1 መꬍና ጎዳይ ሀዋዳን ያጌ፤ “ታ ቆማዉ ያቆባ፥ ታን ዶሬዳ ይሽሩና፥ ሀእካ ስሳ። 2 ታን ኔና መꬋድ፤ ነ ዳይ ኡሉዋን ኔና ጊግሳድነ ማዳድ። ታ ቆማ ያቆባ፥ ታን ዶሬዳዎ፥ ያዮፓ። 3 ታን ሳመቴዳ ጋድያን ሃꬃ ጉሳና፤ መላ ቢታንካ ፑልቱዋ ጎግሳና። ታን ታ አያና ነ ናናቱ ቦላ፥ ታ አንጁዋካ ነ ዘረꬃቱዋ ቦላ ጉሳና። 4 ሃꬃ ዶናን ሞኬዳ ማታዳን፥ ቃይ ጎግያ ፑልቱዋ ማታን ደእያ ምꬃዳን፥ ኡንቱንቱ ሞካና። 5 እቱ፥ ‘ታን መꬍና ጎዳዋ’ ያጋና፤ ሀራይ ቃይ ባረና ያቆባ ሱንꬃን ጼሳና፤ ሀራይካ፥ ቃይ ባረ ኩሽያ ቦላን፥ ‘ታን መꬍና ጎዳዋ’ ያጊደ ጻፋና፤ እ ቃይ ባረና እስራኤሊ ጼሰትያ ሲቁዋ ሱንꬃን ጼሳና” ያጌ።

6 መꬍና ጎዳይ፥ እስራኤልያ ካቲ፥ አ ዎዝያዌ፥ ኢሳ. 48:12፤ ሳፃ 1:17፤ 22:13 ኡባፐ ዎልቃማ መꬍና ጎዳይ ሀዋዳን ያጌ፤ “ኮይሩ ታና፤ ዉርሰꬃይካ ታና። ታፐ ሀራ ጾሳይ ባዋ። 7 ታ ማላይ ኦኔ? ደኦፐ አነ አዋዮ፤ ቃይ አነ ታ ስንꬃን ኤቂደ ኦዶ። በንፐ ዶሚደ፥ ስንꬃፐ ያናዋ ኦድያዌ ኦኔ? አነ ኡንቱንቱ ስንꬃፐ ትምቢትያ ኑዉ ኦድኖ። 8 ያዮፕተ፤ ቃይ ዳጋሞፕተ። ታን ሀዋ ህንተንቶ በንፐ ዶማደ ኦዳበይክታ? ቃይ አዋያበይክታ? ሄዎ ታዉ ህንተ ማርካ። ታፐ አትና፥ ሀራ ጾሳይ ደኢ? ሀራ ዛል ባዋ፤ ታን ኦናነ ኤርከ” ያጌ።

9 ኤቃ ምስለቱዋ ማሲደ መꬍያ ኡባቱ ሀዳ፤ ኡንቱንቱ አን ናሸትያባቱ ኡንቱንታ ጎእክኖ። ኡንቱንቱ ማርካቱካ በእክኖነ ኤርክኖ። ሄዋ ድራዉ፥ ኡንቱንቱ ዬላታና። 10 ጾሳ ጊግሴዳዌ፥ ዎይ አያዉነ ጎኤና ምስልያ ማሴዳዌ ኦኔ? 11 በእተ፥ አ ላገቱ ኡባይ ዬላታና፤ ኩሽያ ሂላንቻቱ ኡባይ አሳ። አነ ኡንቱንቱ ኡባይካ እትፐ ሺቂደ ኤቂኖ። ኡንቱንቱ ያያና፤ ቃይ ኡንቱንቱ ኡባይካ እትፐ ዬላታና።

12 ብራታ ቆጽያዌ ባረ ቡክያ ብራታ ታማን ዎꬄ፤ ቦንቄዳዋ ባቻን ቆጺደ፥ ባረ ምኖ ቀስያን አ መታ ጊግሴ። ሄዋ ጊግሲደ ኮሻቴ፤ አ ምኖተꬃይካ ዉሬ። ሃꬃካ ኡሸና፤ ላባኔ።

13 አናጺ ዎዶሩዋን ልኬ፤ እርሳስያን አ ቦላ ማላታ ዎꬄ፤ ያቲደ ማሎግያን ልልእሴ። ልኪደ፥ ፑላና ደእያ አሳ ምስልያ ማላትስ ጊግሲደ፥ ባረ ሶን ዎꬄ። 14 እ ሄዋ ኦꬃናዉ ዝጋ ቃንጼ፤ ዎይ ዎላ ዎይ ጽድያ ዎራ ግዶፐ ዶሪደ ድጫናዳን ኦꬄ። ዎይ እጾፐ፥ እ ዝጋ ቶክና፥ እራይ አ ድቻናዉ ናጌ። 15 ሄዋፐ ጉይያን፥ እ አሳይ ኤꬅያ ምꬃ ግዴ፤ እካ አፐ ባጋ አኪደ፥ ኤꬂደ ሆኤ፤ ቃይ ባጋ ኤꬂደ፥ ኡክꬃ ኡኬ። አፐካ ጾሳ መꬊደ፥ አዉ ጎይኔ፤ ቃይ ምስልያ ማሲደ፥ አ ስንꬃን ጉፋኔ። 16 አፐ ባጋ ታማን ኤꬂደ፥ ቁማ ካꬄ፤ ባጋን አሹዋ ጺጺደ፥ ካሊደ ሜ። ቃይ ታማ ሆእ ስሚደ፥ “ሀሹ፥ ላ ሀዌ አያ ሆኢ!” ያጌ። 17 ቃይ አቴዳ ምꬃ ማሲደ፥ ባረዉ ጎይንያ ጾሳ ምስልያ ከሴ። ሄ ምስልያ ስንꬃን ጉፋኒደ፥ አዉ ጎይኔ፤ ያቲደ፥ “ኔን ታ ጾሳ ግዴዳ ድራዉ፥ ታና አሻ” ያጊደ ዎሴ።

