1 መꬍና ጎዳይ ሀዋዳን ያጌ፤ “ሳሉ ታ አራታ፤ ሳአይካ ታ ገዲ የꬍያ ሳ። ያትና ህንተ ታዉ ኬጻና ጎሊ አይ ማላ ጎሌ? ታን ሸምፓና ሳአይ ሀቃነ?ማቶሳ 5:34፣ 35፤ 23:22ኪታ 7:49-50 2 ሄዋንታ ኡባባካ ታ ኩሺ ኦꬄዳ ግደኔ? ሄዋ ድራዉ፥ ሀዋንቱ ኡባቱካ ታዋንታ። ሽን ታን ባረና ዝቂ ኦꬅያዋኮ፥ ባረ ኦꬄዳ ናጋራዉ ካዮቲደ ስምያዋኮነ ታ ቃላን ኮኮርያዋኮ ጼላና ያጌ መꬍና ጎዳይ።

3 “አሳይ ኡባይ ባረዉ ባረዉ እንጀትያ ኦግያ ዶሬዳ ጋሱዋን፥ ኮሩማ ያርሽያዌ አሳ ዎꬍያ ኡራ ማላ፤ ዶርሳ ማራ ያርሽያዌካ ካና ጎራእያ አሳ ማላ፤ ካꬃ ያርሹዋ ያርሽያዌካ ጉዱንꬃ ሱꬃ ያርሽያ አሳ ማላ፤ ቃይ ሀሳይስያ እጻና ጩዋይያ ኡራይካ ኤቃዉ ጎይንያ አሳ ማላ። ኡንቱንቱ ሸምፑካ ኡንቱንቱ ቱናተꬃን ናሸቴ። 4 ሄዋ ድራዉ፥ ታን መቱዋ ኡንቱንቶ ዶራና፤ ኡንቱንቱ ያዬዳዋካ ታን ኡንቱንቱ ቦላን አሀና። አያዉ ጎፐ፥ ታን ጼሴዳ ዎደ፥ ኦንነ ኮይቤና፤ ታን ሃሳዬዳ ዎደካ ኦንነ ሀይዝቤና። ኡንቱንቱ ታ ስንꬃን ኢታባ ኦꬄድኖ፤ ታን ናሸተናዋ ዶሬድኖ” ያጌ።

5 ህንተኖ፥ ጾሳ ቃላዉ ያዪደ ኮኮርያዋንቶ፥ መꬍና ጎዳ ቃላ ስስተ፤ “ህንተ እሻቱ፥ ህንተና እጽያዋንቱ፥ ታ ሱንꬃ ድራዉ፥ ህንተና ቦህያዋንቱ፥ ‘ህንተ ናሸቻ ኑን በአና ማላ፥ መꬍና ጎዳይ አነ ቦንቼትና በአና’ ያጌድኖ፤ ሽን ኡንቱንቱ ዬላታና። 6 ካታማፐ ይያ ዋሱዋ ስስተ፤ ጌሻ ጎልያፐ ይያ ኮሻካ ስስተ። ሄዌ ኮሻይ ባረ ሞርከቶ ኡንቱንቱ ኦሱዋ ማላ ኩሽያ ዛርያ መꬍና ጎዳ ኮሻ።

7 “ባንከናን ናኣ የልያ ማጫ አስ ደኢ? ኦይꬃይ ኡንኤናን አቱማ ናኣ የልያ ማጫ አስ ደኢ?ሳፃ 12:5 8 ሀዋ ማላባ ኦኔ ስሴዳዌ? ቃይ ሀዋ ማላባ ኦኔ በኤዳዌ? እት ቢታ አሳይ ፐጽ እት ጋላስ የለታናዉ ዳንዳዪየ? ዎይ ካዉተꬃይ እት ኩꬃን የለቲ? የሩሳላማ ባንኮ ሳናካ፥ እት ኩꬃን ባረ ናናቱዋ የላዱ። 9 የላና ዎድያ ጋꬅያ ታን ኡንቱንቱ የላናዳን ኦꬅክታየ? ያጌ መꬍና ጎዳይ። ቃይ የላናዳን ኦꬅያ ታን የልያ ኡሉዋ ጎርዳይታየ? ሀዋ ግያዌ ታና፥ ጾሳ።

10 “ህንተኖ የሩሳላሞ ሲቅያ ኡባቶ፥ ኢናና ናሸትተ፤ እ ድራዉካ ናሸቻን ፖጩ ጊተ። ህንተኖ እሲ ዬክያ ኡባቶ፥ ኢናና ሎይꬅ ናሸትተ። 11 አያዉ ጎፐ፥ ህንተ እ ምንꬅያ ꬋንꬃ ꬋሚደ ካላና፤ ቃይ እ ዳሮ ቦንቹዋፐ ሎይꬅ ኡሺደ፥ ህንተ ናሸታና” ያጌ።

