1 ማዱዋ ኮያናዉ ዱገ ግብጼ ዎꬍያዋንቶነ ፓራን አማነትያዋንቶ አየ አና! ጮራ ግድያ ድራዉ ፓራ ጋረቱዋን፥ ዳሮፐ ምኖ ግድያ ድራዉ ፓራ አሳቱዋን አማነትያዋንቶ አየ አና! ኡንቱንቱ እስራኤልያ ጌሻኮ ጼልክኖ፤ ዎይ መꬍና ጎዳፐ ማዱዋ ኮይክኖ። 2 ሽን እካ ባሻ አሀናዉ ዳንዳይያ አꬌዳ ኤራንቻ፤ ባረ ጌዳዋካ አገና፤ ኢታቱዋ ጎልያ አሳ ቦላነ ኢታባ ኦꬅያዋንታ ማድያዋንቱ ቦላ ደንዳና። 3 ግብጼ ጋድያ አሳቱ አሳፐ አትና፥ ጾሳ ግድክኖ። ኡንቱንቱ ፓራቱካ አሾፐ አትና፥ አያና ግድክኖ። መꬍና ጎዳይ ሀንቁዋን ባረ ኩሽያ ምጭያ ዎደ፥ ማድያዌ ꬉበታና፤ ማደትያዌካ ኩንዳና፤ ኡንቱንቱ ኡባይካ እትፐ ꬋያና።

4 ጾሳይ ታና ሀዋዳን ያጌ፤ “ጋሙ ዎይ ዎዳላ ጋሙ መህያ ኦይቂደ ጉድያ ዎደ፥ ዳሮ ሄንꬃንቻቱ አ ቦላ ጼሰት ሺቆፐካ፥ እ ኡንቱንቱ ዋሶ ዳጋመና። ኡንቱንቱ ዋሶካ ያየና። ሄዋዳንካ፥ ኡባፐ ዎልቃማ መꬍና ጎዳይ ጽዮነ ደርያንነ አ ꬎቃን ኦላ ጋከታናዉ ዱገ ዎꬋና። 5 ካፉ ቦላና አዋልያዋዳን፥ ኡባፐ ዎልቃማ መꬍና ጎዳይ የሩሳላመ ጎንዳላናነ አሽ አካና፤ እ አ ቦላና አꬊደ፥ አ ዎꬅ አካና” ያጌ።

6 ህንተኖ እስራኤልያ አሳቶ፥ ህንተ ሎይꬅ ማካሌዳዋኮ ስምተ። 7 አያዉ ጎፐ፥ አሳ ኡባይ ባረንቱ ናጋራንቻ ኩሽያን ብራፐነ ዎርቃፐ መꬌዳ ኤቃቱዋ ሄ ጋላስ ኦላና።

8-9 ታማይ ጽዮነን፥ ጮጪ የሩሳላመን ደእያ ጾሳይ ሀዋዳን ያጌ፤ “አሶረ አሳዋ ግደና ማሻን ኩንዳና፤ አሳዋ ግደና ማሻይ ኡንቱንታ ማና። ኡንቱንቱ ማሻ ስንꬃፐ ባቃታና፤ ኡንቱንቱ ዎዳላ አሳቱ ዴጾ ኦሶ አዛዘታና። ዳጋማ ጋሱዋን፥ ኡንቱንቱ ምኖ ጌሱ ላለታና፤ ኡንቱንቱ ኦላ ጋዳዋቱካ ዳጋማዉ ኦላ ባንድራ አግ ባሺደ ባና” ያጌ መꬍና ጎዳይ።