1 ግብጼ ቢታ ጾሳይ ሀዋዳን ያጌ፤ ኤር. 46:2-26፤ ህዝ. 29:1—32:32 “በእተ፥ መꬍና ጎዳይ ድርቢያ ሻርያ ቶጊደ፥ ግብጼ ዬ። ግብጼ ኤቃቱ አ ስንꬃን ኮኮራና፤ ግብጼ አሳ ዎዛናይካ ኡንቱንቱ ግዶን ሲላና” ያጌ።

2 ኡባፐ ዎልቃማ ጾሳይ ሀዋዳን ያጌ፤ “ታን ግብጼ ጋድያ አሳ ግብጼ አሳ ቦላ ደንꬃና፤ ኡንቱንቱ ባረንቱ ግዶን እሻይ እሻና፥ ሾሩ ሾሩዋና፥ ካታማይ ካታማና፥ ካዉተꬃይ ካዉተꬃና ኦለታና። 3 ግብጼ አሳ አያናይ ጋገታና፤ ታን ኡንቱንቱ ሀልቹዋ ሀዳ ኦꬃና። ኡንቱንቱ ኤቃቱዋነ ሞይትልያ ሃሳይስያ አሳቱዋ፥ ካይያዋንታነ ሻሬቾቱዋ ዞረታ ኦቻና። 4 ቃይ ታን ግብጼ ጋድያ አሳ እት መቀꬅ ባይና ጎዳ ኩሽያን አꬃደ እማና፤ እት መቀꬅ ባይና ካቲ ኡንቱንታ ሞዳና” ያጌ ኡባፐ ዎልቃማ መꬍና ጎዳይ።

5 ናይለ ሻፋ ሃꬃይ መላና፤ ሻፋይካ ሌላን ሌላን መል አጋና። 6 ዜሮ ሃꬃቱ ጽንቃና፤ ግብጼ ፑልቶቱ ጉጻናነ ቶአና። ሾምቦቆቱነ ጫረቱ ሹላና፤ 7 ናይለ ሻፋ ማታን ደእያ ሳአቱ፥ አባ ማታቱ ኡባይ ኮለት መላ ግዳና። ናይለ ሻፋ ማታን ዘሬዳባይ ኡባይ መላና፥ ላለታናነ ꬋያና። 8 ሞልያ ኦይቂያዋንቱ ካዮታና። ናይለ ሻፋን ግትያ የግያ ኡባቱ ዬካና፤ ሃꬃን ግትያ የግያዋንቱካ ዶጫና። 9 ፓተቴዳ ታልባፐ ሊኑዋ ኦꬅያዋንቱ፥ ቃይ ቦꬃ ፑቱዋ ማዩዋ ዳድያ ሸማይነቱካ ዬላታና። 10 ሽማይነቱነ ከራ ኦꬅያ ኡባቱካ ካዮታና።

11 ጾኣነ ካታማ ሞድያዋንቱ ሙለካ ኤያ፤ አꬌዳ ኤራንቻ ግያ ግብጼ ካትያ ዞርያዋንቱ ዞሪካ ዳማ። ያትና፥ ህንተ ግብጼ ካትያዉ፥ “ኑን አꬌዳ ኤራንቻቱዋ ናናቱዋ፤ ኑን በን ካተቱ ናናቱዋ” ጋናዉ ዋኒደ ዳንዳዪቴ? 12 ነ አꬌዳ ኤራንቻ አሳቱ ያትና ሀእ ሀቃን ደኢኖ? ኡባፐ ዎልቃማ መꬍና ጎዳይ ግብጼ ቦላ ኦꬃናዉ ሀልቼዳዋ አነ ኡንቱንቱ ነዉ ኦድኖነ ኔና ኤርስኖ። 13 ጾኣነ ካታማ ሞድያዋንቱካ ኤዬድኖ፤ መምፒሳ ካታማ ሞድያዋንቱካ ጭመቴድኖ። ግብጼ አሳ ዛርያ ግዶፐ አሳ ካለꬅያዋንታ ጊደ ዎꬄዳዋንቱ ግብጼ ባለꬄድኖ። 14 መꬍና ጎዳይ ኡንቱንቱ ግዶን ጌላ አያና ዋላኬዳ፤ ያትና፥ ኡንቱንቱ ማꬆቲደ አሳይ ባረ ጮሻን ጋንድጋርያዋዳን፥ ግብጼ ባረ ኦሶ ኡባን ጋንድጋራናዳን ኦꬄድኖ። 15 ግብጼዉ አ ሁጲ ዎይ አ ጎይናይ፥ አ ዛምባ ታሺ፥ ዎይ አ ሾምቦቁ ኦꬃናባይ አያይነ ባዋ።

