1 አሞጻ ናኣ ኢስያሳ ዉ ጾሳይ ባብሎነዋ ቆንጭስና በኤዳዌ ሀዋ። ኢሳ. 47:1-15፤ ኤር. 50:1—51:64

2 መላ ደርያ ቦላ ባንድራ ኤስተ፤ ህንተ ቃላ ꬎቁ ኦꬂደ፥ ኡንቱንቶ ዋስተ፤ ኡንቱንቱ ካፓቱዋ ፐንግያና ገላና ማላ፥ ዉትተ። 3 ታን ሀንቀቴዳዋንታ ሙራና ማላ፥ ታ ጌሻቱዋ አዛዛድ፤ ታን ጾንያዋን ናሸትያ ታ ዎልቃማ ቶራንቻቱዋካ ጼሳድ።

4 ጮራ አሳይ ጫቦትያዋዳን፥ ደርያ ሁጲያን ጫቦትያ ዋላሳ ስስተ! ቃይ ካዉተꬃቱ እትፐ ሺቂደ ሻቢረትያ ዋላሳ ስስተ! ኡባፐ ዎልቃማ መꬍና ጎዳይ ቶራንቻቱዋ ኦላዉ ሳልፕሴ። 5 መꬍና ጎዳይነ እ ባረ ሀንቁዋ ፖልሳናዉ ጎኤትያ ሚሻቱ ቢታ ኡባ ꬋይሳናዉ፥ ሃኮ ጋድያፐ፥ ሳሎቱዋ ጋጻፐ ዪኖ።

6 መꬍና ጎዳ ጋላሳይ ማቴዳ ድራዉ ዬክተ! ሄ ጋላሳይ ኡባፐ ዎልቃማ ጾሳ ማታፐ ባሻዳን ያና። ኢዩ. 1:15 7 ሄዋ ድራዉ፥ ኩሽያ ኡባይ ህልስ ጋና፤ አሳ ኡባ ዎዛናይካ ሲላና። 8 ኡንቱንቱ ዳጋማና፤ ኦይꬃይነ ዬላይ ኡንቱንታ ኦይቃና። የሉ ኦይቄዳ ምሽራቲዳን፥ ኡንቱንቱ ኦይቀታና። ኡንቱንቱ ዳጋሚደ፥ እቱ እቱዋ ጼላና፤ ኡንቱንቱ ሶምኢካ ዳጋማን ቦጻና። 9 በእተ፤ መቀꬃ ኢሲደ፥ ይሉዋንነ ሱሎ ሀንቁዋን ጋድያ መላ ከሳናዉነ አን ደእያ ናጋራንቻቱዋ ꬋይሳናዉ፥ መꬍና ጎዳ ጋላሳይ ዬ። 10 ሳሉዋ ጾልንተቱነ ጾልንተቱዋ ጭታቱ ባረንቱ ፖኡዋ እመናን እጻና፤ አዋ አይፊ ዶሊደ ꬉማና፤ አግናይካ ፖኤናን አጋና። ህዝ. 32:7፤ ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13

11 ጾሳይ ሀዋዳን ያጌ፥ “ታን ሀ ሳኣ አ ኢታተꬃ ድራዉ፥ ኢታቱዋካ ኡንቱንቱ ናጋራ ድራዉ ሙራና። ታን ኦቶራንቻቶ ኦቶሩዋ ድጋና፤ መቀꬃ ኢታቱዋ ኦቶሩዋካ ካዉሻና። 12 አቴዳ አሳይ አልኦ ዎርቃፐ አꬊደ አልአና፤ ኦፊራ ዎርቃፐካ አꬊደ አልአና። 13 ሄዋ ድራዉ፥ ኡባፐ ዎልቃማ መꬍና ጎዳ ሀንቁዋን፥ አ ሀንቁዋ ሱሉዋ ጋላስ ታን ሳሎቱዋ ኮኮርሳና፤ ሳአይካ ባረ ደኢያሳፐ ካጻና” ያጌ።

14 ሻንካፐ ባቃትያ ጋራዳን፥ ዎይ ሄምያ አሳይ ባይና ዶርሳ ዉድያዳን፥ አሳይ ኡባይ ባረ አሳኮ አሳኮ ስማና፤ ኡባይካ ባረ ቢታ ባቃታና። 15 ቤቴዳዌ ኦንነ ጫደታና፤ ኦይቀቴዳዌ ኦንነ ማሻን ሀይቃና። 16 ኡንቱንቱ ጉꬃ ናናይ ኡንቱንቱ ስንꬃን ቡሳከታና፤ ኡንቱንቱ ጎለቱካ ቦንቀታናዋ፤ ኡንቱንቱ ማጫ አሳቱዋናካ ዎልቃን ሀራ አቱማ አሳቱ ጋከታና።

17 በእተ፥ ብራ ኮየና፥ ዎርቃንካ ናሸተና ሜዶና ጋድያ አሳቱዋ ታን ኡንቱንቱ ቦላን ደንꬃና። 18 ኡንቱንቱ ዎንዳፈቱ ዎዳላቱዋ ዎꬊኖ፤ ጉꬃ ናናቱዋካ የድ ማርክኖ፤ ኡንቱንቱ አይፊ ፑርጋእያ ናናቶካ ቃረተና። 19 ካዉተꬃቶ ቦንቹዋ፥ ቃይ ባብሎነ አሳዉካ አሌቆነ አዉ ግዴዳ ባብሎነ ጋድያ ጾሳይ ሶዶማዳንነ ጋሞራዳን አꬅ የጋና። ዶመꬃ 19:24 20 ሄ ጋድያን ሙለካ አሳይ ኡተና፤ ዎይ የለታፐ የለታ ጋካናዉካ ያን አሳይ ደኤና፤ አራባ አሳይካ ያን ባረ ዱንካንያ ቶለና፤ ዶርሳ ዉድያ ሄምያዋንቱካ ያን ባረንቱ ዉድያ አላጽሲኖ። 21 ሽን ያን ባዙዋ ዶአቱ አላጻና። ዎራካናቱ ኡንቱንቱ ጎልያ ኩማና፤ ጉታቱ ሄዋን ደአና፤ ባዙዋ ዴሻቱ ሄዋን ጉፓና። ኢሳ. 34:14፤ ሶፎ. 2:14፤ ሳፃ 18:2 22 ኡንቱንቱ ጎለቱዋን ባባርቂ ዋሳና፤ ኡንቱንቱ ቦንቾ ካትያ ጎለቱዋንካ ዎራካናይ ቦጫና። አ ዎዲ ማታቴዳ፤ ጋላሳይካ ጋምኤና።