18 ኡንቱንቱ አይነ ኤርክኖ፤ አይነካ አኬክክኖ። አያዉ ጎፐ፥ ኡንቱንቱ በኤና ማላ፥ ኡንቱንቱ አይፊ ጎዘቴዳ፤ ቃይ አኬከና ማላ፥ ኡንቱንቱ ዎዛናይካ ጎርደቴዳ። 19 ኤቃ ኦꬅያ አሳይ ባረ ዎዛናን፥ “አፐ ባጋ ታማን ኤꬃድ፤ አ ቦንቁዋንካ ኡክꬃ ኡካድ፤ አሹዋካ አን ጺጻደ ማድ። ያትና፥ አፐ አቴዳዋ ሸነይያ ኤቃ ኦꬃደ መꬎ? ቃይ ምꬃ ሙዶ ጉፋናደ ጎይኖ?” ያግያ ኤር ዎይ አኬክ ኦስነ ባዋ። 20 እ ብድንꬃ ሜ፤ አ ጭመቴዳ ዎዛናይ አ ዎራ ካለꬄዳ። እ ባረ ሸምፑዋ አሻናዉ ዎይ፥ “ታ ኡሸቻ ኩሽያን ደእያዌ ዎርዱዋ ግደኔ?” ጋናዉ ዳንዳየና።

21 ጾሳይ ሀዋዳን ያጌ፤ “ያቆባ፥ ነኖ እስራኤልያዉ፥ ኔን ታ ቆማ ግድያ ድራዉ፥ ሀ የዎቱዋ ሀሳያ። ታን ኔና ጊግሳድ፤ ኔን ታ ቆማ። ኔኖ እስራኤልያዉ፥ ታን ኔና ዶግከ። 22 ታን ነ ባይዙዋ ሻርያዳን፥ ነ ናጋራካ ጫጋናዳን ቁጫድ። ታን ኔና ዎዜዳ ድራዉ፥ ታኮ ስማ” ያጌ።

23 ህንተኖ ሳሎቶ፥ መꬍና ጎዳይ ሀዋ ኦꬄዳ ድራዉ፥ ናሸቻን የጽተ። ህንተኖ ቢታ ጪማቶ፥ እልልተ። ህንተኖ ደረቶ፥ ዎራዉነ አ ግዶን ደእያ ምꬃ ኡባዉ፥ ማዝሙርያ ክንችተ። አያዉ ጎፐ፥ መꬍና ጎዳይ ያቆባ ዎዜዳ፤ ቃይ እስራኤልያ ግዶንካ እ ቦንቼታና።

24 ኔና ዎዝያዌ፥ ዳይ ኡሉዋን ኔና መꬌዳዌ መꬍና ጎዳይ ሀዋዳን ያጌ፤ “ታን መꬍና ጎዳ፥ ኡባ የዎቱዋ መꬌዳዋ፤ ሳሎቱዋ ታረካ ምጬዳዌ፤ ሳኣካ ታረካ ምጬዳዌ ታና። 25 ታን ዎርዱዋ ትምቢትያ ኦድያዋንቱ ማላታ ሀዳ ኦꬃይ፤1 ቆሮ. 1:20 ቃይ ሻሬቾቱዋካ ኤያ ከሳይ። ታን አꬌዳ ኤራንቻቱዋ ጉየ ዛራይ፤ ኡንቱንቱ ኤራካ ኤያ ኦꬃይ። 26 ታን ታ ቆማ ቃላ ምንꬃይ፤ ታ ኪቴዳዋንቱ ሀናና ጌዳዋካ ፖላይ። ታን የሩሳላመ ካታማ፥ ‘ኔን አሳይ ደኢያሳ ግዳና’ ያጋይ፤ ይሁዳ ካታማቱዋካ፥ ‘ህንተ ስሚደ ኬጸታና፤ ህንተ ግምቢያካ ኦራጽሳና’ ያጋይ። 27 ታን ሃꬃ ጪማቱዋካ፥ ‘መልተ! ህንተ ጎግያ ሃꬃቱዋካ መልሳና’ ያጋይ። 28 ቃይ ቂሮሳ፥ ‘ኔን ታ አሳ ሄምያዋ፤ 2 ኦዱዋ 36:23፤ እዝራ 1:2 ኔን የሩሳላመ ካታማ፥ “ነ ስማደ ኬጸታና” ያጋደ፥ ጌሻ ጎልያካ፥ “ነ ባሱ ባሰታና” ያጋደ ታ ሀልቹዋ ፖልያዋ’ ያጋይ” ያጌ።