1 ኤፍሬማን ደእያ ማꬆትያዋንቱ ካላቻዉነ፥ ዎይንያ ኤሳይ ጾኔዳዋንቱ አራዳ ዛንጋራን ደእያ፥ ሹልያ ጪሻ ማላ ግዴዳ አ ቦንቹዋ ፑላዉ አየ አና! 2 በእተ፥ ጎዳዉ ዎልቃማነ ምኖ ግዴዳ እት አሳይ ደኤ፤ ጎዳይ አ ሻቻ ኡሹዋዳን፥ ባይዝያ ጎትያዳንነ ኩንꬂደ ጎግያ ዎልቃማ ሃꬃዳን፥ ምኖ ኩሽያን ዱገ ሳኣ ኦላና። 3 ሄ ማꬆትያ ኤፍሬማ አሳቱዋ ኦቶሩዋ ካላቻይ ገድያን የታና። 4 አራዳ ዛንጋራ ሁጲያን ደእያ ቆቆፈትያ ጪሻይ፥ አ ቦንቹዋ ፑላይ ዎዲ ጋካናፐ ካሰቲደ ቴሬዳ ባላስያ ማላ ግዳናዋ፤ እት አሳይ ሄ ባላስያ በእያ ዎደ፥ ባረ ኩሽያን ኦይቆሳና ማና።

5 ሄ ጋላስ ኡባፐ ዎልቃማ መꬍና ጎዳይ ባረ አሳፐ አቴዳዋንቶ ቦንቹዋ ካላቻነ ፑላዉ ሁጲያን ኡትያ አሌቁዋ ግዳናዋ። 6 እ ዳናቶ ልከ ፕርድያ አያና፥ ኦላ ሚጻፐ ዛርያዋንቶካ ዎልቃ ግዳናዋ።

7 ሀዋንቱካ ዎይንያ ኤሳ ኡሺደ ዪጮቲኖነ ማꬆይያ ኡሻን ጋንድጋሪኖ። ቄሲነ ትምቢትያ ኦድያዌ ማꬆይያ ኡሻን ዪጮቲኖ፤ ኡንቱንቱ ዎይንያ ኡሻን ሻዌቲኖ፤ ማꬆይያ ኡሻንካ ጋንድጋሪኖ። ሳፃ ልከ በእክኖ፤ ፕርዲደካ ꬉበቲኖ። 8 ኡንቱንቱ ምያ ማዳ ኡባይ ጮሻ ጻላላ ግድያ ድራዉ፥ ባይቤና ሳአይ ሙለካ ባዋ።

9 ኡንቱንቱ ሀዋዳን ያጋና፤ “ኤራተꬃ እ ኦና ታማርሳኔ? ኪታካ ኦስ ቆንጭሳኔ? ማꬃ ፓኩዋ ብሮ አጌዳዋንቱሴየ፥ ዎይ ꬋንꬃ ብሮ ዱꬄዳዋንቱሴ? 10 አያዉ ጎፐ፥ እ ግያዌ ሀዋ፤ አዛዙዋ ቦላ አዛዙዋ፥ አዛዙዋ ቦላ አዛዙዋ፥ ዎጋ ቦላ ዎጋ፥ ዎጋ ቦላ ዎጋ፥ ሀዋን ጉꬃ፥ ሄዋን ጉꬃ” ያጋና።

11 ሽን ጾሳይ አላጋቱዋ ቃላንነ እማꬃቱዋ ዶናን ሀ አሳዉ ሃሳያና። 1 ቆሮ. 14:21 12 እ ኡንቱንቶ ሀዋዳን ያጌዳ፤ “ሀዌ ሸምፑዋ። ጻላሌዳዋ ሸምፕስተ። ሀዌ ሸምፕ አክያ ሳ” ያጌዳ። ሽን ኡንቱንቱ ስሰናን እጼድኖ። 13 ሄዋ ድራዉ፥ ኡንቱንቱ ቢደ ኩንዳና ማላ፥ መአና ማላነ ግትያን ኦይቀቲደ ኦሞዱዋ ባና ማላ፥ መꬍና ጎዳ ቃላይ ኡንቱንቶ አዛዙዋ ቦላ አዛዙዋ፥ አዛዙዋ ቦላ አዛዙዋ፥ ዎጋ ቦላ ዎጋ፥ ዎጋ ቦላ ዎጋ ግዲደ፥ ሀዋን ጉꬃይ፥ ሄዋን ጉꬃይ ግዴዳ።

14 ሄዋ ድራዉ፥ ህንተኖ፥ የሩሳላመን ደእያ አሳ ሞድያ ቅሊጭያዋንቶ፥ መꬍና ጎዳ ቃላ ስስተ። 15 ህንተ፥ “ኑን ሀይቁዋና ጊጌዶ፤ ስኦልያናካ ጫቀቴዶ፤ ኑን ዎርዱዋ ኑዉ ደኡዋ ኦꬄዳ ድራዉነ ማልትያ ኑዉ ቆሰት አትያሳ ኦꬄዳ ድራዉ፥ ዎልቃማ ቦሻይ ዪደካ ኑና ቦቼናን አꬋና” ያጊደ ጬቀቲታ።