16 ሄ ጋላስ ግብጼ ጋድያ አሳይ ማጫ አሳ ማላ ግዳናዋ። ቃይ ኡባፐ ዎልቃማ መꬍና ጎዳይ ኡንቱንቱ ቦላን ዉጻክያ አ ኩሽያ በኢደ፥ ኡንቱንቱ ያሻን ኮኮራና። 17 ይሁዳ ጋዲ ግብጼ ጋድያ አሳ ያሽያዋ ግዳናዋ፤ ኡባፐ ዎልቃማ መꬍና ጎዳይ ኡንቱንቱ ቦላን ኦꬃናዉ ቆፔዳ ቆፋ ድራዉ፥ ይሁዳባ ስስያ ኡባይ ያያና።

18 ሄ ጋላስ ግብጼ ጋድያን ደእያ እቼሹ ካታማቱ ካናነ ቃላን ሃሳይያዋንታነ ኡባፐ ዎልቃማ መꬍና ጎዳዉ አማነታናዉ ጫቂያዋንታ ግዳና። ሄ ካታማቱዋፐ እቱ፥ “አዋ ካታማ” ጌተቲደ ጼሰታና።

19 ሄ ጋላስ ግብጼ ቢታዉ ግዱዋን፥ መꬍና ጎዳዉ ያርሽያሳይ ጊጋና፤ ቃይ ግብጼ ጋድያ ዛዋንካ መꬍና ጎዳዉ ቱሳይ ኤቃና። 20 ሄዌ ኡባፐ ዎልቃማ መꬍና ጎዳዉ ግብጼ ጋድያን ማላታነ ማርካ ግዳናዋ፤ ኡንቱንቱ ባረና ኡቁንያዋንቱፐ ደንዴዳዋን መꬍና ጎዳኮ ዋስያ ዎደ፥ እ ኡንቱንቶ አሽያዋ ኪታና፤ ኡንቱንታ አሻና። 21 ሄ ዎደ ጾሳይ ግብጼ ጋድያን ኤረቴዳዋ ግዳናዋ፤ ግብጼ አሳይካ ሄ ጋላስ ጾሳ ኤራናነ ያርሹዋነ ካꬃ ያርሹዋ አክ ዪደ፥ አዉ ጎይናና። ኡንቱንቱ ጾሳዉ ሺቃናነ ባረንቱ ሺቆዋካ ጋꬃና። 22 መꬍና ጎዳይ ግብጼ ሾጫና፤ ሾጫናነ ፓꬃና። ኡንቱንቱካ መꬍና ጎዳኮ ስማና፤ እካ ኡንቱንቱ ዋትዋቱዋ ስሲደ፥ ኡንቱንቱ ፓꬃና።

23 ሄ ጋላስ ግብጼፐ አሶረ ጋካናዉ አኮ ኦገ ከሳና፤ አሶረ አሳይ ግብጼ፥ ግብጼ አሳይካ አሶረ ስመረታና፤ ቃይ ግብጼ አሳይ አሶረ አሳና እትፐ ጎይናና። 24 ሄ ጋላስ እስራኤሊ ግብጼናነ አሶረና ሄዘንꬆ ቢታ ግዲደ፥ ሳኣ ግዶን አንጆ ግዳናዋ። 25 ኡባፐ ዎልቃማ መꬍና ጎዳይ ኡንቱንታ ሀዋዳን ያጊደ አንጃና፤ “ታ አሳዉ ግብጼ፥ ታ ኩሺ መꬌዳ አሶረነ ታን ዶሬዳ እስራኤልያዉ አንጀቴዳዋንታ ግድተ” ያጋና።