1 ጺሮሳ ካታማዉ ኦደቴዳ ጾሳ ቃላይ ሀዋ። ህዝ. 26:1—28:19፤ ኢዩ. 3:4-8፤ አሞጻ 1:9-10፤ ዛካ. 9:1-4፤ ማቶሳ 11:21-22፤ ሉቃሳ 10:13-14

ህንተኖ ታርሴሳ ማርካብያ ላግያዋንቶ ዬክተ! አያዉ ጎፐ፥ ጺሮሳ ካታማይ ጎሊ ዎይ ሸምፕያሳይ ባይና መላ ከሴዳ፤ ሄ ኦዱ ኡንቱንቶ ቆጲሮሳ ጋድያፐ ዬዳ። 2 ህንተኖ፥ አባ ማታን ደእያ አሳቶ፥ ህንተኖ ሲዶና ካታማ ዛልአንቻቶ፥ ጮኡ ጊተ! ህንተ ኪትያ አሳቱ አባ ፕኔድኖ። 3 ህንተዉ ይያ ካꬃይ ናይለ ሻፋፐ ጫከቴዳ ሽሆራ ጋድያ ካꬃ። ህንተ ካዉተꬃቱ ዛልእያ ዛልእያ ሳ ግዳና።

4 ኔኖ ሲዶና ካታማዉ፥ አባ ጌሶ፥ አባይ፥ “ታን ናኣ የላበይከ፤ ታን አቱማ ናኣካ ማጫ ናኣካ ድቻበይከ” ያጊደ ሃሳዬዳ ድራዉ ዬላታ። 5 ኦዱ ግብጼ ጋድያ ጋክያ ዎደ፥ ኡንቱንቱ ጺሮሳባ ስሲደ ሴለታና።

6 ህንተኖ አባ ማታን ደእያ አሳቶ፥ ዝላልተ፤ ሄፍንꬃ ታርሴሳ ቢታ ፕንተ። 7 በን ዎደ ኬጸቴዳ፥ ካረ ጋድያ ኦይቂደ ሞዳናዉ አ ገዲ አ ሃስ አፌዳነ፥ ህንተ አን ናሸትያ ጺሮሳ ካታማይ ሀዋዳን ሀኔዴ? 8 ካላቻ ዎꬅስያ ካታማ አ ዛልአንቻቱ ጋድያ ሞድያዋንታ ግዴዳነ አ ግዶን ዛልእያዋንቱነ ላምያዋንቱ ጋድያ ቦላን ቦንቼቴዳዋንታ ግዴዳ ጺሮሳ ካታማ ቦላ ሀዋ ሀልቼዳዌ ኦኔ? 9 ኦቶረትያዋንቱ ቦንቹዋ ኡባ ጉꬃናዉ፥ ቃይ ጋድያ ቦላን ቦንቼቴዳዋንታ ኡባ ካዉሻናዉ፥ ኡባፐ ዎልቃማ መꬍና ጎዳይ ሀዋ ሀልቼዳ።

10 ህንተኖ፥ ታርሴሳ ጋድያ አሳቶ፥ ህንተና ተእያባይ ባይና ድራዉ፥ ናይለ ሻፋዳን፥ ህንተ ጋድያ ቦላን ኩሚደ ጎግተ። 11 መꬍና ጎዳይ አባ ቦላን ባረ ኩሽያ ምጬዳ፤ እ ካዉተꬃካ ቃꬄዳ፤ ካናነ ጋድያ ጌሶቱዋ ላላና ማላ፥ ጾሳይ አዛዙዋ እሜዳ። 12 ቃይ እ ሀዋዳን ያጌዳ፤ “ህንተኖ፥ ኡንኤቴዶ ሲዶና አሳቶ፥ ህንተ ናሸቻ ፖጩ ግያ ዎዲ ዉሬዳ። ደንድተ፤ ሄፍንꬃ ቆጲሮሳ ፕንተ። ሀራይ አቶ ያንካ ህንተንቶ ሸምፑ ቤተና” ያጌዳ።

13 ባብሎነ ጋድያ በእተ፤ ሄ ጋድያ አሳይ ሀእ ፓናባ ግዴዳ። አሶረ ጋድያ አሳቱ ሄ ጋድያን ዶአይ ሲራናዳን ኦꬄድኖ። ኡንቱንቱ ሄዋን ደእያ ዎጋ ጎለቱዋ ኮሊደ፥ ባረንቱ ጌሶቱዋ ግምቤድኖ፤ ቢታካ መላ ኦꬄድኖ።

14 ህንተኖ፥ ታርሴሳ ጋድያ ማርካብያ አሳቶ፥ ህንተ ጌሱ ላለቴዳ ድራዉ፥ ዝላልተ።

15 ጺሮሳ ካታማይ ላፑን ታሙ ላይꬃ ዶገቲደ ደአና ዎዲ ያና፤ ሄዌነ፥ እት ካትያ ላይꬃ ኬሻ ግያዋ። ላፑን ታሙ ላይꬃይ ዉርያ ዎደ፥ ሻርሙጻ ምሽራትዉ የጸትያ የꬃ ማላይ፥ ጺሮሳ ካታማዉ የጸታና። ኡንቱንቱ፥ 16 “ሀነ፥ ዶገቴዳ ሻርሙጻተ፥ ነ ዲꬃ አካ፤ ካታማን ዩያ። ኔና አሳይ ሀሳያና ማላ፥ ማልኦ ቃላን ዳሮ የꬃ የጻ” ያጋና።

17 ላፑን ታሙ ላይꬃይ ፖለትያ ዎደ፥ መꬍና ጎዳይ ጺሮሳ ጾሞሳና። ሽን ሄዋፐ ጉይያን፥ አ በን ባረ ሻርሙጻ ኦሶ ስማና፤ ሳኣን ደእያ ካዉተꬃቱዋ ኡባና ሻርሙጻና። 18 ግዶፐነ፥ እዚ ዛልኢነ እ ድርጉ መꬍና ጎዳዉ ዱማቴዳዋ ግዳና፤ እዚ ዛልኢ ዳሮ ቁማነ ሎኦ ማዩዋ ሻማናዉ፥ መꬍና ጎዳዉ ኦꬅያ አሳቶ እመታናፐ አትና፥ ሚሻ ጎልያንነ ምንጃ ጎልያን ኡተና።