1 በእተ፥ መꬍና ጎዳ ኩሺ ህንተና አሻናዉ ቃምቤና፤ አ ሀይꬃይካ ስሰናን እጻናዉ ቱልቤና። 2 ሽን ህንተ ናጋራይ ህንተፐነ ህንተ ጾሳፐ ግዱዋን ሻኮተꬃ መꬌዳ። ቃይ እ ስሰና ማላ፥ ህንተ ናጋራይ አ ዴሙዋ ህንተፐ ገንꬄዳ። 3 አያዉ ጎፐ፥ ህንተ ኩሺ ሱꬃን፥ ህንተ ብራꬊካ ናቁዋን ቱኔዳ፤ ህንተ ዶናይ ዎርዱዋ ሃሳየ፤ ህንተ እንጻርሳይካ ኢታባ ዙዙሜ።

4 ጽሎተꬃን ሞትያዌ ባዋ፤ ቱማተꬃን ፕርድያዌካ ባዋ። ኡንቱንቱ መላ ፓሉምያን ጬቀቲኖ፤ ዎርዱዋ ሃሳዪኖ። ቃይ መቱዋ ሻሃሪደ፥ ኢታተꬃ የሊኖ። 5 ኡንቱንቱ ሾሻ ቁቁልያ ቆጺኖ፤ ሻራሮትያ ጎልያካ ኬጺኖ። ኡንቱንቱ ቁቁለቱዋ ምያ አሳይ ሀይቄ፤ ቁቁልያፐ እቱ መኦፐ፥ ሾሻይ አ ግዶፐ ከሴ። 6 ኡንቱንቱ ኬጼዳ ሻራሮታት ጎሊ ማያናዉ ኡንቱንታ ጎኤና። ኡንቱንቱ ባረንቱ መꬌዳዋን ባረና ካምክኖ። ኡንቱንቱ ኦሱ ኢታ ኦሶ፤ ማካላ ኦሱ ኡንቱንቱ ኩሽያን ደኤ። 7 ኡንቱንቱ ገደቱ ኢታባ ኦꬃናዉ ዎጺኖ፤ ጽሉዋ ሱꬃ ጉሳናዉካ ጃሚኖ። ኡንቱንቱ ቆፋይ ኢታ ቆፋ። ኡንቱንቱ ቤዳ ሳ ኡባን ቆሁነ ባሻይ ደኤ። ሮመ 3:15-17 8 ኡንቱንቱ ሳሮተꬃ ኦግያ ኤርክኖ፤ ኡንቱንቱ ብያ ኦግያን ሱረ ፕርድ ባዋ፤ ኡንቱንቱ ባረንቱ ኦግያ ጌላዬድኖ፤ ሄ ኦገቱዋና ሀመትያ ኦንነ ሳሮተꬃ ኤረና።

9 ሄዋ ድራዉ፥ ሱረ ፕርዳይ ኑፐ ሃኬዳ፤ ጽሎተꬃይካ ኑኮ ጋከና። ኑን ፖኡዋ ኮዬቶ፤ ሽን በእተ፥ ꬉማ ግዴዳ፤ ዎልቃማ ፖኡዋ ኮዬቶ፤ ሽን ꬉማን ሀመቴቶ። 10 ኑን አይፊ ባይና ቆቅያዳን፥ ድርሳ ግምቢያኮ ታታፌቶ። ሳአይ ለምእለምእና ሀመትያዋዳን፥ ሴታ ጋላስ ꬉበቴቶ። ቃይ ኩመንꬃ ዎልቃና ደእያ አሳቱዋ ግዶን ኑን ሀይቄዳ አሳቱዋ ማላ ግዴዶ። 11 ኑን ኡባይካ ጋሙዋዳን ጉዴቶ፤ ሀራጰቱዋዳንካ ካዮቲደ ኦሌቶ። ኑን ሱረ ፕርዳ ኮዬዶ፤ ሽን ደምበይኮ። ቃይ አቶተꬃካ ኮዬዶ፤ ሽን እ ኑፐ ሃኬዳ።

