1 ህንተኖ፥ ካዉተꬃቶ፥ ሺቂደ ስስተ! ህንተኖ አሳቶ ስስተ! ቢታይነ ጋድያን ደእያባይ ኡባይ፥ ሳአይነ ሳኣን ደእያባይ ኡባይ ስሶ! 2 አያዉ ጎፐ፥ መꬍና ጎዳይ ካዉተꬃ ኡባ ሀንቀቴዳ፤ አ ይሉካ ኡንቱንቱ ቶራንቻቱዋ ኡባ ቦላና። እ ኡንቱንቱ ኡባና ꬋይሳና፤ ኡንቱንታ ሲፍያዋንቶ አꬂደ እማና። 3 ኡንቱንቱፐ ዎꬌዳዋንቱ ኦለታና፤ ኡንቱንቱ አሃይ ጽንቃና። ዎጋ ደረቱ ኡንቱንቱ ሱꬃን ካመታና። 4 ሳሉዋ ጾልንተቱ ኡባይ ሲላና፤ ሳሎቱ ዋራቃታዳን ጻጸታና። ኡንቱንቱ ጾልንተቱ ኡባይ ዎይንያፐ ሀይꬃይ ቆቆፈትያዋዳን፥ ባላስያፐ አይፊ ቆቆፈትያዋዳን ቆቆፈታና። ማቶሳ 24:29፤ ማር. 13:25፤ ሉቃሳ 21:26፤ ሳፃ 6:13-14

5 ታ ማሻይ ሳሎቱዋ ግዶን አላና ጋካናዉ ኡሼዳ። በእተ፥ እ ኤዶማ ቦላ፥ ታን ሸቄዳ አሳ ቦላ ፕርዳናዉ ዎꬌ።ኢሳ. 63:1-6፤ ኤር. 49:7-22፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14፤ ሚልክ. 1:2-5 6 መꬍና ጎዳዉ ቦጽራ ግያ ካታማን ያርሹ፥ ኤዶማ ጋድያን ዎልቃማ ሹካይ ደእያ ድራዉ፥ መꬍና ጎዳ ማሻይ ሱꬃን ሜጨቲደ፥ ሞꬉዋን ጻጸቴዳ። ዶርሳቱዋነ ዴሻቱዋ ሱꬃን ሜጨቲደ፥ ዶርሳቱዋ ክላሆቱዋ ሞꬉዋን ጻጸቴዳ። 7 ቃይ መንꬃቱ፥ ማራቱነ ኮሩማ ቦራቱ ኡንቱንቱና ኩንዳና። ኡንቱንቱ ቢታይ ሱꬃ ጻላላ ግዳና፤ ኡንቱንቱ ቢታይካ ሞꬉዋን ሙናቀታና። 8 አያዉ ጎፐ፥ መꬍና ጎዳይ ሀሉዋ ከስያ ጋላሳ፤ ጽዮነ ኦሌዳ ሞርከቶ ኩሽያ ዛርያ ላይꬃ።

9 ጎግያ ኤዶማ ሃꬃቱ ሽድያዉ፥ አ ቢታይካ ዲንያዉ ላመታናዋ፤ አ ቢታይ ኤጽያ ሽድያ ግዳናዋ። 10 ታማይካ ቃማን ጋላሳን ቶኤና፤ አ ጩዋይካ መꬍናዉ ጩዋታና። ኤዶማ ቢታይ የለታፐ የለታ ጋካናዉ፥ መላ ግዳናዋ፤ ኦንነ መꬍናዉ ሄዋና አና።ሳፃ 14:11፤ 19:3 11 ሽን ጽንግሊነ ቁጻርሳይ አ ላታና፤ ጉቶቱነ ቁሩ አን ደአና። ጾሳይ ኤዶማ ቦላ ኮለꬃ ልክያ ዎዶሩዋነ መላተꬃ ልክያ ቱምቢያ ፕድ ኦꬂደ የዳና። 12 ሄ ጋድያን ካተትያዌ ꬋያና፤ ካፓቱካ ሄዋፐ ክቻና። 13 አ ጎለቱዋን አጉንꬃይ፥ አ ሚጻቱዋን ኦካይ ኦዶሩ ሞካና። እ ዎራካናቱ አላጽያሳነ ሶጎኒ ደኢያሳ ግዳናዋ። 14 ዎራ ዶአቱ ጎዳረቱዋና ጋከታና፤ ቱና አያናቱ እቱ እቱዋና ጼሰታና፤ ቃማ ጻላሄቱ ዎꬊደ፥ ያን ደአና። 15 ጉታታ ያን ጎልያ ኬጻና፤ ቁቁሌዳ ቁቁለቱዋ ሀጳደ ቆጻና። ባረ ማራቱዋካ ባረ ቀፈቱዋ ጋርሳን ሀጳና፤ ቃይ ጋጨቱ ባረንቱ ላግያና ላግያና ሄ ሳኣ ሺቃና።

16 መꬍና ጎዳ ማጻፋፐ ኮዪደ ናባብተ። ጾሳ ዶናይ አዛዜዳ ድራዉነ አ አያናይ ሺሼዳ ድራዉ፥ ሀዋንቱፐ እቱነ ፓጨና፤ ቃይ እቱነ ባረ ላጊ ባይናን ደኤና። 17 እ ኡንቱንቶ ሳማ ከሴዳ፤ አ ኩሺ ኡንቱንቶ ጋድያ ዎርዱዋን ሻኬዳ፤ ኡንቱንቱ አ መꬍናዉ ሞዳና፤ የለታፐ የለታ ጋካናዉ፥ ኡንቱንቱ አን ደአና።