1 መꬍና ጎዳይ ሀዋዳን ያጌ፤ “ማካላንቻ ናናቶ አየ አና! ታን ሀልቻቤናባ ኦꬅያዋንቶ፥ ታ አያናፐ ግደና ኤጻ ባረዉ ጊግስያዋንቶ፥ ናጋራ ናጋራ ቦላ ጉጅያዋንቶ አየ አና። 2 ግብጼ ካትያ ጌሱዋን አታናዉነ ግብጼ ኩዋን አትያሳ ኮያናዉ፥ ታና ዞረታ በሰናን፥ ዱገ ግብጼ ዎꬍያዋንቶ አየ አና! 3 ሄዋ ድራዉ፥ ግብጼ ካትያ ጌሱ ህንተንቶ ዬላ፥ ካቲካ ካዉሻ ግዳናዋ። 4 ኡንቱንቱ ካፓቱ ጾኣነን ደኦፐካ፥ ኡንቱንቱ ኪቴዳዋንቱ ሀኔሳ ግያ ካታማ ጋክንቶካ፥ 5 ዬላፐነ ካዉሻፐ አትና፥ ሀራባ አያነ ዎና አሳ፥ አያነ ማደና ዎይ ጎኤና አሳን አማነቴዳ አሳይ ኡባይ ካዉሻና” ያጌ።

6 ኔጌባን ደእያ ዶአቱዋባ ጾሳይ ግያዌ ሀዋ፤ ኪተትያዋንቱ መቱነ ቱጋይ ደእያ ቢታ ግዱዋና፥ ጋሙነ ጋማታ ዎꬍያ ሾሻቱነ ፓልያ ዳዌቱ ኮልጽያ ኢታ ቢታና አꬊደ ባና። ባረ ዱረተꬃ ሀረቱዋ ዞክያን፥ ባረንቱ አቁዋ ጋሎቱዋ ዝመꬃን ጫን አኪደ፥ ኡንቱንቶ አያነ ዎꬍሰና ቢታ ባና። 7 አያዉ ጎፐ፥ ግብጼ ማዱ ጋቲ ባይናባነ መላ። ሄዋ ድራዉ፥ ታን አ፥ “ጮኡ ጊደ ኡቴዳ ራኣባ” ያጋደ ሱንꬃድ።

8 ሀእ ባ፤ ስንꬃና ያና ዎድያዉ መꬍና ማላታ ግዳና ማላ፥ ኡንቱንቱ ስንꬃን ሹቻ ማሰꬃን ዎጫ፤ ማዝጎባንካ ጻፋ። 9 አያዉ ጎፐ፥ ሀዋንቱ ማካላንቻ አሳቱዋነ ዎርዱዋ ናናቱዋ፤ ኡንቱንቱ መꬍና ጎዳይ ኦድያዋ ስሳናዉ ኮየና ናናቱዋ። 10 ኡንቱንቱ ሳፃ ኦድያዋንታ፥ “ሳጻ በኦፕተ” ያጊኖ፤ ትምቢትያ ኦድያዋንታካ፥ “ናሸችያባፐነ ማላትያባፐ አትና፥ ኑዉ ሱረባ ኦዶፕተ። 11 ኦግያፐ ክችተ፤ ሎሱዋፐካ እት ባጋ ስምተ፤ ኑን እስራኤልያ ጌሻባ ዛረꬂደ ስሶኮ” ያጊኖ።

12 ያትና፥ እስራኤልያ ጌሻይ ሀዋዳን ያጌ፤ “ህንተ ሀ ቃላ እጺደ፥ አሳ ናቂያዋን አማነቴዳ ድራዉነ ጭምያዋን ጬቀቴዳ ድራዉ፥ 13 ሀ ናጋራይ ህንተንቶ ዛኢደ ዎꬍያ፥ አኬከናን ኤለካ ኩንድያ አዱሳ ግምቢያ ማላ ግዳናዋ። 14 አ መኡ ኡርቃፐ መꬌዳነ ንፕ ጊደ መኤዳ ኦቱዋ ማላ ግዳናዋ፤ ሄ መኡዋ ግዶን ታማ ካሽያ ዎይ ኦላፐ ሃꬃ ዱቂደ ከስያ ኮንአይነ ቤተና” ያጌ።

15 ኡባ ሞድያ መꬍና ጎዳይ፥ እስራኤልያ ጌሻይ ሀዋዳን ያጌ፤ “ህንተ ታኮ ስምያዋንነ ሸምፕያዋን አታና፤ ጮኡ ግያዌነ አማነትያዌ ህንተንቶ ዎልቃ ግዳናዋ፤ ሽን ህንተ እጼድታ። 16 ሀዋዳን ያጌድታ፤ ‘ቱይት፥ ኑን ፓራቱዋን ኡቲደ ባቃታና’ ያጌድታ፤ ሄዋ ድራዉ፥ ህንተ ባቃታና። ቃይካ ህንተ፥ ‘ኤሌል ፓራቱዋ ቶጊደ ብ ክቻና’ ያጌድታ፤ ሄዋ ድራዉ፥ ህንተና የደርስያዋንቱ ኤሌላና። 17 እት ቶራንቻ በኢደ፥ ህንተፐ ሻአ አሳይ ባቃታና፤ እቼሹ ቶራንቻቱ ህንተና ሙልያ የደርሳና። ደርያ ሁጲያን ኤሴዳ ባንድራ ምꬃዳን፥ ህንተ ቶራንቻቱዋፐ ጉꬃቱ አታና” ያጌ።

