፤ ሽን ህንተንቶ ገለና፤ ጼሉዋካ ጼሊታ፤ ሽን በእክታ’ ያጋደ ኦዳ። ማቶሳ 13:14-15፤ ማር. 4:12፤ ሉቃሳ 8:10፤ ዮሃ. 12:40፤ ኪታ 28:26-27 10 ሀ አሳ ዎዛና ዶንጭልሳ፤ ኡንቱንቱ ሀይꬃካ ቱልሳ፤ ኡንቱንቱ አይፍያካ ቆቅሳ፤ ሄዌ ꬋዮፐ፥ ኡንቱንቱ ባረንቱ አይፍያን በአና፤ ባረንቱ ሀይꬃን ስሳና፤ ባረንቱ ዎዛናንካ አኬካና፤ ያቲደ ኡንቱንቱ ታኮ ስማናነ ፓጻና” ያጌዳ።

11 ያትና፥ ታን፥ “አቤት ጎዳዉ! ሀዌ አይደ ጋካናሴ?” ያጋድ።

እ ዛረꬂደ፥ “ካታማቱ ደእያ አሳ ꬋዪደ፥ ኮለታና ጋካናሳ፥ ጎለቱካ ኦናና ጋካናዉነ ቢታይካ ኡባና መላ ግዳና ጋካናሳ። 12 ታን መꬍና ጎዳይ አሳ ሃሳና፤ ቢታካ መላ ከሳና። 13 ታሙ አሳፐ እት አሳይ ጋድያ ቦላ አቶፐ፥ እካ ꬋያና፤ ቃንጽ ድግና አቴዳ ዎላ ዱሩማ ማላ ግዳናዋ፤ ሄ ዱሩማይ ጌሻ ዘረꬃ ግዳናዋ” ያጌዳ።