1 መꬍና ጎዳይ ሀዋዳን ያጌ፤ “ቱሙ ፕርዳ ናግተ፤ ጽሎባ ሀንተ፤ አያዉ ጎፐ፥ ታ አሹ ኤሌሊደ ያና፤ ታ ጽሎተꬃይካ ማታን ቆንጫና። 2 ሀዋ ኦꬅያ ኡራ፥ ሳምባታ ቱንሰናዳን ቦንችያ ኡራነ ኢታባ ኦናን እጽያ ኡራ ታን አንጃና” ያጌ።

3 መꬍና ጎዳኮ ሺቄዳ በቲ፥ “መꬍና ጎዳይ ታና ባረ አሳፐ ቱሙ ሻካና” ጎፖ። ቃይ ሙይሬሳይካ፥ “በአ፥ ታን መሌዳ ምꬃ” ጎፖ።

4 መꬍና ጎዳይ ሀዋዳን ያጌ፤ “ታ ሳምባታቱዋ ቦንችያ፥ ታና ናሸችያባ ዶርያነ ታ ጫቁዋ ምንሲደ ናግያ ሙሬሳቶ፥ 5 ኡንቱንቶ ታን ታ ጌሻ ጎልያ ግዱዋንነ ታ ድርሳ ግምቢያ ግዶን፥ ኡንቱንቱ ሀሳየትያዋ እማና። ማጫ ናናቱዋፐነ አቱማ ናናቱዋፐ ሎእያ ሱንꬃ ታን ኡንቱንቶ እማና፤ ታን ኡንቱንቶ መꬍናዉ ꬋየና ሱንꬃ እማና። 6 መꬍና ጎዳዉ ኦꬃናዉ፥ መꬍና ጎዳ ሱንꬃ ዶሳናዉነ አ ቆማ ግዳናዉ፥ ባረንታ አኮ ሺሽያ በተቱዋ፥ ቃይ ሳምባታ ቱንሰናን ቦንችያዋንታነ ታ ጫቁዋ ምንሲደ ናግያዋንታ ኡባቱዋ 7 ታን ታ ጌሻ ደርያ አሀና፤ ታ ዎሳ ጎልያን ኡንቱንታ ናሸቻና። ኡንቱንቱ ታ ያርሽያ ሳኣ ቦላን ሺሽያ፥ ጹግያ ያርሹነ ሀራ ያርሹ አከታና፤ አያዉ ጎፐ፥ ታ ጎሊ አሳይ ኡባይ ጾሳ ዎስያ ጎልያ ጌተታና” ያጌ። ማቶሳ 21:13፤ ማር. 11:17፤ ሉቃሳ 19:46

8 እስራኤልያፐ ላለቴዳዋንታ ሺሽያ፥ ኡባ ሞድያ መꬍና ጎዳይ፥ “ሺቄዳዋንቱ ቦላ ጉጃደ፥ ታን ሀራቱዋካ ሺሻና” ያጌ።

9 ህንተኖ ባዙዋ ዶአቶ፥ ህንተኖ ዎራን ደእያ ዶአቶ፥ ኡባይካ ሃ ዪደ ሚተ። 10 እስራኤልያ አሳ ናግያዋንቱ ቆቀ፤ ኡንቱንቶ ኡባዉካ ኤር ባዋ። ኡንቱንቱ ኡባይካ ቦጫናዉ ዳንዳየና ዱደ ካናቱዋ ማላ። ኡንቱንቱ ግሲደ አኩመቲኖ፤ ኡንቱንቱ ገምእሹዋ ዶሲኖ። 11 ኡንቱንቱ ሚደ ካለና ካና ማላ፤ ካል ኤርክኖ። ኡንቱንቱ አኬክ ፓጬዳ ሄንꬃንቻ፤ ኡንቱንቱ ኡባይ ባረንቱ ኦግያ ኦግያ ስሜድኖ፤ ኡባይካ ባረንቱ ጎአ ጻላላ ኮዪኖ። 12 ኡንቱንቱ ኡባይካ፥ “ሃ ዪተ፤ ዎይንያ ኤሳ አነ ኡሼቶ። አነ ኑ ማꬆይያ ኡሻ ኩመንꬃ ጋነቶ! ዎንታይካ ሀች ማላ ግዳናዋ፤ ዎይ ሀችፐካ አꬍ ሎአና” ያጊኖ።