18 ሽን መꬍና ጎዳይ ህንተንቶ ኬካናዉ ናጌ፤ እ ህንተንቶ ቃረትያዋ በሳናዉ ደንዴ። አያዉ ጎፐ፥ መꬍና ጎዳይ ጽሎ ፕርድያ ጾሳ፤ አ ናግያዋንቱ ኡባቱ አንጀቴዳዋንታ።

19 ህንተኖ፥ የሩሳላመን ደእያ ጽዮነ አሳቶ፥ ሀዋፐ ስንꬃናዉ ዬክክታ፤ ህንተ ዋሱዋን እ ህንተንቶ ቱሙዋፐ ቃረታና፤ እ ህንተ ዋሱዋ ስስያ ዎደ፥ ህንተንቶ ዛሩዋ እማና። 20 ጎዳይ ህንተንቶ መቱዋ ኡክꬃነ ቱጋ ሃꬃ እሞፐካ፥ ህንተ አስታማሪ ሀዋፐ ስንꬃን ባረና ቆሰና። ሽን ህንተ አይፊ ህንተ አስታማርያ በአና። 21 ህንተ ኡሸቻ ዎይ ሀድርሳ ስምያ ዎደ፥ ጉየና ህንተና፥ “ኦጊ ሀዋ፤ አን ቢተ” ያግያ ኮሻ ህንተ ስሳና። 22 ሄዋፐ ጉይያን፥ ብራን አሌቀቴዳ ኤቃቱዋነ ዎርቃን ካመቴዳ ምስለቱዋ ህንተ ቱንሳና። ቅታ ጩርቃዳን ህንተ ኡንቱንታ፥ “ኑፐ ሃክተ” ያጊደ ዎራ ኦላና።

23 ሄ ዎደ ህንተ ጋድያን ዘሬዳ ካꬃዉ እ እራ ቡክሳና፤ ጋድያፐ ሞክያ ካꬃይካ ሙሩታነ ዳሮ ግዳናዋ። ሄ ጋላስ ህንተ ሚዛይ አኮ ደምባን ሀመታና። 24 ጋድያ ጎሽያ ቦራቱነ ሀረቱ ላይዳንነ ግላን ፑነቲደ፥ ጌዬዳ ሀርቁዋ ማና። 25 ህንተ ሞርከቱዋ ጌሶቱ ኦሞደትና፥ አሳይ ጎራኤቲደ ዉርያ ጋላስ፥ ዎልቃማ ደረቱዋፐነ ꬎቃ ደረቱዋፐ ፑልቶ ሃꬃቱ ጎጋና። 26 ሄ ጋላስ አግናት ፖኡ አዋ ፖኡዋዳን ሀናና፤ አዋ ፖኡካ ካሰዋፐ ላፑን ኩሽያ ዳራና፤ ላፑን ጋላሳ ፖኡዋ ኬና ፖአና። ሄ ጋላስ መꬍና ጎዳይ መኤዳ ባረ አሳ ኮላና፤ እ ደችና ማዱጼዳ ማዱꬃካ ፓꬃና።

27 በእተ፥ መꬍና ጎዳ ሱንꬃይ ሱልያ ሀንቁዋና፥ ስኬዳ ጩዋ ሻርያና ሃኮ ሳፐ ያና፤ አ ዶናይ ሀንቁ ኩሜዳዋ፤ አ እንጻርሳይካ ምያ ታማ። 28 ባረ ፔኑዋን ኡባባ ፕት አፍያ ድኡዋዳን፥ ꬋይስያ ሃꬃ ኩንꬁዋ ማላ። እ ካዉተꬃቱዋ ባሻ ዛዝርያን ዛዝራና፤ አሳ ጋፓታካ ዎራ አፍያ ብጻላ ባርሳና። 29 ጌሻ ባላይ ቦንቼትያ ቃማ የጽያዋዳን፥ ህንተ የጻና፤ መꬍና ጎዳ ደርያ እስራኤልያ ዛላኮ ብያ ዎደ፥ ሱሱልያ ፑኒደ የጽያ አሳይ ናሸትያዋዳን፥ ህንተ ናሸታና።

30 ቃይ መꬍና ጎዳይ ባረ ያሽያ ኮሻ ስሳና፤ አ ቀሲ ዎꬊደ ሾጭያ ሾቻ ባረ ሱልያ ሀንቁዋን፥ ምያ ታማ ላጩዋን፥ ጎትያን፥ ኡሹዋንነ ሻቻ ቡርጭያን ቆንጭሳና። 31 መꬍና ጎዳይ ባረ ኮሻን አሶረ ዳጋንꬃና። አ ጻምአይካ ኡንቱንታ ሾጫና። 32 መꬍና ጎዳይ ኡንቱንታ ባረ ሙርያ ጻምአን ሾጫና ሾቻይ ኡባይ ዳርቢያንነ ዲꬃን ግዳናዋ። ኦላን እ ባረ ቄስያ ደንꬂደ፥ ኡንቱንታ ኦላና። 33 አያዉ ጎፐ፥ ታማ ኤꬅያሳኣ ቶፌት በን ጊጌዳ፤ ሄ ሳአይ ጊጌዳዌ ካትያሳ። ሄ ሳአይ ዝቃነ አኮ ግዲደ፥ ታማይነ ዳሮ ምꬃይ ዶረት ኡቴዳ ሳ። መꬍና ጎዳ ሸምፑ ዲንያ ሻፋዳን ዪደ፥ ሄ ታማ ኤꬅ ከሳና።