1 ሞኣባ አሳይ ባዙዋ ብያ ኦግያን ደእያ ሰላአ ካታማፐ ያላጋ ዶርሳ ኦርገቱዋ የሩሳላመን ደእያ ቢታ ሞድያዎ የድተ። 2 ሞኣባ ማጫ አሳይ ባረንቱ ደእያ ጎልያፐ ጋጻን ላለቴዳ ካፎቱዋዳን፥ አርኖና ሻፋ ፕንያ ሳኣን ላለታና።

3 ሞኣባ አሳይ ይሁዳ አሳ ሀዋዳን ያጋና፤ “ኑና ዞርተ፤ ሱረ ፕርድተ፤ ሴታ ጋላሳን ህንተ ኩዋ ቃማዳን ኩዋይተ። የደርሰትያዋንታ ቆስተ፤ ባቃት ዬዳዋንታካ አꬅ እሞፕተ። 4 ሞኣባፐ የደርሴቴዳዋንቱ ህንተ ግዶን ደእኖ፤ ኡንቱንታ ꬋይስያዋንቱፐ ኡንቱንቱ ቆሰት አትያሳ ግድተ። ኡንቱንታ ኡቁንያዋንቱ ዉሬድኖ፤ ባሻይ አቴዳ፤ ኡንቱንቱ ቱጋይያዋንቱካ ጋድያፐ ꬋዬድኖ። 5 ሄዋፐ ጉይያን፥ እት ካተቱዋ አራታይ አገና ሲቁዋን ኤቃና፤ ሄ አራታን፥ ዳዊታ ዱንካንያን እት አማነትያ ዳናይ ኡታና። እ ሱረተꬃ ኮያና፤ ጽሎተꬃ ኦꬃናዉካ ኤሌላና” ያጋና።

6 ይሁዳ አሳይ ሀዋዳን ያጋና፤ “ሞኣባ ጋድያ አሳይ አይ ኬና ኦቶረትንቶ፥ ኑ ኡንቱንቱ ኦቶሩዋባ ስሴዶ፤ ኡንቱንቱ አዩዋነ ኡንቱንቱ ሸቃካ ስሴዶ፤ ሽን ኡንቱንቱ ኦቶሩ ሀዳ” ያጋና።

7 ሄዋ ድራዉ፥ ሞኣበ ዬኮ፤ አሳይ ኡባይካ ሞኣባዉ ዬኮ፤ ቂርሄሬሳ ካታማን ህንተ ደእያ ዎደ ሜዳ ሎኦ ቁማ ሀሳዪደ ዬክተ። 8 ሀሰቦና ሾይቃቱነ ሲብማ ዎይንያ ቶክያ ሳአቱ ꬋዬድኖ፤ ኡንቱንቶ ታሺ ያእዜራ ጋኪደ፥ ባዞ ዛኤዳ ዶረቴዳ ዎይነቱዋ ካዉተꬃቱዋ ካፓቱ የደርሲደ ꬋይሴድኖ፤ ኡንቱንቱ አጫይካ ዛኢደ፥ አባ ፕኔዳ። 9 ታን ያእዜራ ካታማዉ ዬክያዋዳን፥ ሲብማ ካታማ ዎይነቶካ ዬካይ። ሀሰቦናነ ኤልኣለ ካታማቶ፥ ታን ታ አፎꬃን ህንተና ሆልሳያይ። አያዉ ጎፐ፥ ህንተ ምꬃ አይፍያነ ህንተ ቦቴዳ ካꬃ ቦላን ኦላ ዋሱ ደንዴዳ። 10 ካꬃ አይፍያን ኩሜዳ ሾይቃፐ ናሸቻይነ ሀሹ ጉሳይ አከቴዳ። ዎይንያ ቶክያ ሳንካ ማዝሙሪ የጸተና። ናሸቻን ዎይንያ ቴራ ጉምእያ ሳኣን ጉምእያባይ ባዋ። ታን ጉምእያዋንቱ እልልያ እልልሳካ ꬋይሳድ። 11 ሄዋ ድራዉ፥ ታ ዎዛናይ ሞኣባዉ፥ ታ ጋርሳ አሳተꬃይካ ቂርሄሬሳዉ ዲꬃዳን ዋሴ። 12 ሞኣበ ባረ ꬎቃ ሳኣ ቦፐነ፥ ጮ ባረና ዳቡርሴ፤ ቃይ እ ባረ ኤቃ ጎልያ ዎሳናዉ ቦፐካ፥ ሄዌ አ አይነ ማደና።

13 መꬍና ጎዳይ ካሰቲደ፥ ሞኣበዋ ኦዴዳ ቃላይ ሄዋ። 14 ሽን ሀእ መꬍና ጎዳይ ሀዋዳን ያጌ፤ “ኮንትራትያ ኦሳንቻ ላይꬃ ፓይዱዋዳን፥ ሞኣባ ቦንቹነ አ ጮራተꬃይ ሄዙ ላይꬃቱዋ ግዶን ዉራና፤ አን አትያ አሳቱካ አማሬዳዋንታነ ዎልቃይ ባይናዋንታ ግዳናዋንታ” ያጌ።