1 መꬍና ጎዳይ ኦኬዳዎ፥ ካዉተꬃቱዋ አዉ ሞድሳና ማላ፥ ካተቱ ዳንጩዋ ብላና ማላነ ፐንጊካ አዉ አ ስንꬃን ዶየታና ማላ፥ አ ኡሸቻ ኩሽያ ኦይቄዳ ቂሮሳዉ ጾሳይ ሀዋዳን ያጌ፤ 2 “ታን ነ ስንꬃና ባና፤ ደረቱዋ ደምባያና። ናሃስያ ብራታ ሳንቃቱዋ መንꬃና፤ ብራታ ኩልቦቱዋካ ቃንጻና። 3 ኔና ነ ሱንꬃን ጼስያዌ ታና መꬍና ጎዳ፥ እስራኤልያ ጾሳ ግድያዋ ኔን ኤራና ማላ፥ ታን ነዉ ꬉማ ሳኣን ደእያ አቁዋነ ጌማን ቆሰቲደ ዱረታ እማና። 4 ታ ቆማ ያቆባ ድራዉነ ታን ዶሬዳ እስራኤልያ ድራዉ፥ ታን ኔና ነ ሱንꬃን ጼሳይ። ኔን ታና ኤራና ꬋዮፐ፥ ታን ኔና ቦንቾ ሱንꬃን ጼሳይ።

5-6 “ታን መꬍና ጎዳ፤ ታፐ ሀራይ ባዋ፤ ታፐ ሀራ ጾሳይ ደኤና። አዋይ ሞክያሳፐ ቢደ፥ ዉልያሳ ጋካናዉ ደእያ አሳይ ታፐ ሀራይ ባይናዋ ኤራና ማላ፥ ታን ኔና ግጽሳ። ግዶፐነ፥ ኔን ታና ኤራባካ። ታን መꬍና ጎዳ፤ ታፐ ሀራይ ባዋ። 7 ታን ፖኡዋ ኦꬃይ፤ ꬉማካ መꬋይ። ሳሮተꬃ ኦꬃይ፤ ባሻካ አያይ። ታን መꬍና ጎዳይ፥ ሀ ኡባ የዎቱዋ ኦꬅያዋ።

8 “ህንተኖ ሳሎቶ፥ ቦላፐ ዱገ ጽሎተꬃ ትግተ፤ ሻረቱካ አ ቡክኖ። ቢታይ ዶየቶ፤ አቶተꬃይካ ፑደ ሞኮ። ጽሎተꬃይካ አናና እትፐ ድጮ። ታን መꬍና ጎዳይ ሀዋ መꬋድ።

9 “ባረና መꬌዳዋና ባጸትያዎ አየ አና!ሮመ 9:20 አያዉ ጎፐ፥ እ ኡርቃ ሚሻፐ እቱዋ። ኡርቃይ መꬍያዋ፥ ‘አይ ኦꬃይ?’ ዎይ ቃይ፥ ‘ነዉ ኩሺ ባዋ’ ያጊ? 10 ባረ አዉዋ፥ ‘አያዉ የላዲ?’ ያግያ ኡራዉ፥ ዎይ ባረ ዳዮ፥ ‘አያዉ ታና ሀዋዳን የላዲ?’ ያግያ ኡራዉ አየ አና! 11 መꬍና ጎዳይ፥ እስራኤልያ ጌሻይ፥ አ መꬌዳዌ፥ ሀዋዳን ያጌ፤ ‘ስንꬃፐ ትምቢትያ ኤራናዉነ ታ ናናቱዋባ ታና ኦቻናዉ ህንተ በሲቴ? ታ ኩሽያን ታን ኦꬃናባካ ታና አዛዛናዉ በሲቴ? 12 ታን ሳኣ ኦꬃድ፤ አሳካ አ ቦላ መꬋድ። ሳሎቱዋ ታን ታ ኩሽያን ቶላድ፤ ኡንቱንቱን ደእያ መታቱዋ ኡባካ አዛዛድ። 13 ታን ቂሮሳ ጽሎተꬃን ደንꬃድ፤ አ ኦግያ ኡባካ ሱረ ኦꬃና። ሻሉዋ ጭገናን፥ ዎይ ማታይያ እመናን፥ እ ታ ካታማ ኬጻና፤ ታ አሳካ ኦሞዱዋፐ ከሳና’ ያጌ። ታን ኡባፐ ዎልቃማ መꬍና ጎዳይ ሀዋ ኦዳይ” ያጌ።

