1 ሞኣባ ቢታዉ ጾሳይ ኦዴዳ ቃላይ ሀዋ:ኢሳ. 25:10-12፤ ኤር. 48:1-47፤ ህዝ. 25:8-11፤ አሞጻ 2:1-3፤ ሶፎ. 2:8-11 ሞኣበን ደእያ ኤራ ግያ ካታማይ እት ቃማ ኮለቲደ ꬋዬዳ፤ ቃይ ሞኣበን ደእያ ቂራ ግያ ካታማይካ እት ቃማ ኮለቲደ ꬋዬዳ። 2 ድቦና ካታማ አሳይ ባረንቱ ኤቃ ጎልያን ዬካናዉ ꬎቃ ሳኣ ከሴድኖ። ሞኣባ ጋድያ አሳይ ናቦነ መዳባ ግያ ካታማቶ ሄዋዳን ዬኬ። ሁጲ ኡባይ ቦአትክቼዳ፤ ቡቻ ኡባይካ ሜደቴዳ። 3 ኦጊ ደእያ ሳን ኡባን ኡንቱንቱ ማቃ ማዬድኖ፤ ጎልያ ቦላን ደምባይ ኬጾሳንነ ዳባባ ቦላ ኡባን ኡንቱንቱ ዬኪኖነ አፎꬃ ሆልሳዪኖ። 4 ሀሰቦና ካታማ አሳይነ ኤልኣለ ካታማ አሳይ ዋሲኖ፤ ኡንቱንቱ ዋሱዋ ኮሻይካ ያሃጻ ግያሳ ጋካናዉ ስሰቴ። ሄዋ ድራዉ፥ ኦላዉ ዳንጬዳ ሞኣባ ዎታዳራቱ ባረንቱ ኮሻ ꬎቂሲደ ዋሴድኖ፤ ኡንቱንቱ ሸምፑካ ኡንቱንቱ ጋርሳን ኮኮሬዳ። 5 ታን ሞኣባዉ ዎዛናፐ ዬካድ፤ አን ደእያ አሳይ ጾኣሮነ ኤግላት-ሻሊሽያ ግያ ካታማቶ ባቃቴዳ። ኡንቱንቱ ሉሂታ ኦግያን ዬኪደ ቢኖ፤ ባጋቱ ቃይ ሆሮናይማ ብያ ኦግያን፥ ባረንቱ ባሻ ድራዉ፥ ዋሱዋ ጹሊኖ። 6 ንምሪማ ሃꬃቱ ቶኤድኖ፤ ማታይ መሌዳ፤ አጫይካ ሹሌዳ፤ እርጻባይ ኡባይካ ꬋዬዳ። 7 ሄዋ ድራዉ፥ ኡንቱንቱ ባረንቱ ሺሼዳ አቁዋነ ምንጃ ቶክ አኪደ፥ አሃያ ግያ ምꬃይ ደእያ ዎምባፐ ሄፍንꬃ አፊኖ። 8 ሞኣባ ዩሹ ኡባይ ዋሶ ጻላላ ግዴዳ፤ ኡንቱንቱ ዋሱ ኤግላይማነ ብኤር-ኤሊማ ጋካናዉ ስሰቴ። 9 ድሞና ካታማ ሃꬃቱ ሱꬃ ጻላላ ግዴድኖ፤ ታን ድሞና ካታማ ቦላ ሄዋፐካ ዳርያዋ አሀና። ሞኣባፐ ከስ አኪደ ይያዋንቱ ቦላነ ሄ ጋድያን ፓጻ አቲደ ደእያዋንቱ ቦላ ጋሙዋ የዳደ ዉርሳና።