26
ጾሳይ ባረ አሳዉ ጾኑዋ እማና
1 ሄ ጋላስ ይሁዳ ጋድያን ሀ የꬃይ የጸታና።
ኑዉ ምኖ ካታማይ ደኤ፤
ጾሳይ አቶተꬃ አ ዩሹዋን ግምቢያዳንነ ጌሱዋዳን ኤሴ።
2 አማኑዋ ናግያ ጽሎ ካዉተꬃይ ገላና ማላ፥
ፐንግያ ዶይተ።
3 ባረ ቆፋ ኔናን ዎꬄዳ አሳ
ኔን ፖሎ ሳሮተꬃን ናጋሳ፤
አያዉ ጎፐ፥ እ ኔናን አማነቴ።
4 መꬍና ጎዳን መꬍናዉ አማነትተ፤
አያዉ ጎፐ፥ መꬍና ጎዳይ፥ መꬍና ጎዳይ መꬍና ዛላ።
5 ꬎቃን ደእያዋንታነ፥
ኡንቱንቱ ꬎቃ ካታማ ዝቂ ኦꬄዳ፤
እ አ ካዉሼ።
ዱገ ሳኣ ጋካናዉ ዝቂ ኦꬄ፤
ቢታ ባናን ኦሌ።
6 ማንቁዋ ገዲ፥ መቶታንቻ ገዲ፥ አ የꬋና።
7 ጽሎቱዋ ኦጊ ሳላላ።
አቤት ጽሎ፥ ኔን
ጽሎቱዋ ኦግያ ሳላልሳሳ።
8 ኤ መꬍና ጎዳዉ፥ ነ ህግያ ኦግያን ሀመቲደ፥
ኑን ኔና ናጌቶ።
ኑ ዎዛና አሙ፥
ነ ሱንꬃ ቦንቻናዋ ጻላላ።
9 ቃማን ታን ኔና ላሞታይ፤
ዎንታን ታ ግዶን ደእያ ታ አያናይ፥
ቱሙዋፐ ኔና ምንሲደ ኮዬ።
አያዉ ጎፐ፥ ነ ፕርዳይ ሳኣን ደእያ ዎደ፥
ሳኣን ደእያ አሳይ ጽሎተꬃ ታማሬ።
10 ኢታ አሳዉ ኬካተꬃ ኦꬆፐካ፥
እ ጽሎተꬃ ታማረና።
ሱረ አሳቱዋ ጋድያን ኢታባ ኦꬄ፤
መꬍና ጎዳ ግታተꬃካ ኤረና።
11 አቤት መꬍና ጎዳዉ፥ ኔን፥
ነ ኩሽያ ꬎቁ ኦꬃዳ፤
ሽን ኡንቱንቱ በእክኖ። እብራ. 10:27
ነ አሳዉ ኔን ምሸትያ ምሹዋ በኢደ ዬላትኖ።
ኔን ነ ሞርከቶ ዎꬄዳ ታማይ፥
ኡንቱንታ ም ꬋይሶ።
12 አቤት ጾሳዉ፥ ኔን፥
ኑዉ ሳሮተꬃ ምንꬃዳ፤
ኑ ኦሶ ኡባ ኔን ኑዉ ኦꬃዳ።
13 አቤት መꬍና ጎዳዉ፥ ኑ ጾሳዉ፥
ኔፐ ሀራቱ ኑና ሞዴድኖ፤
ሽን ኑን ነ ሱንꬃ ጻላላ ቦንቼቶ።
14 ኡንቱንቱ ሀይቄድኖ፤
ስሚደ ፓጻ ደእክኖ።
ኔን ꬋይሰዳ ድራዉ፥
ስሚደ ደንድክኖ።
ኡንቱንቱ ሀሳየትያዋ ኡባ ቁጫ ꬋይሳዳ።
15 አቤት መꬍና ጎዳዉ!
ኔን አሳ ዳርሳዳ።
አሳ ዳርሳደ፥ ኔን ቦንቼታዳ፤
ቢታ ዛዋ ኡባካ አሳዳ።
16 አቤት መꬍና ጎዳዉ!
መቱዋ ዎደ ኡንቱንቱ ኔና ኮዬድኖ።
ኔን ኡንቱንታ ሙሬዳ ዎደ፥
ኡንቱንቱ ኔና ሳሱክ ዎሴድኖ።
17 አቤት መꬍና ጎዳዉ! ሻሃሬዳ ምሽራታ፥
የልያ ዎዲ ጋክና፥
የሉዋ ኡንኤታደ ዋስያዋዳን፥
ኑንካ ነ ስንꬃን ሄዋዳን ሀኔዶ።
18 ኑን ሻሃሬዶ፤ ኦይꬃ ኦይቀቴዶ፤
ሽን ጫርኩዋ የልያዋ ግዴዶ።
ኑን ሳአዉ አቶተꬃ አህበይኮ፤
ሳኣን ደእያ አሳካ የልቦኮ።
19 ሀይቄዳ ነ አሳይ ፓጻና፤ ዳኔላ 12:2
ኡንቱንቱ አሃይ ደንዳና።
ህንተኖ፥ ቢታ ባና ግዶን ደእያዋንቶ፥
ህንተ ጻሳይ ዎንታ ከተርሳ ማላ ግድያ ግሻዉነ፥
ሳአይካ ሀይቄዳዋንታ ዛረꬂደ እምያ ድራዉ፥
ቤጎትተነ ናሸቻዉ የጽተ።
ፕርዳነ ኦሞዱዋፐ ስምያዋ
20 ታ አሳቶ፥ ሃ ዪተ፤ ህንተ ጎለ ገሊደ፥ ፐንግያ ህንተ ቦላ ጎርድተ። ጾሳ ሀንቁ አꬋና ጋካናዉ፥ ጉꬃ ዎድያ ህንተና ቆስተ። 21 ቢታ ቦላን ደእያ አሳ፥ ኡንቱንቱ ናጋራ ድራዉ ሙራና፥ መꬍና ጎዳይ ባረ ደኢያሳፐ ከሲደ ዬ። ቢታይካ ባረ ቦላን ጉኬዳ ሱꬃ ቆንጭሳና፤ ዎꬌዳዋንታካ ላኤንꬆ ገንና።