14 መꬍና ጎዳይ ሀዋዳን ያጌ፤ “ግብጼ ዱረታይነ ቶጵያ ዛልኢ፥ ቃይ ጌሳ አዱሳ ግድያ ሳባአ አሳቱካ ኔኮ ዪደ፥ ነባ ግዳናዋ። ኡንቱንቱ ሳንሳላታን ቃሸቲደ፥ ኔና ካላና። ኡንቱንቱ ነዉ ጎይኒድ፥ ‘ጾሳይ ነ ጻላላና ደኤ፤ ሀራይ ባዋ፤ አፐ ሀራ ጾስ ባዋ’ ያጊደ ነዉ ዋትዋታና” ያጌ።

15 አቤት ጾሳዉ፥ እስራኤልያ አሽያዎ፥ ቱሙዋፐ ኔን ኔና ገንꬅያ ጾሳ። 16 ኤቃ መꬍያዋንቱ ኡባይካ ዬላታናነ ካዉሻና። ኤቃ ምስልያ መꬍያዋንቱ ኡባይ እትፐ ካዉሻዉ ባና። 17 ሽን እስራኤልያ መꬍና ጎዳይ መꬍና አቶተꬃን አሽ ድጌዳ፤ ህንተ መꬍናዉካ ዬላትክታነ ካዉሽክታ።

18 ሳሎቱዋ መꬌዳ መꬍና ጎዳይ፥ ቢታካ ጊግሲደ ኦꬄዳዌ፥ ቃይ አሳይ ደአናዳናፐ አትና፥ ቢታ ጮ መꬍቤና መꬍና ጎዳይ ሀዋዳን ያጌ፤ “ታን መꬍና ጎዳ፤ ታፐ ሀራይ ባዋ፤ 19 ታን ጌማን፥ ሀቃነንቶ እት ꬉማ ጋድያን ሃሳያበይከ። ያቆባ ዘረꬃዉካ፥ ‘ታና ጮ ኮይተ’ ጋበይከ። ታን መꬍና ጎዳይ ቱሙዋ ሃሳያይ፤ ልከባ ኦዳይ።

20 “ህንተኖ ካዉተꬃቱዋፐ አቴዳዋንቶ፥ እትፐ ሺቂደ ሃይተ፤ ማታ ሺቅተ። ምꬃፐ ኦሰቴዳ ኤቃ ምስልያ ቶክ ዩይያዋንቶነ፥ አሻናዉ ዳንዳየና ጾሳ ዎስያዋንቶ ኤር ባዋ። 21 አነ ኦድተ፤ ህንተ ሞቱዋ ሺሽተ፤ ኡንቱንቱካ አነ እትፐ ዞረትኖ። አዱሳ ዎድያፐ ካሰ ሀዋ ኦዴዳዌ ኦኔ? በንፐ ሀዋ አዋዬዳዌ ኦኔ? ታና መꬍና ጎዳ ግድክታየ? ታፐ አትና ሀራ ጾሳይ ባዋ። ታን ጽሎ ጾሳነ አሽያዋ። ታፐ ሀራይ ባዋ።

22 “ህንተኖ ቢታ ጋጻን ደእያ ኡባ አሳቱ፥ ታኮ ስሚደ፥ አትተ። አያዉ ጎፐ፥ ታን ጾሳ፤ ታፐ ሀራይ ባዋ። 23 ታን ታ ሁጲያን ጫቃድ፤ ሮመ 14:11፤ ፕልጵ. 2:10-11 ጉየ ስመና ቃላይ ታ ዶናፐ ጽሎተꬃን ከሴዳ፦ ‘አሳይ ኡባይ ታዉ ጉልባታና፤ እንጻርሳ ኡባይካ ታናን ጫቃና’ ያጋድ።

24 “ኡንቱንቱ ታዋ ሃሳዪደ፥ ‘ጽሎተꬃይነ ምኖተꬃይ መꬍና ጎዳ ጻላላን ደኤ’ ያጋና” ያጌ።

አ እጽያዋንቱ ኡባይ አኮ ዪደ ዬላታና። 25 ሽን እስራኤልያ ዘረꬃይ ኡባይ መꬍና ጎዳን፥ ጾኑዋነ ቦንቹዋ ደማና።