1 ሄ ጋላስ መꬍና ጎዳይ ባረ ምኖ፥ ግታነ ዎልቃማ ማሻን ሌዋታና ግያ ኮልጽያነ ጻጸትያ ሾሻ ሙራና፤ አባን ደእያ ዳዊያካ ዎꬋና።ኢዮባ 41:1፤ ማዝ. 74:14፤ 104:26 2 ሄ ጋላስ ሀዋዳን ጌተታና፤ “ሀዌ ዶሰቴዳ ዎይንያ ቱራ ሳ፤ አባ የጽተ! 3 ታን፥ መꬍና ጎዳይ አ ናግያዋ፤ ታን አ ሀእ ሀእ ሃꬃ ኡሻይ፤ ኦንነ አ ቆሄናዳን፥ ታን ቃማነ ጋላስ አ ናጋይ። 4 ታን ሀንቀትከ፤ ታናና ኦለታናዉ፥ አጉንꬃይነ ጎምኦሪ ደኤርክኖሻ! ታን ኡንቱንቱ ቦላ ከሳ ኤቃደ፥ ኡንቱንታ ጹጋ ዉርሳና። 5 ዎይ ባቃት ቆሰት አታናዉ ታኮ ዪኖ፤ ታናና ጊግኖ፤ ኤ፥ ታናና ጊግኖ” ያገታና።

6 ያና ጋላሳቱዋን ያቆብ ጻጱዋ የዳና፤ እስራኤሊ አጫናነ ጪሻና፤ ያቲደ አይፌዳ አይፊ ሳኣ ኡባ ኩማና።

7 ኡንቱንታ ሾጬዳዋንታ ሾጬዳዋዳን፥ መꬍና ጎዳይ እስራኤልያ አሳ ሾጬደየ? ዎይ ኡንቱንታ ዎꬌዳዋንቱ ሀይቄዳዋዳን፥ ኡንቱንቱ ሀይቄድኖየ? 8 ጾሳይ ባረ አሳ ኦሞዶ የድያዋን ሙሬዳ፤ አዋይ ዶልያ ባጋ ጫርኩዋ ጋላስ ኡንቱንታ ባረ ያሽያ ጎትያን ላግ ከሴዳ። 9 ሄዋ ድራዉ፥ ያቆባ ባይዙ አቶ ጌተታናዌነ አ ናጋራይ ፖሎ ቁጨታናዌ ሀዋና: ሄዌካ ያርሽያ ሳኣ ሹቻ ኡባ እ መኤረቴዳ ቦቅንꬃ ሹቻዳን ኦꬅያ ዎደነ፥ አሼሮ ግያ ማጫ ጾሳት ምስሊ፥ ዎይ እጻና ጩዋዪደ፥ ያርሽያ ሳአይካ ኤቁዋን አተናዳን ኦꬅያ ዎደ።

10 ምኑዋ ድረቴዳ ካታማይ ኦኔዳ፤ ካሰ አሳይ ደእያ ሳአይ ሀእ ባዙዋዳን፥ መላ አቴዳነ ዶገቴዳ፤ እ መሂ ሄመትያ ሳኣ ግዴዳ ድራዉ፥ ምꬃ ቦንጭያ ሚደ፥ ማራቱ ሄዋን አላጺኖ። 11 ምꬃ ታሸቱ መልያ ዎደ መኤረቲኖ፤ ማጫ አሳይካ ዪደ፥ ኡንቱንታ ኤꬃናዉ አፌ። ሀ አሳይ አኬክ ባይና አሳ ግድያ ድራዉ፥ ኡንቱንታ መꬌዳዌ ኡንቱንቶ ቃረተናነ ማረና።

12 ሄ ጋላስ ኤፍራጺሳ ሻፋፐ ግብጼ ሻፋ ጋካናዉ፥ መꬍና ጎዳይ ካꬃ ቡካና፤ ህንተኖ፥ እስራኤልያ አሳቶ፥ ህንተካ ህንተ ታራን ታራን ሺቃና።

13 ሄ ጋላስ ዎልቃማ ማላካታይ ፑነታና፤ አሶረ ጋድያን ꬋይያዋንቱነ ግብጼ ቢታዉ የደርሴዳዋንቱ ያና፤ የሩሳላመን ጌሻ ደርያን መꬍና ጎዳዉ ጎይናና።