16 ሄዋ ድራዉ፥ ኡባ ሞድያ መꬍና ጎዳይ ሀዋዳን ያጌ፤ “በእተ፥ ታን ጽዮነን ባሱዋ ሹቻ፥ ፓጨቴዳ ሹቻ፥ ጎዳ ጻጱዋ ምንስያ፥ አልኦ ሹቻ ዎꬃድ፤ አን አማንያ ኦንነ ዬላተና። ማዝ. 118:22-23፤ ሮመ 9:33፤ 10:11፤ 1 ጰጽ. 2:6 17 ታን ሱረ ፕርዳ ባሱዋ ልክያ ዎዶሩዋ፥ ጽሎተꬃካ ቱምቢያ ኦꬃና። ቃይ ህንተ አማነትያ ዎርዱዋ ጌሱዋ፥ ሻቻይ ሾጫና፤ ህንተ ቆሰት አትያሳካ ሃꬃይ ሙካና” ያጌ። 18 ሄዋፐ ጉይያን፥ ህንተ ሀይቁዋና ጫቀቴዳ ጫቁ ላለታና። ስኦልያናካ ጫቀቴዳ ጫቁካ ምነና። ዎልቃማ ቦሻይ ይያ ዎደ፥ ህንተ አን ሾጨታና። 19 ሄ ቦሻይ ዎንታ ዎንታ፥ ቃምነ ጋላስ ሄዋና አꬋና፤ ሄ አꬍያ ዎደ ኡባንካ፥ ህንተና አክ ባና።

አ ኪታ አኬክያዌ ህንተንቶ ሻቢርሳ ዳጋማ ግዳናዋ። 20 አርሳይ ገድያ ጮጎቲደ ግሳናዉ ቃንꬃ፤ አፍላይካ ጋꬅ ማያናዉ ጉꬃ። 21 አያዉ ጎፐ፥ ፓራጺማ ደርያ ቦላን መꬍና ጎዳይ ኦꬄዳዋዳን፥ ባረ ኦሱዋ፥ ባረ እማꬃ ኦሱዋ፥ ሄዌካ ባረ ኦራꬃ ኦሱዋ ኦꬃናዉ ደንዳና። ቃይ ጋባኦና ዛንጋራን ሀንቀቴዳዋዳን ሀንቀታናዋ። ኢያሳ 10:10-12፤ 2 ሳሜላ 5:20፤ 1 ኦዱዋ 14:11 22 ጎዳፐ፥ ኡባፐ ዎልቃማ መꬍና ጎዳፐ እ ቦሻ ቢታ ኡባ ቦላ አሀናዉ ቃቼዳዋ ታን ስሴዳ ድራዉ፥ ህንተ ቃሹ ምነና ማላ፥ ቅሊጭያዋ አግተ።

23 ህንተ ሀይꬃ ሃ የጊደ፥ ታን ኦድያዋ ስስተ፤ ታ ሃሳያካ አኬኪደ ስስተ። 24 ካꬃ ዘራናዉ ጎሽያ ጎሻንቻይ ኡባ ገደካ ጎሺደ ደኢ? ቃይ እ ኡባ ገደካ ጉሉዋ ክንቺደነ ሊቅሲድ ደኢ? 25 ጋድያ ሊቅሲደ፥ አኑጋ ላሌ፤ ካረꬃ ሳዉዋካ ዘሬ፤ ዛርጋካ አ ይፓን፥ ባንጋካ አ ቆሙዋን፥ ሞርገ ምꬃካ አዉ በስያ ሳኣን ዘሬ ግደኔ? 26 አያዉ ጎፐ፥ ሀ ሂላ አ ጾሳይ አ ኤርሴነ ታማርሴ። 27 ካረꬃ ሳዉዋ ኡዱላ ምꬃን ቆጸና፤ አኑጋካ ጩጉዋን ቡከና። ሄዋ አጊደ፥ ካረꬃ ሳዉዋካ ጋትማን፥ አኑጋካ ጻምአን ቆጼ። 28 ኡክꬃ ኡክያ ካꬃ ቆጽያሳን ቆጽያዌ ሊቅሲየ? ግደና፥ እ አ ቆጺደ ቆጺደ፥ መꬍናዉ ደኤና። ቃይ እ ካꬃ ቡክያ ፓራ ጋረቱዋ አ ቦላና ላጊደካ ካꬃይ ጋጨታናዳን ኦና። 29 ሀዌካ ቃይ ማላልስያ ዞርያ ዞርያ፥ ኦሱዋካ አꬌዳ ኤራን ኦꬅያ ኡባፐ ዎልቃማ መꬍና ጎዳፐ ዬ።