1 ኡባ ሞድያ መꬍና ጎዳ አያናይ ታ ቦላን ደኤ፤ ማቶሳ 11:5፤ ሉቃሳ 7:22ሉቃሳ 4:18-19 አያዉ ጎፐ፥ ቆሄቴዳዋንቶ ሎኦ ምሽራቹዋ ኦዳና ማላ፥ ጾሳይ ታና ኦኬዳ። እ ታና ዎዛናይ መኤዳዋንቶ ኮለትያዋነ ኦሞደቴዳዋንቶ ኦሞዱዋፐ ከስያዋ አዋያና ማላነ ቃሸቴዳዋንቶ ብለꬃ አዋያና ማላ ኪቴዳ። 2 መꬍና ጎዳይ ዶሬዳ ላይꬃነ ኑ ጾሳይ ሀሉዋ ከስያ ጋላሳ አዋያና ማላነ ካዮትያዋንታ ኡባቱዋ ምንꬃና ማላ፥ ታና ኪቴዳ። ማቶሳ 5:4 3 ሄዋዳንካ ቃይ፥ ጽዮነን ካዮትያዋንቶ፥ ብድንꬃ ድራዉ ካላቻ፥ ካዩ ድራዉ ናሸቻ ዛይትያ፥ ላባና አያና ድራዉ ጋላታ ቁማዩዋ እማና ማላ፥ ታና ኪቴዳ። ኡንቱንቱ መꬍና ጎዳይ ባረ ቦንቾ ቶኬዳ ጽሎ ምꬃ ጌተቲደ ጼሰታና።

4 ኡንቱንቱ በን ኮለቴዳዋንታ ዛረꬂደ ኬጻና፤ በን ኩንዴዳዋንታካ ዛረꬂደ ኤሳና። ኡንቱንቱ ኦኔዳዋንታነ ዳሮ የለታፐ ካሰ ኮለቴዳ ካታማቱዋ ዛረꬂደ ኬጻና። 5 አላጋ ቢታ አሳቱ ህንተ ዶርሳ ዉድያ ሄማና፤ እማꬃቱካ ህንተ ጋድያ ጎሻናነ ህንተ ዎይንያ ቱራ ናግያዋንታ ግዳና። 6 ህንተ ቃይ፥ “መꬍና ጎዳ ቄሳቱ ዋ” ጌተቲደ ጼሰታና፤ አሳይካ ህንተና፥ “ኑ ጾሳ ኦሳንቻቱዋ” ያጊደ ጼሳና። ህንተ ካዉተꬃቱዋ ዱረተꬃ ማና፤ ኡንቱንቱ ዱረተꬃንካ ህንተ ጬቀታና።

7 ህንተ ዬላ ድራዉ ህንተ ላኡ ኩሽያ ሳማ አካና፤ ካዉሼዳዋ ድራዉካ ህንተ ካጫን ህንተ ናሸታና። ሄዋ ድራዉ፥ ህንተ ህንተ ጋድያን ላኡ ዳኩዋ ላታና፤ ህንተ ናሸቻይካ መꬍና ናሸቻ ግዳናዋ።

8 ጾሳይ ሀዋዳን ያጌ፤ “ታን መꬍና ጎዳይ ሱረ ፕርዳ ዶሳይ፤ ቦንቂያነ ባይዙዋ እጻይ። ታን አማነታደ፥ ኡንቱንቱ ኦሱዋ ጋትያ ኡንቱንቶ ጭጋና። ታን ኡንቱንቱና መꬍና ጫቁዋ ጫቀታና። 9 ኡንቱንቱ ዛራቱ ካዉተꬃቱዋ ግዶን፥ ኡንቱንቱ ናናይካ ጋደ አሳቱዋ ግዶን ኤረታና፤ ኡንቱንታ በኤዳ ኡባይ ታን፥ መꬍና ጎዳይ አንጄዳ አሳቱዋ ኡንቱንቱ ግድያዋ ጌሺደ ኤራና” ያጌ።

10 ታን መꬍና ጎዳን ሎይꬃ ናሸታይ፤ ታ ሸምፑካ ታ ጾሳን ሀሹ ጌ። ሳፃ 21:2 አያዉ ጎፐ፥ ቡላችያዌ ባረ ሁጲያን ቄሲ ሻሽያ ዎꬅያዋዳን፥ ቡላቼትያናካ ዱማ ዱማ አሌቁዋን አሌቀትያዋዳን፥ እ ታና አቶተꬃ ማዩዋ ማይዜዳ፤ ጽሎተꬃ ቁማዩዋካ ቦላና ታዉ ጉጄዳ። 11 ቢታይ ጫርሻ ሞክያዋዳንነ አታክልትያ ሳአይካ ቶኬዳዋ ድችያዋዳን፥ ሄዋዳንካ፥ ኡባ ሞድያ መꬍና ጎዳይ ጽሎተꬃነ ጋላታ ካዉተꬃ ኡባ ስንꬃን ፑልትሳና።