1 ኔኖ ዳዊተ ደኤዳ አሪኤላ ግያ ካታማዉ፥ ነዉ አየ አና! ላይꬃ ቦላን ላይꬃ ጉጃ፤ ባላቱዋካ ዛራ ዛራደ ቦንቻ። 2 ታን አሪኤላ ግያ ካታማ ብሮካ ኡንኤꬃና፤ ኡንቱንቱ ዝላላናነ ዬካና። ሄ ካታማይ ሱꬃይ ካሜዳ ያርሽያ ሳኣ ማላ ግዳናዋ። 3 ታን ነ ዩሹዋን ዶዳናነ አዱሳ ግምቢያን ኔና ድራና፤ ነ ቦላን ኦላ ማማ ኬጻና። 4 ሄዋፐ ጉይያን፥ ኔን ቢታ ጪሙዋፐ ሃ ፑደ ሃሳያና፤ ህርክ ባናፐ ነ ኮሻይ ያና። ነ ኮሻይ ሞይትልያ ኮሻ፥ ቢታ ግዶፐ ከሳና፤ ነ ሃሳያይካ ባና ግዶፐ ሳሱከታና።

5 ሽን ነ ሞርከቱ ሊቆ ባና ኬሻ ጮራነ ነ መቀꬅ ባይናዋንቱ ፓይዱካ ጫርኩ አፍያ ሱላ ኬሻ ዳሮ ግዳናዋ። ቆፐናን ደእሽን ኤለካ፥ 6 ኡባፐ ዎልቃማ መꬍና ጎዳይ ጉጉንꬃን፥ ቢታ ቃꬃን፥ ዎልቃማ ኮሻን፥ ጎትያን፥ ጫርኩዋንነ ምያ ታማ ላጩዋን ህንተና ጾሞሳና። 7 አሪኤላ ካታማ ኦልያ ጮራ ካዉተꬃ ኡባይ፥ ሄ ካታማነ አ ጌሱዋ ኦልያ ኡባይ፥ አ ዋይስያ ኡባይ አኩሙዋዳን፥ ቃማ ሳጻዳን ሀናና። 8 ኮሻቴዳ አሳይ አኩሙዋን ሜ፤ ሽን ቤጎትያ ዎደ አ ኮሻይ አገና፤ ዎይ ሳመቴዳ አሳይ አኩሙዋን ኡሼ፤ ሽን ቤጎትያ ዎደ ዳቡሬ፤ ሳሙዋካ አልቤና፤ ጽዮነ ደርያ ኦልያ ጮራ ካዉተꬃ ኡባይ ሄዋዳን ሀናና።

9 ህንተ ህንተረካ ዳመቲደ፥ ዳማ አሳ ግድተ፤ ህንተና ህንተረካ ቆቅሲደ፥ ቆቀ አሳ ግድተ። ማꬆትተ፤ ሽን ዎይንያ ኤሳና ግዶፖ። ጋንድጋርተ፤ ሽን ማꬆይያ ኡሻና ግዶፖ። 10 አያዉ ጎፐ፥ መꬍና ጎዳይ ገምእሹዋ ሶኑ ኦꬅያ አያና ህንተ ቦላን ጉሴዳ። ትምቢትያ ኦድያዋንቶ፥ ያቲደ ህንተ አይፈቱዋ እ ጎዜዳ። ሳፃ በእያዋንቶ፥ ህንተ ሁጰቱዋካ ጉሎዬዳ። ሮመ 11:8

11 ሀ ኡባ ሳጻይ ነዉ አታመቴዳ ማጻፋ ማላ ግዴዳ። አሳይ፥ “ሄይ፥ ሀዋ ናባባ” ያግ፥ እት ናባብ ዳንዳይያ ኡራዉ እምያ ዎደ እ፥ “ማጻፋይ አታመቴዳ ድራዉ፥ ታን ናባባናዉ ዳንዳይከ” ያጋና። 12 ቃይ ማጻፋ ናባብ ዳንዳየና ኡራዉ፥ “ሄይ፥ ሀዋ ናባባ” ያጊደ እምያ ዎደ፥ እ፥ “ታን ናባባናዉ ዳንዳይከ” ያጋና።

