1 አቤት መꬍና ጎዳዉ፥ ኔን ታ ጾሳ። ታን ኔና ꬎቁ ꬎቁ ኦꬃና፤ ነ ሱንꬃካ ጋላታና። አያዉ ጎፐ፥ ኔን ፖሎ አማነትያዋን በንፐ ሀልቼቲደ ደእያ ማላልስያ ኦሶቱዋ ኦꬃዳ። 2 ኔን ካታማ ሹቻይ ኦለትያ ሳኣ ኦꬃዳ፤ ምኑዋን ግምበቴዳ ካታማ ኮላዳ። አላጋቱዋ ካትያ ጎልያካ ላኤንꬆ ካታማ ግደናዳን ኦꬃዳ። ስሚደ ሙለካ ኬጸተና። 3 ሄዋ ድራዉ፥ ምኖ አሳቱ ኔና ቦንቻና፤ መቀꬅ ባይና ካዉተꬃቱዋ ካታማቱካ ነዉ ያያና። 4 ኔን ህዬሳዉ ባቃት አትያሳ። መቶታንቻዉካ ባረ መቱዋ ዎደ ባቃት አትያሳ፥ ኡሹዋፐ አትያ ሳኣነ አዋ ሴላፐ አትያ ኩዋ ግዳዳ። አያዉ ጎፐ፥ መቀꬅ ባይና አሳ ሀንቁ ግምቢያ ሾጭያ ኡሹዋ ማላነ 5 ባዙዋ ጋድያ ምሹዋ ማላ። አዋ ምሹ ሻርያ ኩዋን ጋቢ ግያዋዳን፥ ኔን አላጋቱዋ ዋላሳ ሀይዝሳዳ፤ ያትና፥ መቀꬅ ባይና አሳቱዋ የꬃይ ጮኡ ጌዳ።

6 ኡባፐ ዎልቃማ መꬍና ጎዳይ አሳ ኡባዉ ሀ ደርያ ቦላን ዎልቃማ ግብራ ጊግሳና፤ ሄዌካ ሞꬎቱዋ፥ ኮልዝያና ደእያባቱዋነ ሎኦ ካኤዳ ዎይንያ ኤሳ ግብራ። 7 ሀ ደርያን አሳ ኡባ ጫሜዳዋ፥ ካዉተꬃ ኡባ ቦላንካ ምጨቴዳ ጋርዱዋ እ ꬋይሳና። 8 ሀይቁዋ እ መꬍናዉ ምታና፤ ኡባ ሞድያ መꬍና ጎዳይ አይፍያ ኡባፐ አፎꬃ ቁጫና፤ ባረ አሳ ካዉሻካ ቢታ ኡባፐ ድጋና። ሀዋ መꬍና ጎዳይ ኦዴዳ። 1 ቆሮ. 15:54፤ ሳፃ 7:17፤ 21:4

9 ሄ ጋላስ ኡንቱንቱ ሀዋዳን ያጋና፤ “ሀዌ ቱሙ ኑ ጾሳ፤ ኑን እ ኑና አሻናዳን ናጌዶ፤ እ ኑና አሼዳ። ሀዌ መꬍና ጎዳ፤ ኑን አ ናጌዶ። አነ አ አቶተꬃን ሀሹ ጌቶነ ናሸቴቶ” ያጋና።

10 አያዉ ጎፐ፥ መꬍና ጎዳ ኩሺ አሻናዉ ሀ ደርያ ቦላን ግዳናዋ። ሽን ዳርጫ ፕቱዋ ኦላን የጊደ የꬍያዋዳን፥ ሞኣባ ቢታ አሳይ ባረ ሳኣን የታና።ኢሳ. 15:1—16:14፤ ኤር. 48:1-47፤ ህዝ. 25:8-11፤ አሞጻ 2:1-3፤ ሶፎ. 2:8-11 11 ሃꬃ ዋꬍያዌ ሃꬃ ዋꬋናዉ ባረ ኩሽያ ፕድ ኦꬅያዋዳን፥ ኡንቱንቱ ሄዋ ግዶን ባረንቱ ኩሽያ ፕድ ኦꬃና። ሽን ጾሳይ አ ኦቶሩዋ አ ኩሽያ ገንያናካ ጋꬂደ ካዉሻና። 12 ኡንቱንቱ ꬎቂሲደ፥ ምኑዋን ግምቤዳ ግምቢያ እ ዱገ አሀናነ ካዉሻና፤ ዱገ ሳኣን፥ ኡባ ህርክ ባናን ኦላና።