12 አያዉ ጎፐ፥ ኑ ባይዙ ነ ስንꬃን ዳሬዳ፤ ኑ ናጋራይካ ኑ ቦላ ማርካቴ። ኑ ባይዙ ኑናና ደኤ፤ ኑ ናቁዋካ ኑን ኤሬቶ። 13 ኑን ማካሊደ፥ ጾሳ ካዴዶ፤ ኑ መꬍና ጎዳ ካልያዋ አጊደ፥ ጉየ ስሜዶ፤ ሱገꬃነ ገንያ ሃሳዬዶ። ቃይ ኑን ሻሃሬዳ ዎርዶ ቃላ ኑ ዎዛናፐ የሌዶ። 14 ሱረ ፕርዳይ ጉየ ሱገቴዳ፤ ጽሎተꬃይካ ኑፐ ሃኬዳ፤ አያዉ ጎፐ፥ ቱማተꬃይ ጉታራን ꬉበቴ፤ አማነትያ ሀኖታዉ ገልያ ሳአይ ꬋዬዳ። 15 ቱማተꬃይ ሀቃንነ ቤተና፤ ኢታተꬃፐ ሃክያ አሳይ ባረዉ ኦሞደቴ።

መꬍና ጎዳይ በኢደ፥ ሱረ ፕርዳይ ባይናዎ ካዮቴዳ። 16 ኡቁነቴዳዋንታ ማድያ አሳይ ባይናዋ ጾሳይ በኤዳ፤ ጋናትያ አሳይ ባይናዎ ጋራመቴ። ሄዋ ድራዉ፥ አ ቀሲ አዉ አቶተꬃ አሄዳ። አ ጽልቶተꬃይ አ ዘምፕሲደ ኦይቄዳ። ኢሳ. 63:5 17 ጾሳይ ጽሎተꬃ ትራን ዎꬅያ ኦላ ሚሻዳን ማዬዳ፤ ባረ ሁጲያንካ አቶተꬃ ቆብያ ዎꬄዳ። ሀሉዋ ከስያ ማዩዋካ ማዪደ፥ ምሹዋ ቁማዩዋ ቁማዬዳ። ኤፈ. 6:14፣ 17፤ 1 ተስ. 5:8 18 እ ኡንቱንቶ ኡንቱንቱ ኦሱዋዳን ኦሱዋዳን ዛራና፤ ባረ ሞርከቶ ሀንቁዋ፥ ባረ ባልጋራቶካ ሙሩዋ ዛራና። አባ ዶና ቢታቱዋን ደእያዋንቶ ኡንቱንቱ ኦሶ በስያዋ እማና። 19 ሄዋ ድራዉ፥ አዋይ ዉልያ ባጋና ደእያዋንቱ መꬍና ጎዳ ሱንꬃዉ ያያና፤ አዋይ ዶልያ ባጋና ደእያዋንቱካ አ ቦንቹዋ ያያና። አያዉ ጎፐ፥ መꬍና ጎዳ ጫርኩ ጋጋንꬅ የድና፥ ጎግያ ድኡዋዳን እ ያና።

20 መꬍና ጎዳይ ሀዋዳን ያጌ፤ “ታን ጽዮነዉነ ያቆባ ዛራቱዋን ባረንቱ ናጋራፐ ስምያዋንቶ ዎዝያዋ ግዳደ ያና” ያጌ። ሮመ 11:26

21 ቃይካ መꬍና ጎዳይ ሀዋዳን ያጌ፤ “ታና ግዶፐ፥ ታን ኡንቱንቱና ጫቀትያ ጫቁ ሀዋ: ህንተ ቦላን ደእያ ታ አያናይነ ታን ህንተ ዶናን ዎꬄዳ ታ ቃላይ ሀችፐ ዶሚደ፥ መꬍና ጋካናዉ፥ ህንተ ዶናፐ፥ ህንተ ናናቱ ዶናፐነ ህንተ ናናቱ ናናቱ ዶናፐ ሻከተና። ታን መꬍና ጎዳይ ሀዋ ኦዳይ” ያጌ።