1 መꬍና ጎዳይ እስራኤልያ አሳዉ ቃረታና፤ እስራኤልያካ ዛረꬂደ ዶራና። ኡንቱንታ ኡንቱንቱ ቡዞ ጋድያን ዎꬃና፤ እማꬃቱ ዪደ ኡንቱንቱና ጋከቲደ፥ እስራኤልያ አሳና እትፐ ደአና። 2 ዳሮ ካዉተꬃይ እስራኤልያ አሳ አኪደ፥ ኡንቱንቱ ሳኣ አሀና፤ እስራኤልያ አሳይ ካዉተꬃቱዋ ማጫነ አቱማ ቆማዳን፥ መꬍና ጎዳ ጋድያን ሞዳና። ኡንቱንቱ ባረና ኦሞዴዳዋንታ ኦሞዳና፤ ባረና ኡቁኔዳዋንታካ ሞዳና።

3 መꬍና ጎዳይ ህንተና ህንተ ቱጋፐ፥ መቱዋፐነ ህንተ ሞደቴዳ ኢታ አይለተꬃፐ ሸምፕሴዳ ጋላስ፥ 4 ህንተ ባብሎነ ካትያ ቦላ ሀዋዳን ያጊደ ቅሊጫና፤ “ኡቁንያዌ ዋን አጌዴ፤ አ ሀንቁዋ ሱሉካ ዋን አቴዴ! 5 መꬍና ጎዳይ ካዉተꬃቱዋ ጻምኣነ ሞድያዋንቱ ጋትማ መንꬄዳ። 6 ኡንቱንቱ አሳ ዉርሰꬅ ባይና ሀንቁዋን ሾጬድኖ። ባረንታ ጾኔዳ አሳቱዋ ቃንጸናን ኡንኤꬂደ ደኤድኖ። 7 ቢታ ኡባይ ኡንቱንቱፐ ሸምፒደ፥ ዎፓን ደኤ፤ አሳይካ የꬃ የጼ። 8 ሀራይ አትና፥ ዝጋቱካ ሊባኖሳ ጽደቱካ፥ ካትያ ኩንደꬃን ናሸቲደ፤ ‘ኔን ካዉሻደ ዎꬎደፐ፥ ኑና ቃንጻናዉ ይያዌ ባዋ’ ያጊኖ።

9 “ኔን ይያ ዎደ፥ ስኦሊ ኔና ሞካናዉ ህርክን ጊጌዳ፤ እ ካሰ ጋድያ ካለꬄዳ አሳቱዋ ሞይትለቱዋ ኔና ሳሮታናዳን ደንꬄ፤ ቃይ ካሰ ካዉተꬃቶ ካትያ ግዴዳ ኡባቱዋካ ኡንቱንቱ አራታፐ ደንꬅ ኤሴ። 10 ኡንቱንቱ ኡባይካ ሀዋዳን ያጋና፤ ‘ሄኮ ኔንካ ኑዋዳን፥ ዎልቃ ꬋያዳ፤ ኔንካ ኑ ማላ ግዳዳ! 11 ካሰ ዲꬃ ዲጺደ ሳቢያ ነ ቦንቹ ስኦልያን ዱገ ገሌዳ። ዱቻቱ ኔን ግስያ ግሱዋ፤ ጉጹነቱካ ኔን ማይያ አፍላ ግዳና’ ያጋና።

12 “ኔኖ ዎንታ ናአዉ፥ ባካልያዉ፥ ሳሉዋፐ ዋና ኩንዳዲ! ኔኖ ካዉተꬃ ካዉሼዳዎ፥ ዋና ቃንጸታደ ሳኣን ዎꬋአዲ!ሳፃ 8:10፤ 9:1 13 ኔን ነ ዎዛናን፥ ‘ታን ሳሉዋ ከሳና፤ ታ ካዉተꬃ አራታካ ጾሳ ጾልንተቱዋፐ ቦላና ꬎቃን ዎꬃና፤ ሁጲሳ ባጋ ጋጻን፥ ያአይ ሺቅያ ደርያ ሁጲያን ኡታና። ማቶሳ 11:23፤ ሉቃሳ 10:15 14 ሻረቱ ደእያ ꬎቃፐካ ሁጲያዉ ፑደ አꬋና፤ ታን ታና ኡባፐ ꬎቂያ ጾሳ ማላ ኦꬃና’ ያጋዳ። 15 ሽን ኔን ስኦልያን፥ ህርክ ጪማ ኦላን ዱገ የገታዳ።

16 “ኔና በእያዋንቱ፥ ‘ቢታ ቃꬄዳዌ፥ ካዉተꬃቱዋ ኮኮርሴዳዌ፥ 17 ሳኣ ባዙዋ ከሴዳዌ፥ ሳኣን ደእያ ካታማቱዋካ አꬅ የጌዳዌ፥ ባረ ቃሾ አሳቱዋካ ጎለ የደናን ድጌዳ ብታኒ ሀዌ?’ ያጊደ ትሽ ኦꬅ አኬኪደ ጼላና።