13 ያትና፥ ጎዳይ ሀዋዳን ያጋና፤ “ሀዌ አሳይ ባረ ቦላ ዶናን ታኮ ሺቄ፤ ባረ እንጻርሳን ታና ቦንቼ፤ ሽን ኡንቱንቱ ዎዛናይ ታፐ ሃኩዋን ደኤ። ኡንቱንቱ አሳይ መꬌዳ ዎጋ ታማሪደ፥ ታዉ ጮ ጎይኒኖ። ማቶሳ 15:8-9፤ ማር. 7:6-7 14 ሄዋ ድራዉ፥ በእተ፥ ታን ሀ አሳ ቦላ ዛረꬃደካ ማላልስያባ ኦꬃና፤ ማላልያባነ ኦራꬃባ ኦꬃና። ኡንቱንቱ ኤራንቻቱዋ አꬌዳ ኤራተꬃይ ዳላማና፤ ኡንቱንቱ አኬካንቻቱዋ አኬካይካ ቆሰታና” ያጌዳ። 1 ቆሮ. 1:19

15 ባረ ሀልቹዋ ጪማዪደ፥ መꬍና ጎዳፐ ቆስያዋንቶ፥ ባረንቱ ኦሱዋ ꬉማን ኦꬂደ፥ “ኑና ኦን በኢ? ኑና ኦን ኤሪ?” ያግያዋንቶ አየ አና! 16 ህንተ የዎቱዋ ላሚታ፤ ኡርቃ መꬍያዌ ኡርቃ ማላ ጊደ ቆፒታ! መቴዳዌ መꬌዳዋ፥ “እ ታና መꬍቤና” ጋኔ? ኦቱ ባረና መꬌዳዋ፥ “እ አይነ ኤረና” ጋናዉ ዳንዳዪ?ኢሳ. 45:9

17 ሊባኖሳ ዎራይ አራዳ ጋድያዉ ላመታናዉ፥ አራዳ ጋዲ ቃይ ዎራ ግዳናዉ፥ ጉꬃ ዎዲ አቴዳ ግደኔየ?

18 ሄ ጋላስ ቱለቱ ማጻፋ ቃላ ስሳና፤ ለምእለምኣፐነ ꬉማፐ ከሲደ፥ ቆቀቱዋ አይፊ ጼላና። 19 አሽከቱ ጉጂድካ መꬍና ጎዳን ናሸታና፤ አሳ ግዶን ደእያ ህዬሳቱካ እስራኤልያ ጌሻን ሀሹ ጋና። 20 መቀꬅ ባይናዋንቱ ዉራና። ቅሊጭያዋንቱ ትምእ ጋና። ኢታባ ኦꬃናዉ ዎችያዋንቱ ኡባይ ꬋያና። 21 ሄዋንቱ የዉዋን አሳ ባይዛንቻ ከስያዋንታ፥ ችሎታን አሳ ሴርያዋንቶ ግትያ ዎꬅያዋንታነ ዎርዱዋን ጽሎ ብታንያ ፕርዳ ተእያዋንታ።

22 ሄዋ ድራዉ፥ አብራሃማ ዎዜዳ መꬍና ጎዳይ ያቆባ ዛርያዉ ሀዋዳን ያጌ፤ “ያቆባ ዛሪ ሀዋፐ ስንꬃናዉ ዬላተና፤ ኡንቱንቱ ሶምኢካ ዬላቲደ፥ ሳኣ ጼለና። 23 ሽን ኡንቱንቱ ታ ኩሽያ ኦሶ ግድያ ባረንቱ ናናቱዋ ባረንቱ ግዶን በእያ ዎደ፥ ታ ሱንꬃ ጌሻተꬃን ናጋና፤ ኡንቱንቱ ያቆባ ጌሻ ጌሻተꬃ ባይዝክኖ። እስራኤልያ ጾሳካ ያሻተꬃን ቦንቻና። 24 አያናን ባሌዳዋንቱ ስሚደ አኬካና፤ ዙዙምያዋንቱካ ትምርትያ አካና” ያጌ።