1 ጾሳይ ሀዋዳን ያጌ፤ “ህንተኖ ጽሎተꬃ ካልያዋንቶ፥ ህንተኖ ታና፥ መꬍና ጎዳ ኮይያዋንቶ፥ ስስተ። ህንተ ጳልቀቲደ አከቴዳ ሹቻነ ህንተ ቦከቴዳ ከሴዳ ኦላ ጼልተ። 2 ህንተ አዉዋ አብራሃማኮነ ህንተና የሌዳ ሳርኮ ጼልተ። እ ባረካ ደእሽን፥ ታን አ ጼሳድ፤ አንጃድነ ፓይዱዋን ጮራያድ።

3 “መꬍና ጎዳይ ጽዮነንነ አ ኮለቴዳ ሳአቱዋን ደእያ ኡባ አሳ ምንꬃና። እ ባዙዋ ኤደነ ገነትያዳን፥ እ መላ ሳአቱዋካ መꬍና ጎዳ አታክልትያ ሳኣዳን ኦꬃና። ናሸቻይነ ሀሹ ጉሳይ ያን ደአና፤ ጋላታነ ማዝሙርያ ኮሻይ ያን ስሰታና።

4 “ታ አሳዉ፤ ታን ኦድያዋ ስስተ። ታ ካዉተꬃዉ፥ ነ ሀይꬃ ታኮ የጋደ ስሳ። አያዉ ጎፐ፥ ህጊ ታፐ ከሴ፤ ታ ሱረ ፕርዳይካ ካዉተꬃቶ ፖኦ ግዳናዋ። 5 ታ ጽሎተꬃይ ኤሌሊደ ሺቃና፤ ታ አሹካ ከሲደ፥ ኦግያን ደኤ። ታ ቀሲ አሳ ሞዳና፤ አባ ዶና ቢታቱዋን ደእያ አሳይ ኡባይ ታናን አማነቲደ ናጋና፤ ቃይ ታን ኡንቱንታ ታ ዎልቃን አሻናዋ፥ ናሸቻ ኦꬂደ ናጋና። 6 ፑደ ꬎቁ ጊደ፥ ሳሎቱዋ ጼልተ፤ ዱገ ሳኣካ ጼልተ። አያዉ ጎፐ፥ ሳሎቱ ጩዋዳን ፕስክ ጊደ ꬋያና፤ ሳአይካ አፍላዳን ዉራና፤ አን ደእያ አሳይ ኡባይ ኡዱንጸቱዋዳን ሀይቃና። ሽን ታ አሹ መꬍናዉ ደአና፤ ታ ጽሎተꬃይካ ዉረና።

7 “ህንተኖ ጽሎተꬃ ኤርያዋንቶ፥ ታ ህጊካ ህንተ ዎዛናን ደእያዋንቶ፥ ስስተ። አሳ ቦርናሾ ያዮፕተ፤ ኡንቱንቱ ቦርያዉካ ዳጋሞፕተ። 8 አያዉ ጎፐ፥ ማዩዋ ምያዋዳን፥ ብልአይ ኡንቱንታ ማና፤ ዶርሳ እክስያ ምያዋዳን፥ ጉጹኒ ኡንቱንታ ማና። ሽን ታ ጽሎተꬃይ መꬍናዉ ደአና፤ ታ አሹካ የለታ ኡባዉ ጋካና” ያጌ።

9 አቤት ጾሳዉ፥ ቤጎታ! ቤጎታ! መꬍና ጎዳ ቀስያዉ፥ ዎልቃ ማያ፤ ካሰ አꬌዳ ዎደቱዋንነ የለታቱዋን ቤጎቴዳዋዳን ቤጎታ። ራኣባ ግያ ዳዊያ ቃንጸሬꬄዳዌ፥ ሚምንትያካ ጫዴዳዌ ኔና ግድኪየ? 10 አባነ ዎልቃማ ጪሙዋ ሃꬃ መልሴዳዌ ኔና ግድኪየ? ኔን ዎዜዳዋንቱ ፕናና ማላ፥ ጪማ አባ ኦገ ኦꬄዳዌ ኔና ግድኪየ? 11 መꬍና ጎዳይ ዎዜዳዋንቱ ስሚደ፥ የጺድ ጽዮነ ያና፤ ዪደ መꬍና ናሸቻይ ኡንቱንቱ ቦላን ደአና፤ ኡንቱንቱ ናሸቻነ ሀሹ ግያዋ ደማና። ቃይ ካዩነ ዬኩ ኡንቱንቱፐ ሃካና።

