1 ጾሳይ ሀዋዳን ያጌ፤ ሳፃ 21:6፤ 22:17 “ህንተኖ ሳመቴዳዋንቶ፥ ኡባይካ ሃꬃኮ ሃ ዪተ፤ ሻሉ ባይናዋንቶ፥ ሃይተ። ሻምተ፤ ሚተ። ሃ ዪደ፥ ሚሻ ጭገናን ጮ ዎይንያ ኤሳካ ማꬃካ ሻምተ። 2 ህንተ ሚሻ ቁማ ግደናባዉ አያዉ ከሲቴ? ካልሰናዋን ህንተ ዎልቃ አያዉ ዉርሲቴ? አነ ሎይꬂደ፥ ታን ኦድያዋ ስስተ፤ ሎኦባ ሚተ፤ ቃይ ሞꬉዋን ህንተ አሳተꬃ ናሸችተ።

3 “ታ አሳዉ፥ ስስተ፤ ታኮ ሃ ዪተ። ኪታ 13:34 ሸምፑዋና ፓጻ ደአና ጎፐ፥ ታን ኦድያዋ ስስተ። ታን ህንተናና መꬍና ጫቁዋ ጫቀታና። ታን አንጃና ጋደ ዳዊታ አንጄዳዋዳን፥ ህንተናካ አንጃና። 4 በእተ፥ ታን አ አሳዉ ማርካ፥ ካለꬅያዋነ ካፑዋ ኡዳድ። 5 በአ፥ ኔን ኤረና ካዉተꬃቱዋ ጼሳና፤ ቃይ መꬍና ጎዳ ነ ጾሳ እስራኤልያ ጌሻ ጋሱዋን፥ ኔና ኤረና ካዉተꬃቱ ኔኮ ኤሌሊደ ያና። አያዉ ጎፐ፥ ጾሳይ ኔና ቦንቼዳ” ያጌ።

6 መꬍና ጎዳይ ቤትያ ዎደ አ ኮይተ፤ ማታን ደእያ ዎደ አ ጼስተ። 7 ኢታይ ባረ ኦሱዋ፥ ናጋራንቻይካ ባረ ቆፋ አጎ፤ ጾሳኮ እ ስሞ። እ አ ማራና። እ ኑ መꬍና ጎዳኮ ስሞ። እ አዉ ጮ አቶ ጋና።

8 አያዉ ጎፐ፥ መꬍና ጎዳይ፥ “ታ ቆፋይ ህንተ ቆፋ ማላ ግደና፤ ህንተ ኦጊካ ታ ኦግያ ማላ ግደና። 9 ሳሎቱ ሳኣፐ ꬎቂያዋዳን፥ ታ ኦጊ ህንተ ኦግያፐ ꬎቄ፤ ታ ቆፋይካ ህንተ ቆፋፐ ꬎቄ። 10 እራይነ ሱፓ ሻቻይ ሳሉዋፐ ዎꬊደ፥ ቢታ አሊደ፥ ሞካናዳንነ አይፋናዳን ኦꬅያዋዳን፥ ቃይ ዘርያዎ ዘረꬃ፥ ምያዋዉካ ካꬃ እመናን ጉየ ሳሉዋ ስመናዋዳን፥ 2 ቆሮ. 9:10 11 ታ ዶናፐ ከስያ ቃላይካ ሄዋ ማላ። እ ታን ሀልቼዳዋ ፖላና፤ ቃይ ኪቴዳዋ ኦꬃናፐ አትና፥ ታኮ ጮ ስመና።

12 “ህንተ ናሸቻን ከሳና፤ ሳሩዋን ሞይዘታና። ደረቱነ ከራቱ ህንተ ስንꬃን ናሸቲደ የጻና፤ ደምባን ደእያ ምꬃቱ ኡባይካ ባረንቱ ኩሽያ ባቃና። 13 አጉንꬃ ድራዉ ጺዳይ፥ ጎምኦርያ ድራካ ጻይꬃይ ሞካና። ሄዌ መꬍና ጎዳይ ሀሳየትያዋነ መꬍናዉ ꬋየና ማላታ ግዳናዋ” ያጌ።