1 በእተ፥ ካቲ ጽሎተꬃን ካተታና፤ ሞድያዋንቱካ ሱረተꬃን ሞዳና። 2 አሳይ ሁጲያን ሁጲያን ጫርኩዋፐ ጌምያ ሳ፥ ጎትያፐ ባቃትያ ሳ ግዳናዋ፤ መላ ሳኣን ጎግያ ሃꬃነ ዞዘትያ ጋድያን ደእያ ዎልቃማ ዛላ ኩዋ ማላ ግዳናዋ። 3 ጼልያ አሳቱ አይፊ ጪልመና፤ ስስያዋንቱ ሀይꬃይካ ሀይዛና። 4 ታፍታፍያ አሳቱዋ ዎዛናይ ኤራናነ አኬካና። ዴዶትያ አሳቱዋ እንጻርሳይካ ሱረ ጌሺደ ሃሳያና። 5 ሀዋፐ ስንꬃናዉ ኤይ ቦንቾ አሳ ጌተተና። ኢታ አሳይ ቦንቼተና። 6 አያዉ ጎፐ፥ ቦዛይ ቦዛተꬃ ሃሳየ፤ አ ዎዛናይካ ናጋራ ኦꬃናዉ፥ መꬍና ጎዳ ቦላ ጻላባ ሃሳያናዉ፥ ኮሻቴዳዋንታ ካልሰናን አጋናዉነ ሳመቴዳዋንታ ኡሸናን ድጋናዉ፥ ኢታባ ማቀቴ። 7 ኡዘትያዋ ኡዚ ኢታ፤ መቶታንቻይ ሱረባ ሃሳዪደ፥ ዎርዱዋን ህዬሳ ꬋይሳናዉ እ ኢታ ቆፋ ቆፔ። 8 ሎኦ ኡራይ ሎኦባ ሀልቼ፤ ሄ ሎኦ ሀልቹዋን ምኒደ ደኤ።

9 ህንተኖ ቆፋይ ባይናን ደእያ ማጫዋንቶ፥ ደንድተ፤ ታ ኦድያዋ ስስተ፤ ህንተኖ አማነቲደ ኡቴዳ ማጫ ናቶ፥ ታን ህንተንቶ ኦድያዋ ስስተ። 10 እት ላይꬃፐ ጉꬃ አꬍሽን፥ ህንተ አማነቲደ ኡቴዳዋንቱ ኮኮራና፤ ዎይንያ አ ዎድያን ጹንቂያዌ አታና። ቶኬዳዋፐ ህንተ አይፍያ ሺሻና ዎዲካ ዬና። 11 ህንተኖ እሻሉዋን ደእያ ማጫዋንቶ፥ ኮኮርተ። ህንተኖ አማነቲደ ኡቴዳ ማጫ ናቶ፥ ጋጅ ጋጅተ። ህንተ ማዩዋ ቃርተ፤ ካዩዋ አፍላ ህንተ ጼሳን ዳንጭተ። 12 ሎእያ ሾይቃይነ አይፍያ ዶርጾጼዳ ዎይኒ ꬋዬዳ ድራዉ፥ ካዮቲደ፥ ህንተ ትራ ባቂተ። 13 አጉንꬃ ቡራይነ ክንድቹ ታ አሳ ጋደን ሞኬዳ። አሳይ ናሸቲደ ደኤዳ ጎለቱዋስነ ናሸቻን ደኤዳ ሀ ካታማዉ ዬክተ። 14 ሚጻይ አታና፤ ዳሮ አሳይ ደእያ ካታማቱካ ኦናና፤ ጌሱነ ዎችያ ግምበቱ መꬍናዉ መላ ግዳናዋ፤ ኡንቱንቱ ዎራ ሀረቱ ናሸትያሳነ ዶርሳ ዉዲ ሀመትያሳ ግዳናዋ። 15 ሄዌነ፥ ቦላ ꬎቃፐ ኑ ቦላ አያናይ ጉካና ጋካናሳ፥ መላ ባዙ አራዳና ጋካናሳነ አራዳ ቢታይካ ዎራ ግዴዳ ጌተቲደ ቆፈታና ጋካናሳ።

16 ሄዋፐ ጉይያን፥ ሱረ ፕርዳይ መላ ባዙዋን፥ ጽሎተꬃይካ አራዳ ጋድያን ደአና። 17 ጽሎተꬃ ኦሱ ሳሮተꬃ ግዳናዋ፤ ጽሎተꬃ አይፊካ መꬍናዉ ዎፓተꬃነ አማነቲደ ደእያዋ ግዳናዋ። 18 ታ አሳይ ሳሮተꬃይ ደእያ ሳኣን፥ ናገትያ ጎልያንነ ዎፑ ጌዳ ሸምፖ ሳአቱዋን ደአና። 19 ሻቻን ዎራይ ዲፖፐነ፥ ቃይ ካታማይ ኡባና ኮለቶፐነ፥ 20 ሄ ሃꬃ ኡባ ማታን ህንተ ካꬃ ዘሪደ፥ ህንተ መህያካ ህንተ ሀረቱዋካ ሄንꬃዉ ብል የዲደ፥ ህንተ ሎይꬅ አንጀታና።