12 መꬍና ጎዳይ ሀዋዳን ያጌ፤ “በእተ፥ ታን እዝዉ ሳሮተꬃ ሻፋዳን ዳርሳና፤ ካዉተꬃቱዋ ዱረተꬃካ ኩሚደ ጎግያ ፑልቱዋዳን፥ እዝዉ አሀና። ያቶፐ ህንተ ሄዋ ꬋማና፤ እ ሀሽያን ህንተ ቶከታና፤ እ ክዉዋን ኡቲደ፥ ህንተ እሻለታና። 13 አታ ባረ ናኣ ምንꬅያዋዳን፥ ታንካ ህንተና ምንꬃና፤ ህንተ የሩሳላመን ምነታና። 14 ህንተ ሄዋ በእያ ዎደ፥ ህንተ ዎዛናይ ናሸታና፤ ህንተ መቀꬃይካ ማታዳን አጫና። ቃይ መꬍና ጎዳ ኩሺ አ ቆማቱዋና ደእያዌነ አ ሀንቁ አ ሞርከቱዋ ቦላን ደእያዌ ኤረታና” ያጌ።

15 በእተ፥ መꬍና ጎዳይ ታማ አኪደ ያና። ባረ ሀንቀቴዳዋንታ ሙራናዉነ ታማ ላጩዋን ሴራናዉ ሳራጋላ ቶጊደ፥ እ ያና። 16 አያዉ ጎፐ፥ መꬍና ጎዳይ አሹዋ ማዬዳ ኡባ ታማንነ ማሻን ፕርዳና። ቃይ መꬍና ጎዳ ማሻን ሀይቄዳዋንቱ ፓይዱ ዳራና።

17 መꬍና ጎዳይ ሀዋዳን ያጌ፤ “አታክልትያ ሳኣን ባረንቱ ኤቃዉ ጎይናናዉ፥ ባረንቱ ግዶን ደእያ እቱዋ ካሊደ፥ ባረና ዱማዪደ ጌሽያዋንቱ፥ ቃይ ጉዱንꬃ አሹዋ፥ ሸነይያዋነ ኤጨርያ ምያዋንቱ ኡባይ እትፐ ꬋያና።

18 “ታን ኡንቱንቱ ኦሱዋነ ኡንቱንቱ ቆፋ ኤርያ ድራዉ፥ ካዉተꬃቱዋ ኡባነ ዱማ ዱማ ቃላን ሃሳይያዋንታ እትፐ ሺሻናዉ ያይ፤ ኡንቱንቱ ሺቂደ፥ ታ ቦንቹዋ በአና። 19 ታን ኡንቱንቱ ግዶን ማላታ ኦꬃና፤ ኡንቱንቱፐ አቴዳዋንታካ ታ ግታተꬃ ስስቤናነ ታ ቦንቹዋ በእቤና ካዉተꬃቱዋኮ፥ ታርሴሳኮ፥ ሊብያኮ፥ ሊድያኮ፥ ቱባላኮ፥ ያዋናኮነ አባ ዶናን ደእያ ሃኮ ቢታቱዋኮ ኪታና፤ ኡንቱንቱ ታ ቦንቹዋ ካዉተꬃቱዋ ግዶን ኦዳና። 66:19 ሊብያኮ: እብራዌꬁዋን ፑጻ ጌተቴ። 20 እስራኤልያ አሳይ ካꬃ ያርሹዋ ጌሻ ሚሻን ዎꬂደ፥ መꬍና ጎዳ ጌሻ ጎልያ አህያዋዳን፥ ኡንቱንቱ ህንተ እሻቱዋ ኡባ ካዉተꬃቱዋ ኡባ ግዶፐ ፓራቱዋን፥ ፓራ ጋረቱዋን፥ ጋሎቱዋን፥ ባቁሎቱዋንነ ሚሻቱዋ ጫንያ ጋረቱዋን ኡትሲደ፥ ታዉ እሙዋ ግዳናዳን፥ መꬍና ጎዳ ጌሻ ደርያ የሩሳላመ አሀና። 21 ኡንቱንቱፐ እቱዋ እቱዋ ታን ቄሳቱ ዋነ ሌዋቱዋ ከሳና። ታን መꬍና ጎዳይ ሀዋ ኦዳይ” ያጌ።

22 ቃይካ መꬍና ጎዳይ ሀዋዳን ያጌ፤ “ታን መꬍያ ኦራꬃ ሳሎቱነ ኦራꬃ ሳአይ ታ ስንꬃን ምኒደ ደእያዋዳን፥ ሄዋዳንካ፥ ህንተ ዘረꬃይነ ህንተ ሱንꬃይ ምኒደ ደአና። ኢሳ. 65:17፤ 2 ጰጽ. 3:13፤ ሳፃ 21:1 23 አግና ጼሩዋፐ ቢደ ሀራ ጼሩዋ ጋካናዉነ እት ሳምባታፐ ቢደ ሀራ ሳምባታ ጋካናዉ፥ አሳይ ኡባይ ታ ስንꬃን ጎይናናዉ ያና ያጌ መꬍና ጎዳይ። 24 ኡንቱንቱ ከሲ ቢደ፥ ታ ቦላ ማካሌዳ አሳቱ አሃ በአና። ሄዋንታ ምያ ጉጹኒ ሀይቀና፤ ኡንቱንታ ጹግያ ታማይካ ቶኤና። ኡንቱንቱ አሳ ኡባዉ ሸነይያባ ግዳናዋ” ያጌ። ማር. 9:48