1 በእተ፥ መꬍና ጎዳይ ጋድያ ኮሊደ መላ ከሳና፤ እ ጋድያ ባይዚደ፥ አን ደእያ አሳካ ላላና። 2 ሀራ አሳ ቦላን ሀንያዋዳን ቄሳቱ ዋ ቦላንካ፥ ቆማ ቦላን ሀንያዋዳን ጎዳ ቦላንካ፥ ቆማት ቦላን ሀንያዋዳን ጎዳት ቦላንካ፥ ሻምያዋ ቦላን ሀንያዋዳን ዛልእያዋ ቦላንካ፥ ታልእያ እምያዋ ቦላን ሀንያዋዳን ታልእያ አክያዋ ቦላንካ፥ አጩዋ አችያዋ ቦላን ሀንያዋዳን፥ አጩዋ አሸትያዋ ቦላንካ ሀናና። 3 ቢታይ ኡባና መላ ከሳና፤ ቃይ ኡባናካ ቦንቀታናዋ። አያዉ ጎፐ፥ ሀ ቃላ መꬍና ጎዳይ ሃሳዬዳ።

4 ቢታይ ሎይꬅ መልና፥ አ አጫይ ኡባይ ሹሌ፤ ጋድያን ደእያ ዎልቃማ አሳይካ ዳቡሬ። 5 ቢታይ ባረናን ደእያ አሳፐ ደንዴዳዋን ቱኔዳ። አያዉ ጎፐ፥ ኡንቱንቱ ህግያ ኮሌድኖ፤ ዎጋ መንꬄድኖ፤ መꬍና ጫቁዋካ ኮሌድኖ። 6 ሄዋ ድራዉ፥ ጾሳ ሸቃይ ጋድያ ሜ፤ ቃይ አን ደእያ አሳቱካ ባረንቱ ባይዙዋ ጋሱዋን ሙረቴድኖ። ሄዋ ድራዉ፥ ሳኣን ደእያ አሳቱ ጹገቴድኖ፤ ያትና ፓይዱዋን ጉꬃ አሳይ አቴዳ። 7 ዎይንያ ቱራ አኑ መልና፥ ዎይንያ ኤሳይካ ዉሬዳ፤ ካሰ ናሸትያ ኡባይ ካዮቴዳ። 8 ካራቡዋ ባቃ ናሸቻይ ጮኡ ጌዳ። ናሸትያዋንቱ ሆምቦጨꬃይካ ኤቄዳ። ሎእያ ዲꬃ ናሸቻይካ ጮኡ ጌዳ። 9 ሀዋፐ ስንꬃናዉ የꬃ የጺድ፥ ኡንቱንቱ ዎይንያ ኤሳ ኡሽክኖ፤ ማꬆይያ ኡሻይ ኡሽያዋንቶ ጫሞ ግዳናዋ። 10 ማራ ማጫራ ꬋዬዳ ካታማይ ላለቴዳ፤ ኦንነ ገለናዳን፥ ጎልያ ኡባይ ጎርደቴዳ። 11 ዎይንያ ኤሳይ ꬋዬዳዎ አሳይ ዳባባን ዋሴ፤ ናሸቻ ኡባይ ካዮ ላመቴዳ፤ ሳኣ ናሸቻይ ኡባይ ክቼዳ። 12 ካታማይ ኮለቴዳ፤ ካታማ ፐንገቱካ መኤረቴድኖ። 13 ዎጋራ ቴራ ቃꬂደ ቆቆፍያዋዳን፥ ዎይ ዎይንያ ቴራ ማጽ ስሚደ፥ ቃርምያ ማጽያዋዳን፥ ጋድያ ቦላን ደእያ ካዉተꬃቱዋ ግዶን ሄዋዳን ሀናና።

14 ኡንቱንቱ ባረንቱ ቃላ ꬎቁ ኦꬂደ፥ ናሸቻን የጺኖ፤ አዋይ ዉልያ ባጋና ደእያ ኡባይ መꬍና ጎዳ ግታተꬃ ኦዳና። 15 ሄዋ ድራዉ፥ አዋይ ዶልያ ባጋና ደእያዋንቶ፥ መꬍና ጎዳዉ ቦንቹዋ እምተ፤ አባ ዶናን ደእያ ቢታቱዋን ደእያዋንቶ፥ እስራኤልያ መꬍና ጎዳ፥ ጾሳ ሱንꬃዉ ቦንቹዋ እምተ። 16 ቢታ ጋጻፐ፥ “ጽሎ ቦንቹ ግዶ” ያግያ የꬃ ኑን ስሴቶ።

ሽን ታን፥ “ታን ግልቃይ! ታን ግልቃይ! ታዉ አየ አና! አያዉ ጎፐ፥ ካድያዋንቱ ካዲኖ፤ ካድያዋንቱ ሎይꬅ አꬅ እሚኖ” ያጋይ። 17 ህንተኖ፥ ሳኣ ቦላን ደእያ አሳቶ፥ ዳጋማይ፥ አፉነ ጲሪ ህንተና ናጌ። 18 ሳሉዋ ማስኮተቱ ዶየቴዳ ድራዉነ፥ ጋድያ ባሶቱካ ቃጽያ ድራዉ፥ ዳጋንꬅያ ኮሻፐ ባቃትያዌ ኦላን ኩንዳና፤ ቃይ ኦላፐ ፑደ ከስያዌ ጲርያን ኦይቀታና። 19 ቢታይ ዛኢደ ጳልቀቴዳ፤ ንፕ ጊደ መኤረቴዳ፤ ዎልቃፐ ቃጼዳ። 20 ቢታይ ማꬆቲደ አሳዳን ጋንድጋሬ፤ ጫርኩ ሱግያ ዳስያዳን፥ ዮንቁ ጌ። ማካላንቻቱ ባይዙ አ ሎይꬅ ዴጼዳ ድራዉ፥ ላኤንꬆ ደንደናዳን ኩንዴ።

21 ሄ ጋላስ መꬍና ጎዳይ ሳሉዋ ዎልቃቱዋ ሳሉዋን፥ ቃይ ሳኣ ካተቱዋካ ሳኣን ሙራና። 22 ኡንቱንቱ ኦላን ደእያ ቃሾ አሳቱዋዳን፥ እትፐ ሺቃና፤ ቃሾ ጎልያን ጎርደቲደ ኡታና። ቃይ ዳሮ ጋላሳፐ ጉይያን፥ ኡንቱንቱ ሙረታና። 23 ሄዋፐ ጉይያን፥ አግናይካ አዋይካ ዬላታና። አያዉ ጎፐ፥ ኡባፐ ዎልቃማ መꬍና ጎዳይ ጽዮነ ደርያንነ የሩሳላመን ካተታና፤ ቃይ እ የሩሳላመ ጭማቱዋ ስንꬃን ባረ ቦንቹዋ ቆንጭሳና።