12 ጾሳይ ሀዋዳን ያጌ፤ “ህንተና ምንꬅያዌ ታና። ያትና፥ ሀይቂያ አሳዉ ያያናዉ፥ ማታዳን ኤለካ መልያ አሳ ናአዉ ያያናዉ ህንተ ኦኔ? 13 ህንተ ሳሎቱዋ ምጬዳነ ሳኣ ባሱዋካ ባሴዳ መꬍና ጎዳ፥ ህንተናካ መꬌዳዋ ዶጌድቴ? ኡንቱንቱ ህንተና ꬋይሳናዉ ጊግሴዳ፥ ህንተና ኡቁንያ አሳቱዋ ሀንቁዋ ጋሱዋን ጋላሳ ኩመንꬃ ያዬድታ። ሽን ህንተና ኡቁንያዋ ሀንቁ ሀቃን ደኢ? 14 ኦሞደቴዳዌ ኤለካ ብለታና፤ ሀይቀና፤ ኦላንካ ገለና፤ አዉ ኡክꬃይካ ፓጨና። 15 አያዉ ጎፐ፥ ታን መꬍና ጎዳ ነ ጾሳቴ። ቤታይ ዋሳናዳን፥ አባ ቃꬃይ። ታ ሱንꬃይ ኡባፐ ዎልቃማ መꬍና ጎዳ። 16 ሳሎቱዋ ምጫናዳን፥ ቢታ ባሱዋካ ባሳናዳን፥ ቃይ ጽዮነ፥ ‘ኔን ታ አሳ’ ጋናዳን፥ ታን ታ ቃላ ነ ዶናን ዎꬃድ፤ ታ ኩሽያ ኩዋን ታን ኔና ገንꬃድ” ያጌ።

17 ኔኖ፥ መꬍና ጎዳ ኩሽያፐ አ ሀንቁዋ ጹኣ ኡሼዳ የሩሳላመ፥ ቤጎታ!ሳፃ 14:10፤ 16:19 ደንዳ! ኔን ጋንድጋርስያ ጹኣ ጭንግርሳደ ኡሻዳ። 18 አ የሌዳ ናናቱ ኡባፐ እዞ ካለꬅያባይ እቱነ ባዋ፤ ቃይ አ ድቼዳ ናናቱ ኡባፐካ እ ኩሽያ ኦይቂያዌ እቱነ ባዋ። 19 ዳኮ ዳሮ ባሻይ ነ ቦላን ጋኬዳ፤ ያትና፥ ኔና ኦኔ ምንꬃናዉ ዳንዳይያዌ? ሄዋንቱካ ኮለꬃ፥ ኮሻነ ማሻ። ያትና፥ ታን ኔና ዋታደ ምንꬃኔ? 20 ነ ናናይ ላባኔድኖ፤ ኡንቱንቱ ግትያ ግዶን ገሌዳ ገንእያዳን፥ ኦገ ኡባ ጋጻን ኩንዴድኖ። ኡንቱንቱ መꬍና ጎዳ ሀንቁዋንነ ነ ጾሳ ሴራን ኩሜድኖ።

21 ሄዋ ድራዉ፥ ነኖ፥ ዎይንያ ኤሳ ኡሸናን ማꬆቴዳ መቶታንቻቴ፥ ሀዋ ስሳ። 22 ነ ጾሳይ፥ ባረ አሳዉ ሞተትያ ኡባ ሞድያ መꬍና ጎዳይ ሀዋዳን ያጌ፤ “በአ፤ ኔና ጋንድጋርስያ፥ ታ ሀንቁዋ ጹኣ ታን ነ ኩሽያፐ አካድ፤ ኔን ላኤንꬁዋ አ ሙለካ ኡሻካ። 23 ታን ሄዋ ኔና ቱጋይያዋንቱ ኩሽያን ዎꬃና። ኡንቱንቱ ኔና፥ ‘ኑን ነ ቦላና ሀመቲደ አꬋና ማላ፥ ዛቁላ’ ያጌድኖ። ኔን አꬋና ጋካናዉ፥ ነ ዞክያ ኡንቱንቶ ቢታዳንነ ኦግያዳን ኦꬃዳ” ያጌ።