1 ኔኖ ጽዮነ ካታማዉ፥ ቤጎታ፤ ምኖተꬃ አፍላዳን ማያ። ሳፃ 21:2፣ 27 ኔኖ፥ ጌሻ ካታማዉ፥ የሩሳላመ፥ ነ ቦንቹዋ ማዩዋ ማያ፤ አያዉ ጎፐ፥ ሀዋፐ ስንꬃናዉ ቃጻረትቤናዌነ ቱናይ ነ ግዶ ገለና። 2 ኔኖ፥ ኦሞደቴዳ የሩሳላመ፥ ነ ባና ቆቆፋ። ደንዳዴ ነ ካተቱዋ አራታን ኡታ። ህንተኖ፥ ኦሞዱዋን ደእያ ጽዮነ አሳቶ፥ ህንተ ቆꬍያን ቃሸቴዳ ሳንሳላታ ብርሽተ።

3 አያዉ ጎፐ፥ ኡባ ሞድያ ጾሳይ ሀዋዳን ያጌ፤ “ህንተ ካሰካ ጋትያ አከናን ዛልኤቴድታ፤ ቃይ ሀእካ ሚሻ እመናን ጮ ዎዘታና። 4 ታ አሳይ ኮይሮ በተ ግዲደ፥ ግብጼ ቢታ ቤዳ፤ ሽን አሶረቱ ታ አሳ ጮ ኡቁኔድኖ። 5 መꬍና ጎዳይ፥ ታ አሳይ ጋትያ ጭገናን ጮ ኦሞዱዋን ብ ክችና፥ ታዉ ሀዋን አዬ ደእያዌ? ኡንቱንታ ሞድያዋንቱ ዋሲኖ፤ ታ ሱንꬃይካ ኡባ ገደ ጋላሳ ኩመንꬃ ቦረቴ ያጌ መꬍና ጎዳይ። ሮመ 2:24 6 ሄዋ ድራዉ፥ ታ አሳይ ታ ሱንꬃ ኤራና፤ ሄ ጋላስ ሃሳይያዌ ታና ግድያዋ ኡንቱንቱ ኤራና። ኤ ሄዌ ታና። ታን ጾሳይ ሀዋ ኦዳይ” ያጌ።

7 ሎኦ ምሽራቹዋ አህያ፥ ሳሮተꬃ ኦድያ፥ ናሸችያ ምሽራቹዋ ኦድያ፥ አቶተꬃ ኦድያነ፥ ጽዮኖካ፥ “ነ ጾሳይ ካተቴ” ጊደ ደረቱዋ ቦላና ይያ ብታንያ ገደቱ ዎት ሎእኖ!ናሆማ 1:15፤ ሮመ 10:15፤ ኤፈ. 6:15 8 ስስተ፥ ህንተ ካታማ ናግያዋንቱ ባረንቱ ቃላ ꬎቁ ኦꬂደ፥ ናሸቻዉ እትፐ የጺኖ፤ መꬍና ጎዳይ ጽዮነ ስምያ ዎደ፥ እ ስሞዋ ኡንቱንቱ ባረንቱ አይፍያን በአና። 9 ህንተኖ የሩሳላመን ኮለቴዳ ሳቶ፥ እትፐ ናሸቻዉ የጽተ፤ አያዉ ጎፐ፥ መꬍና ጎዳይ ባረ አሳ ምንꬄዳ፤ የሩሳላመ ካታማካ ዎዜዳ። 10 መꬍና ጎዳይ ባረ ጌሻ ቀስያ ካዉተꬃቱዋ ኡባ ስንꬃን ቆንጭሴዳ፤ ቃይ ቢታ ጋጻይ ኡባይካ ኑ ጾሳ አቶተꬃ በአና።

11 ህንተኖ መꬍና ጎዳ ጎልያ ሚሻቱዋ ቶክያዋንቶ፥ ክችተ፥ ክችተ፤ ያፐ ከስተ። ቱናባ ቦቾፕተ፤ አ ግዶፐ ከስ ክችተ። ህንተ ሁጲያዉካ ጌይተ። 2 ቆሮ. 6:17 12 ሽን ከሲደ፥ ኤለካ ከስክታ፤ ዎይ በቲደ ቢክታ፤ አያዉ ጎፐ፥ መꬍና ጎዳይ ህንተፐ ስንꬃዉ አꬊደ ካለꬃና፤ እስራኤልያ ጾሳይካ ጉየና ግዲደ፥ ህንተና ናጋና።

13 ጾሳይ ሀዋዳን ያጌ፤ “በእተ፥ ታ ቆማይ አኬካን ኦꬃና፤ እ ቦንቼቲደ፥ ꬎቁ ꬎቁ ጋና፤ እ ሎይꬅ ግታታና። 14 አ ሶምኢ አሳ ኡባዋፐ፥ አ ማላይካ አሳ ናና ኡባፐ ቆሄቴዳ፤ አ በኢደ፥ ዳሮ አሳይ ዳጋሜዳ። 15 ሽን ሀእ ዳሮ ካዉተꬃቱ ኡባይ አባን ማላለታና፤ ሮመ 15:21 አፐ ደንዴዳዋን፥ ካተቱ ባረንቱ ዶና ኦይቃና፤ አያዉ ጎፐ፥ ኡንቱንቱ ባረዉ ኦደትቤናዋ በአና፤ ስስቤናዋካ አኬካና” ያጌ።