1 ዳማስቆ ካታማባ ጾሳይ ሀዋዳን ያጌ፤ “በእተ፥ ሀዋፐ ስንꬃናዉ ዳማስቁ ካታማ ግድያዌ አታና፤ እ ኮለꬃ ዶርያ ግዳናዋ። ኤር. 49:23-27፤ አሞጻ 1:3-5፤ ዛካ. 9:1 2 አሩራ ካታማቱ አሳይ ደኤና ሳኣ ግዳናዋንታ፤ ሄዋን መህያ ዉዲ አላጻና፤ ኡንቱንቱ ያሽስያዌካ ደኤና። 3 ኤፍሬመፐ ጌሳቱ፥ ዳማስቆፐካ ካዉተꬃይ ꬋያና፤ ሶርያ አሳፐ አቴዳዋንቱ እስራኤልያ አሳ ቦንቹዋ ማላ ግዳናዋንታ። ታን፥ ኡባፐ ዎልቃማ መꬍና ጎዳይ ሀዋ ኦዳይ” ያጌ።

4 ጾሳይ ሀዋዳን ያጌ፤ “ሄ ጋላስ እስራኤልያ ቦንቹ ቃረታና፤ አ ሞꬉካ ሾራና። 5 እስራኤሊ ጫክያዌ ኤቁዋን ደእያ ካꬃ ሺሽ ኦይቂደ፥ ማቃ ዛዋፐ ቃንጽ ቃንጽ ጫክያዋ ማላ ግዳናዋ፤ ዎይ ራፋይማ ዛንጋራን ካꬃ ጫኪደ፥ ፑሻሌዳ ሳ ማላ ግዳናዋ። 6 ዎጋራ ቃꬅ ስምና፥ ጼራን ላኡ ዎይ ሄዙ ቃርመ አይፈቱ አትያዋዳን፥ ዎይ ዳሻ ግዶን ኦይዱ ዎይ እቼሹ አይፈቱ አትያዋዳን፥ እስራኤልያፐ ቃርመቱ አታና” ያጌዳ። ሄዋ መꬍና ጎዳይ፥ እስራኤልያ ጾሳይ ሃሳዬዳ።

7 ሄ ጋላስ አሳይ ባረና መꬌዳዋኮ ጼላና፤ ባረንቱ አይፍያካ እስራኤልያ ጌሻኮ ዛራና። 8 ኡንቱንቱ ባረንቱ ኩሽያን ጊግሴዳ ያርሽያ ሳኣ ጼልክኖ፤ አሼሮ ግያ ኤቃት ምስልያ ግድናካ፥ እጻና ጩዋይያ ሳኣ ግድናካ፥ ኡንቱንቱ ባረንቱ ብራꬍያን መꬌዳዋን አማነትያዋ አጋና።

9 ሄ ጋላስ እስራኤልያ አሳ ጋሱዋን ሂዌቱዋነ አሞረቱዋ ካታማቱ ላለቴዳዋዳን፥ ኡንቱንቱ ምኖ ካታማቱ ላለታና፤ ሄ ካታማቱ መላ ግዳናዋንታ። 10 አያዉ ጎፐ፥ ህንተ ህንተና አሽያ፥ ጾሳ ዶጌድታ፤ ህንተ ባቃት አትያ ዎጋ ዛላካ ሀሳይበይክታ። ሄዋ ድራዉ፥ ኔን ሎኦ ምꬃቱዋ ቶኮፐካ፥ ካረ ጋድያፐ ዬዳ ሎኦ አታክልትያ ቶኮፐካ፥ 11 ነ ቶኬዳ ጋላስ ኡንቱንቱ ድጪንቶካ፥ ቃይ ነ ዘሬዳ ዎንታ ኔ ኡንቱንታ ጪሽስንቶካ፥ ነ ካዩዋነ ነ ፓጻናዉ ዳንዳየና ሳኩዋ ጋላስ ሄ ጫኩ ጋኬዳ ካꬃይ ባቃት ꬋያና።

12 በአ፥ ዳሮ አሳይ ጉሜ፤ ኡንቱንቱ አባ ቤታዳን ጉሚኖ። ቃይ ካዉተꬃቱ ዋሲኖ፤ ኡንቱንቱ ዎልቃማ ሃꬃዳን ዋሲኖ። ኡንቱንቶ አየ አና። 13 ካዉተꬃቱ ዳሮ ሃꬃቱዋ ጉንꬃዳን ጉሚኖ፤ ሽን ጾሳይ ኡንቱንታ ሴራና፤ ኡንቱንቱ ደርያ ሁጲያን ደእያ ሱላይ ጫርኩዋን ደንድያዋዳንነ ጎቲ ደንꬅያ ባናዳን፥ የደርሰቲደ፥ ሃኮ ሳ ባቃታና። 14 ሳአይ ቃምያ ዎደ፥ ኡንቱንቱ ሻቢረታና፤ ሳአይ ዎንታናፐ ካሰቲደ፥ ኡንቱንቱ ꬋያና፤ ኑዋ ዎልቃን አክያዋንቱ ካጫይነ ኑና ቦንቂያዋንቱ ሳማይ ሀዋ።