1 ጽዮነ ድራዉ፥ ታን ጮኡ ጊከ፤ የሩሳላመ ጽሎተꬃይ ዎልቃማ ፖኡዋዳን፥ እ አቶተꬃይካ ኤጽያ ጾምፕያዳን ፖአና ጋካናዉ፥ ታን ጮኡ ጊከ። 2 ካዉተꬃቱ ነ ጽሎተꬃ፥ ካተቱ ኡባይካ ነ ቦንቹዋ በአና። መꬍና ጎዳይ ባረ ዶናፐ ሱንꬅያ ኦራꬃ ሱንꬃን ኔን ጼሰታና። 3 ኔን መꬍና ጎዳ ኩሽያን ሎኤዳ አሌቁዋነ ካዉተꬃ ካላቻ ማላ ግዳና። 4 ሀዋፐ ስንꬃናዉ ኔን፥ “ዶገታ አቴዳኖ” ጌተታካ። ቃይ ነ ቢታታካ፥ “መላ አቴዳኖ” ጌተቱኩ። ሽን ኔን፥ “ታ ናሸቻይ እን ደእያኖ” ነ ቢታታካ፥ “አስና ገሌዳኖ” ጌተታና። አያዉ ጎፐ፥ መꬍና ጎዳይ ኔናን ናሸታና፤ ነ ቢታትዉካ እ አስና ማላ ግዳናዋ። 5 ዎዳላይ ዎዶራቶ ማችያዋዳን፥ ነ ናናይ ኔና አካና፤ ማቻቶ ቡላችያዌ ቡላቼትያንን ናሸትያዋዳን፥ ሄዋዳንካ፥ ነ ጾሳይ ኔናን ናሸታና።

6 ኔኖ የሩሳላመ፥ ነ ድርሳ ግምቢያ ቦላን ዎችያዋንታ ታን ዎꬃድ፤ ኡንቱንቱ ጋላስካ ቃማካ ጮኡ ጊክኖ። 7 ህንተኖ፥ የሩሳላመባ መꬍና ጎዳ ሀሳይስያዋንቶ፥ እ የሩሳላመ ኬጻና ጋካናዉነ ቢታ ኡባ ቦላን ናሸቴዳ ካታማ ኦꬃና ጋካናዉ፥ ህንተዉካ ሸምፖፕተ፤ አካ ሸምፕሶፕተ።

8 መꬍና ጎዳይ ባረ ኡሸቻ ኩሽያንነ ባረ ዎልቃማ ቀስያን ሀዋዳን ያጊደ ጫቄዳ፤ “ታን ላኤንꬆ ህንተ ካꬃ ህንተ ሞርከቶ ቁማ ኦꬃደ እምከ፤ ቃይ ህንተ ዳቡሬዳ ህንተ ዎይንያ ኤሳካ አላጋቱ ኡሽክኖ። 9 ሽን ጫኬዳዋንቱ ባረንቱ ካꬃ ማና፤ ያቲደ መꬍና ጎዳ ኡንቱንቱ ጋላታና፤ ዎይንያ ቴራ ማጼዳዋንቱ ታ ጌሻ ጎልያ ዳባባን ኡሻና” ያጌ።

10 አꬍተ! ፐንግያና ከሲደ ቢተ! አሳዉ ኦግያ ከስተ! ከስተ፥ ዎጋ ኦግያ ከስተ! ሹቻቱዋካ ድግተ፤ ካዉተꬃቱ ኦግያ ደማና ማላ፥ ባንድራ ኤስተ።

11 በእተ፥ መꬍና ጎዳይ ቢታ ሳኣ ጋጻን ሀዋዳን ያጊደ አዋዬዳ፤ “ጽዮነ አሳዉ ሀዋዳን ያግተ፤ ‘በእተ፥ ህንተና አሽያዌ ጋኬዳ! በእተ፥ አ ጋቲ አናና ደኤ፤ ኦሶ እ እምያ ኬርሱካ አ ስንꬃን ደኤ’ ያግተ” ያጌዳ። ኢሳ. 40:10፤ 22:12 12 ህንተ፥ “መꬍና ጎዳይ ዎዜዳ ጌሻ አሳቱዋ” ጌተቲደ ጼሰታና፤ የሩሳላመካ፥ “ኮየቴዳኖ፥ አግ ባሽቤና ካታማቶ” ጌተታና።