1 ጾሳይ ሀዋዳን ያጌ፤ “ነ ቃላ ꬎቁ ኦꬃደ ዋሳ፤ ጉየ ጎፓ። ነ ኮሻ ማላካታዋዳን ꬎቂሳ። ታ አሳዉ ኡንቱንቱ ማካላ፥ ያቆባ ጎልያ አሳዉካ ኡንቱንቱ ናጋራ ኦዳ። 2 ሽን ኡንቱንቱ ታና ሀች ሀች ኮዪኖ፤ ታ ኦግያካ ካላናዉ ዶስያዋ ማላቲኖ። ጽሎባ ኦꬄዳ ካተተꬃዳንነ ጾሳ አዛዙዋ ኦልቤና አሳዳን፥ ኡንቱንቱ ታና ሱረ ፕርዳ ኦቺኖ፤ ታኮ ጾሳኮ ሺቃናዉካ ዶሲኖ” ያጌ።

3 ኡንቱንቱ ሺቂደ ጾሳ፥ “ኑን ጾሜዶ፤ ሽን ኔን አያዉ ኑና ጼላበይኪ? ኑን ኑናተꬃ ካዉሼዶ፤ ሽን ኔን ኑና አያዉ ኤራበይኪ?” ያጊኖ።

ጾሳይ ዛሪደ፥ ኡንቱንታ ሀዋዳን ያጌ፤ “በእተ፥ ህንተ ጾምያ ጋላስ ህንተና ናሸችያባ ኦꬂታ፤ ህንተ ኦሳንቻ ኡባ ኡቁኒታ። 4 በእተ፥ ህንተ ዋላሳዉነ ዋታዉ ጾሚታ፤ ቃይ መቀꬅ ባይና ደሸꬃ ደቻናዉ ጾሚታ። ሀቼ ህንተ ጾምያ ሀዋ ማላ ጾማይ፥ ህንተ ቃላይ ቦላን ስሰታናዳን ኦና። 5 ታን ዶርያ ጾማይ ሀዋ ማሌየ? እት አሳይ ባረናተꬃ ካዉሽያዌ ሀዋ ማላ ጋላሳኔየ? ቃይ ታን ኮይያ ጾማይ አሳይ ባረ ሁጲያ ጬጫዳን ዱገ ሆክስያዌየ? ብድንꬃ ቆሊደ፥ ማቃ ሂጺደ ግስያዌየ? ያትና፥ ሄዋ ጾማ ጊደ ጼጊቴየ? ቃይ ሄ ጾምያ ጋላሳይካ መꬍና ጎዳይ ናሸትያ ጋላሳ ጌተቲየ?

6 “ታን ዶሬዳ ጾማ ሀዋ በእተ፦ ፕርዳን ናቂደ ቃቼዳዋንቱ ሳንሳላታ ለፕያዋ፥ ሞርገ ምꬃ ጎንያ ብልያዋ፥ ኡቁነቴዳዋንታ ኡቁኑዋፐ ከስያዋነ ሞርገ ምꬃ ኡባ መንꬅያዋ። 7 ቃይ ታን ዶሬዳ ጾማይ ኮሻቴዳዎ ህንተ ቁማ ሻክያዋ፥ ጎሊ ባይና ህዬሳቱዋ ጎልያ አክያዋ፥ ካሎቴዳዋንታ በእያ ዎደ፥ ማይዝያዋ፥ ማዱዋ ኮይያ ህንተ ዳቡዋፐ ህንተ ዴሙዋ ገንናን አግያዋ። ማቶሳ 25:35

8 “ያቶፐ፥ ህንተ ፖኡ ዎንታ ጻልቂያዳን ፖአና፤ ህንተ ፓጻተꬃይካ ኤለካ ያና። ህንተ ጽሎተꬃይ ህንተፐ ስንꬃና ባና፤ መꬍና ጎዳ ቦንቹካ ህንተፐ ጉየና ግዲደ፥ ህንተና ናጋና። 9 ሄ ዎደ ህንተ ጼሳና፤ መꬍና ጎዳይ ህንተንቶ ኮያና። ህንተ ማዱዋ አካናዉ ዋሳና፤ እካ፥ ‘ሄኮ፥ ታን ሀዋን ደአይ!’ ያጋና።

“ህንተ ግዶፐ ህንተ ኡቁንያ ሞርገ ምꬃ ድጎፐ፥ ቃይ ብራꬍያን ማላትያዋነ ኢታባ ሃሳይያዋ አጎፐ፥ 10 ኮሻቴዳዋ ቁማ ሙዚደ ካልሶፐ፥ ናቀቴዳዋ እ ኮይያዋ ካልሶፐ፥ ሄ ዎደ ህንተ ፖኡ ꬉማን ፖአና፤ ህንተ ቃማይካ ሴታ ጋላሳ ግዳናዋ። 11 መꬍና ጎዳይ ህንተና ኡባ ገደ ካለꬃና፤ ህንተና መላ ባዙዋን ኮሽያዋካ እ ህንተዉ ኩንꬃና። ህንተ ቦላ ጻጱዋካ ምንሳና። ቃይ ህንተ ሃꬃ ኡሽያ ገነትያ ማላነ አ ሃꬃይ ሙለካ ቶኤና ፑልቱዋ ማላ ግዳናዋ። 12 በን ኮለቴዳዋንታ ህንተ ዛረꬂደ ኬጻና፤ ዳሮ ዎድያፐ ካሰ ባሰቴዳ ባሶቱካ ኬጸቲደ ꬎቁ ጋና። ህንተካ ኮለቴዳ ግምበቱዋ ዛረꬂደ ግምቢያዋንታነ አሳይ ደእያ ሳአቱዋን ኦግያ ከስያዋንታ ጌተት ጼሰታና” ያጌ።

13 ቃይካ ጾሳይ ሀዋዳን ያጌ፤ “ሳምባታ መꬍና ጎዳዉ ዱማ ጋላሳዳን ጼሎፐ፥ ሄ ታ ጌሻ ጋላስ ህንተ ጎኣ የደርስያዋንታ ግዳና ꬋዮፐ፥ ሳምባታ ናሸችያነ ቦንቼቴዳ ጾሳ ጋላሳ ቦንቹዋ ጊደ ጼሶፐ፥ ቃይካ ህንተ ህንተ ኦግያ ቤናን አጊደ፥ ቦንችያዋ ግዶፐ፥ ዎይ ህንተና ናሸችያባ ኦናንነ ሀዳባ ሃሳየናን አጎፐ፥ 14 ሄ ዎደ ህንተ መꬍና ጎዳን ናሸታና። ቃይ ታን ህንተና ዳሮ ቦንቼቴዳዋንታ ኦꬃና፤ ህንተ አዉዋ ያቆባ ጋድያፐ ላተቴዳዋ ህንተ ማናዳን፥ ታን ህንተና ኦꬃና። ታን መꬍና ጎዳይ ሀዋ ሃሳያድ” ያጌ።