18 “ካዉተꬃቱዋ ካተቱ ኡባይ ባረ ዱፉዋን ዱፉዋን ቦንቹዋን ግሳና። 19 ሽን ኔን እጸቴዳ ታሽያዳን፥ ነ ዱፉዋፐ ጋጻ ኦለታዳ፤ ነ አሃይ ማሻን ጫደት ሀይቄዳ አሃን፥ ቃይ ኦላን ደእያ ሹቻቱዋኮ ዱገ ዎꬍያዋንቱ አሃን ካመቴዳ። ኔን ገድያን የደርሴዳ አሃ ማላ ግዳዳ። 20 ኔን ሞጉዋካ ኡንቱንቱና እትፐ ሞገታካ፤ አያዉ ጎፐ፥ ኔን ነ ጋድያ ባይዛዳ፤ ነ አሳካ ዎꬋዳ። ኢታ ኦꬅያዋንቱ ሱንꬃይ ላኤንꬆ ሙለካ ጼሰቶፖ። 21 ኡንቱንቱ አዎቱዋ ናጋራ ድራዉ፥ ናናቱዋ ዎꬋናዉ ጊግስተ፤ ሄዌ ꬋዮፐ ኡንቱንቱ ደንዲደ፥ ጋድያ ላታና፤ ሳኣ ኡባካ ካታማ ሳላላ ኦꬃና” ያጋና።

22 ኡባፐ ዎልቃማ መꬍና ጎዳይ ሀዋዳን ያጌ፤ “ታን ኡንቱንቱ ቦላን ደንዳና፤ ኡንቱንቱ ሱንꬃ፥ ኡንቱንቱ አቶተꬃ፥ ኡንቱንቱ ዘረꬃነ ኡንቱንቱ የለታ ባብሎነፐ ꬋይሳና። 23 ታን ባብሎነ ጉታታ ደኢያሳነ ሃꬃይ ኤልያሳ ኦꬃና፤ ባሻ ፑጻን ታን አ ፕታና። ታን ኡባፐ ዎልቃማ መꬍና ጎዳይ ሀዋ ኦዳይ” ያጌ።

24 ኡባፐ ዎልቃማ መꬍና ጎዳይ ሀዋዳን ያጊደ ጫቄዳ፤ “ታን ሀልቼዳዋዳን ሀናና፤ ታን ቆፔዳዋዳንካ ፖለታና። ኢሳ. 10:5-34፤ ናሆማ 1:1—3:19፤ ሶፎ. 2:13-15 25 ታን አሶረ ጋድያ ብታንያ ታ ጋድያን መንሬꬃና፤ ታ ደረቱዋ ሁጲያን ታን አ የꬋና፤ አ ሞርገ ምꬃይ ኡንቱንቱ ቦላፐ፥ አ ቶኩካ ኡንቱንቱ ሀሽያፐ ክቻና” ያጌዳ። 26 ሳአዉ ሙልያዉ ቆፈቴዳ ቆፋይ ሀዋ፤ ካዉተꬃቱዋ ኡባ ቦላን ምጨቴዳ ኩሺካ ሀዋ። 27 ኡባፐ ዎልቃማ መꬍና ጎዳይ ሀዋ ቆፔዳ ድራዉ፥ አ ኦን ድጋናዉ ዳንዳዪ? አ ኩሺካ ምጨቴዳ፤ ሄዋ ኦን ጉየ ዛራናዉ ዳንዳዪ?

28 ካቲ አካዝ ሀይቄዳ ላይꬅ ኦደቴዳ ቃላይ ሀዋዳን ያግያዋ፤ 2 ካታ. 16:20፤ 2 ኦዱዋ 28:27 29 “ህንተኖ ፕልስጼማ አሳቶ ኡባቱካ፥ ህንተና ሾጬዳ ጻምአይ መኤዳ ድራዉ ናሸቶፕተ፤ አያዉ ጎፐ፥ ሄ ሾሻ ዛርያፐ ሀሱ ከሳና፤ አ ዘረꬃይካ ቃይ ፓልያ ሾሻ ግዳናዋ። ኤር. 47:1-7፤ ህዝ. 25:15-17፤ ኢዩ. 3:4-8፤ አሞጻ 1:6-8፤ ሶፎ. 2:4-7፤ ዛካ. 9:5-7 30 ህዬሳቱዋ ባይራ ናናይ ቁማ ማና፤ መቶታንቻቱ ዎፑ ጊደ ግሳና። ሽን ታን ነ ዛርያ ኮሻን ዉርሳና፤ ቃይ ኔፐ አቴዳዋንታካ ዎꬋና።

31 “ኔኖ ፐንግያዉ፥ ዬካ! ኔኖ ካታማዉ፥ ዋሳ! ህንተኖ ፕልስጼማ አሳዉ ኡባዉ፥ ህንተ ኡባይካ ህርጋን ሙሽተ! አያዉ ጎፐ፥ ሁጲሳ ባጋፐ ጩዋይ ከሲደ ዬ፤ ሄ ጭታፐ ዱጺደ ጉየ አትያዌ ባዋ። 32 ካዉተꬃይ ኪቴዳዋንቶ ዋጊደ ዛራኔ? መꬍና ጎዳይ ‘ጽዮኖ ኬጼ፤ ቆሄቴዳ አ አሳይ እ ግዶን ቆሰት አትያሳ ደሜዳ’ ያጋና” ያግያ ቃላይ ኦደቴዳ።