1 ጾሳይ ሀዋዳን ያጌ፡ “ደንዳ! ደንዳደ ፖእሳ፤ አያዉ ጎፐ፥ ነ ፖኡ ዬዳ። መꬍና ጎዳ ቦንቹካ ነ ቦላን ፖኤዳ። 2 በአ፥ ꬉማይ ሳኣ ካማና፤ ባራ ꬉማይካ አሳ ቦላን ዎꬋና። ሽን መꬍና ጎዳይ ነ ቦላ ደንዳና፤ አ ቦንቹካ ነ ቦላ ፖአና። 3 ካዉተꬃቱ ነ ፖኡዋኮ፥ ካተቱካ ነ ዎንታ ዋጃጃኮ ያና።

4 “ꬎቁ ጋደ ነ ዩሹዋ ጼላ። ኡንቱንቱ ኡባይ እትፐ ሺቂደ፥ ኔኮ ያና። ነ አቱማ ናናይ ሃኩዋፐ ያና፤ ነ ማጫ ናናይካ ባኤቲደ፥ ኔኮ ያና። 5 ሄ ዎደ ኔን በኣደ ናሸታና፤ ነ ዎዛናይካ ሎይꬅ ፖጩ ጋና። አያዉ ጎፐ፥ አባ ቦላን ደእያ ግዳይ ኔኮ ስማና፤ ካዉተꬃቱዋ ዱረተꬃይካ ኔኮ ያና። 6 ምድያማ ቢታፐነ ኤፋ ጋድያፐ ዬዳ ያላጋ ጋሎቱዋ ዉዲ ነ ቢታ ካማና። ቃይ ዎርቃነ እጻና ጫነቴዳ ጋሎቱ መꬍና ጎዳ ጋላታ አዋዪደ፥ ሳባፐ ያና። 7 ቄዳረነ ናባዮታ ዶርሳ ዉደቱ ኡባይ ያርሾ ታ ያርሹዋ ሳኣ ኔኮ ሺቃና፤ ቃይ ታንካ ታ ቦንቾ ጌሻ ጎልያ ቦንቻና።

8 “ሀ ሻርያዳንነ ባረንቱ ጎልያኮ ፓልያ ሀራጰቱዋዳን ፓልያዋንቱ ኦኔ? 9 ሀዋንቱ ሃꬃን ዶደቴዳ ቢታቱ ታናን ህዶታ ኦꬃና። እስራኤልያ ጌሻይ መꬍና ጎዳይ ህንተ ጾሳይ ህንተና ቦንቼዳ ድራዉ፥ ተርሴሰ ማርካባቱ ስንꬃት ከሲደ ነ ናናቱዋ ሃኮ ቢታፐ ኡንቱንቱ ብራናነ ዎርቃና ጾሳ ቦንቾ አሀና።

10 “አላጋ ጋድያ አሳይ ነ ድርሳ ግምባና፤ ኡንቱንቱ ካተቱ ነዉ ኦꬃና። ኔና ታን ታ ሀንቁዋን ካሰ ሾጬዳዋ ግዶፐካ፥ ሀእ ታ ቃረታን ታን ኔና ማራድ። 11 ነ ፐንገቱ ኡባ ገደ ዶያ ደአና። ሳፃ 21:25-26 ካዉተꬃቱዋ ዱረተꬃነ ኦሞደቴዳ ካተቱዋ ኔኮ አሀና ማላ፥ ጋላስካ ቃማካ ጎርደትክኖ። 12 ነዉ ኦና አሳይ ዎይ ካዉተꬃይ ኡባይ ኡባና ꬋያና። 13 ታ ጌሻ ጎልያ ሳኣ ሎይꬃና ማላ፥ ሊባኖሳ ቦንቹ፥ ዝጋይ፥ ጺዳይነ ጻይꬃይ ኔኮ ያና፤ ታን ታ ገድያ ዎꬅያ ሳኣ ቦንቻና። 14 ኔና ኡቁኔዳዋንቱ አቱማ ናናይ ነዉ ሆኪደ፥ ኔኮ ያና፤ ሳፃ 3:9 ኔና ካꬌዳ ኡባቱ ነ ስንꬃን ጎይናና። ኡንቱንቱ ኔና፥ ‘መꬍና ጎዳ ካታማቴ ጽዮኔ፥ እስራኤልያ ጌሻ ካታማቴ’ ያጊደ ጼሳና።

15 “ኦንነ ነ ግዶና አናዋ ኬና ኔን ካሰ ኦለታዳነ እጸታዳ። ሽን ሀእ ታን ኔና መꬍናዉ ዎልቃማ ኦꬃና፤ ቃይ የለታ ኡባይ ናሸትያ ሳ ኦꬃና። 16 ኔን ካዉተꬃቱዋ ማꬃ ኡሻና፤ ካተቱ ꬋንꬃካ ꬋማና። ሄዋፐ ጉይያን፥ ታን መꬍና ጎዳይ ኔና አሽያዋ፤ ዎዝያዋነ፥ ያቆባ ዎልቃማ ግድያዋ ኔን ኤራና። 17 ናሃስያ ድራዉ ዎርቃ፥ ብራታ ድራካ ብራ፥ ምꬃ ድራዉ ናሃስያ፥ ሹቻ ድራዉ ብራታ ታን ነዉ አሀና። ታን ኔና ሞድያዋንታ ሳሮ፥ ነ ካፖቱዋካ ጽሉዋ ኦꬃና። 18 ሀዋፐ ጉይያን፥ ሱገꬃ ኦሱ ነ ጋድያን ስሰተና፤ ነ ዛዋንካ ላለꬃይነ ባሻይ ስሰተና። ኔን ነ ድርሳ ግምቢያ፥ ‘አቶተꬃ’ ነ ፐንገቱዋካ፥ ‘ጋላታ’ ያጋደ ጼሳና።

19 “ሄዋፐ ጉይያን፥ ጋላስ ነዉ አዋ ፖኡዋ ኮሸና፤ ሳፃ 21:23፤ 22:5 ቃማካ አግና ፖኡዋ ኮሸና። አያዉ ጎፐ፥ መꬍና ጎዳይ ነዉ መꬍና ፖኦ ግዳናዋ፤ ነ ጾሳይ ነዉ ቦንቾ ግዳናዋ። 20 ነ አዋይ ላኤንꬆ ዉለና፤ ነ አግናይካ ፖእያዋ አገና። አያዉ ጎፐ፥ መꬍና ጎዳይ ነዉ መꬍና ፖኦ ግዳናዋ፤ ኔን ዬኬዳ ጋላሳቱካ ዉራና። 21 ነ አሳይ ኡባይ ጽሉዋ ግዳናዋ፤ ኡንቱንቱ ቢታቶካ መꬍናዉ ላታና። ኡንቱንቱ ታን ታ ቦንቹዋ ቆንጭሳናዉ ቶኬዳ ፑተቱዋ፤ ኡንቱንቱ ታ ኩሽያ ኦሶቱዋ። 22 ህንተ ግዶን እት ጎልያን ደእያ ፓይዱዋን ጉꬃ አሳቱዋ ታን ሻእሳና፤ ኡባፐ ፓይዱዋን ጉጽያዋንታካ ዎልቃማ ካዉተꬃ ኦꬃና። ታን መꬍና ጎዳ፤ ዎዲ ጋክያ ዎደ፥ ታን ሀዋ ኤለካ ፖላና” ያጌ።